نێچیرڤان بارزانى: زوو هنارتنا په‌ترۆلا هه‌رێما كوردستانێ گرنگ و پێدڤى یه
گاڤ
سه‌رۆكێ هه‌رێما كوردستانێ ل گه‌ل وه‌زیرێ په‌ترۆلا ئیراقێ كۆمبوو و پشته‌ڤانیا خۆ یا ته‌مام بۆ گاڤ و دانوستاندنێن د ناڤبه‌