مه‌سرور بارزانی: دێ جووتکاران دڵنیا كه‌ینەڤە ژ هه‌موو پشتەڤانیکرنا وان و دێ بازاری بۆ به‌رهه‌مێن وانا په‌یدا كه‌ین
باسنيوز:
ئەڤرو ئێكشەمبی 19/11/2023، مەسرور بارزانی، سەرۆكێ حكوومەتا هەرێما كوردستانێ، كارگەها ئارێ (دستار) ل دهۆكێ ڤەکر و د ڕێوڕەسما ڤەکرنا کارگەهیدا گۆتارەک پێشکێش کر.
ئەڤە دەقێ گۆتارا مەسرور بارزانی، سەرۆکێ حکوومەتا هەرێما کوردستانێ یە:
ب ناڤێ خودایێ مەزن و دلۆڤان
پشتی ساڵەكێ ل دانانا بەرێ بناغێ ئەڤ جهێ ئەڤرو ئەم لێینە، بۆ من جهێ خۆشحاڵییە كو ئەڤرو ئەس لێرە ل كۆمەڵگەها دۆمیز ئەڤێ كارگەهێ گرنگ كەینەڤە، دەستخۆشی ل كۆمپانیا جێبەجێكار دكەم كو ئەڤ كارێ پێشكەفتی لێرە چێکریە و دەلیڤێن كاری بۆ سەدان كەسان پەیداکریە.
گرنگیدان ب كەرتێ چاندن و دابینكرنا ئاسایشا خۆارنێ، ئێکە ژ ئارمانجێن سەرەكیێن كابینا نەهێ یا حكوومەتا هەرێما كوردستانێ، بۆ ئەڤێ مەرەمێ ژی سالا بوری ب هاریكارییا كەرتێ تایبەت مە كار بۆ ئەنجامدانا چەندین پرۆژان ل باژێرێن كوردستانێ كر د بوارێن ب بازاڕكرنا گەنمێن جووتکاران و كڕینا گەنمێن جووتکاران ل نافخۆیا كوردستانێ.
دڤێت ئەم هەموو شیانێن خۆ بێخینە كاری د بیاڤێ دابینكرنا ئاسایشا خۆارنێ و پشتەڤانیکرنا بەروبوومێن نافخۆ و بەرهەمێن جووتکارێن كوردستانێ، دڤێت جووتکارێن كوردستانێ پشتڕاست بن كو حكوومەت دێ هەموو پشتەڤانییەکێ كەت و بازاڕێ نافخۆ و دەرەكی بۆ بەرهەمێن وانا پەیدا كەت.
چێکرنا ڤان جۆرە كارگەهان ژی دێ هاریکارییەكا زۆرا جووتکارێن مە کەت هەتاكوو بەرهەمێن وان بهێنەفروتن، هاندانەکە بۆ هندێ لسەر چاندن و بەرهەمئینانێ بەردەوام بن.
ل دەمێ چەندین ساڵاندا جووتکارێن مە د ڕەوشەکا بێئومێدێدا بوون، وەكە پێتڤی پشتەڤانیا وانا نەتاتەکرن، بەلێ ئەس وانا دڵنیا و پشتڕاست كەمەڤە كو ئەس ب خو شەخسی گەلەك د خەما پێشخستنا كەرتێ چاندنێ و هاریكاریكرنا جووتکاراندامە و یا د شیانێن مە دا بیت دێ كەین بۆ هاریكارییا وان و كێمترخەمیێ ناكەین.
هین ئاگەهدارن كو ل سالا بوریدا پرۆسا هنارتنا بەرهەمێ جووتکارێن كوردستانێ بۆ بازارێن دەرڤە دەست پێ كریە و دێ بەردەوام ژی بیت.
كوردستان هەر ژ سەردەمێ کەڤندا دەڤەرەکا چاندنێ یا ب ناڤ و دەنگ بوویە و خودانێ زەڤیێن بەرفرەهـ و دەوڵەمەندە كو ئەگەر وەكە پێتڤی مفای لێ وەربگرین، دشێین هەتا ئاستەكێ باش، ئاسایشا خۆارنا خۆ دابین بكەین و ببینە سەبەتێ خۆارنێ بۆ عێراقێ و دەرڤە ژی.
سوپاسییا كۆمپانیا جێبەجێكار دکەم بۆ ئەڤێ پرۆژەی، كەرتێ تایبەت دشێت ڕۆلەکێ گرنگ ل پێشخستن و بەرەفپێشبرنا ئابوورییا هەرێما كوردستانێ بگێڕیت و حكوومەتا هەرێمێ ژی بەرهەڤه هەموو ئاسانكارییەكێ پێشكێش ب كەرتێ تایبەت بكەت، هەتاكوو مل ب ملێ كەرتێ گشتی بیت، پێكڤە هەرێما كوردستانێ بەرەف قۆناغەكا پێشكەفتی ببەن.
داخازێ ژ وەبەرهێنەرێن كوردستانێ دكەم كو وەبەرهێنانێ د كەرتێ چاندنێ و پیشەسازیێدا بكەن، هەتاكوو ئابوورییا كوردستانێ پتر گەشێ بكەت و چاڤێ مە كێمتر ل دەرڤە بیت بۆ دابینكرنا پێتڤیێن خۆ.
د سالێن بوریدا كێمترین وەبەرهێنان د بوارێ چاندن و پیشەسازیێدا هاتیە کرن، ل دەمەکیدا پتر پێشخستنا ئابوورییا هەرێما كوردستانێ پێتڤی ب وێ یە گرنگییەكا زێدەتر ب گەشەدان و پێشخستنا كەرتێ چاندن و پیشەسازیێ بدەین.
بەری دەمەكێ ئەس دگەڵ وەبەرهێنەرێن كوردستانێ ل هەموو پارێزگەهان ل هەولێرێ رونشتم، مە بەحسا تێڕوانینا حكوومەتا هەرێما كوردستانێ و داهاتوویا ئابوورییا هەرێما كوردستانێ كر و ژ نێزیک مە گوهدارییا تێبینییا وان و گلە و گازاندە و داخوازیێن وانا ژی کر كو چەوا حكوومەت و كەرتێ تایبەت پێكڤە بشێن هاریكارییا ئێک بكەن هەتاکوو بشێین وەبەرهێنانێ ل ئاستێ هەرێما كوردستانێ زێدە بكەین و كەرتێ چاندنێ، پیشەسازی، گەشتوگوزاریێ و هتد ل كوردستانێ بەرەڤپێشڤە ببەین.
مە تێبینی وەرگرتن، جهێی بایەخێ بوون، مە ژی ئێخستە بەرنامێ كارێ خۆ هەتاکوو ئەو كەموكوڕیێن كو هەین، بهێنە چارەسەر کرن، بەڵێ جارەکا دی لێرە داخاز دكەم، سەرمایەدار و وەبەرهێنەرێن كوردستانێ سەرمایێ خۆ ل كوردستانێ ب كار بینن، ئەو كەسێ زێدەتر ل كوردستانێ وەبەرهێنانێ بكەت، دڵنیا بن حكوومەت ژی زێدەتر دێ پشتەڤانیا وان كات، ئەم هەموو پێكڤە دشێین كوردستانێ بەرەف ئاستەکێ باشتر ببەین، ئابوورییا كوردستانێ باشتر بكەین، دەلیڤێن كاری بۆ خەڵكێ خۆ زێدەتر بكەین، بێشک ئەڤە دێ بیتە ڕێک و ئامرازەک بۆ هندێ رەوشا كوردستانێ، رەوشا ژیانا خەڵكێ مە ل كوردستانێ بەرەف باشتر بچیت.
ئەس جارەکا دی تر سوپاسییا وە دكەم و دەستخۆشیێ ل وە دكەم بۆ ئەڤێ كارگەها وە چێکری، ئینشەڵا نموونێن وە زۆر بیت، هیڤیدام ل جهێین دی ژی ئەو بەرنامێ حكوومەتێ بەرنامە بۆ دانایە و ئەو پرۆژێن كو ڕەزامەندی لسەر هاتیەداین، بهێنەبجهئینان.
د جهێی خۆدایە سوپاسییا ئیدارا پارێزگەها دهۆكێ بكەم بۆ پشتەڤانیا وان و هاریكاری و هەماهەنگییا وان دگەڵ كەرتێ تایبەت بۆ وان پرۆژێن کو حكوومەتێ دەستنیشان کری، لێرە وان ئەڤ پرۆژە جێبەجێ کریە، هیڤیدارم ل هەموو ئیدارە و پارێزگەهێن دی یێن كوردستانێ ژی داهاتێ پارێزگەهان دیسان بۆ خزمەتا خەڵكێ پارێزگەهێ و كوردستانێ بێتە ب کارئینان.
جارەکا دی دەستخۆشیێ ل وە دكەم، هیڤیدارم هەر سەركەفتی بن، كوردستانا مە ژی ڕۆژ ب ڕۆژێ ئاڤەدان بیت.
تُتاح هذه الصورة أيضا في: کوردی
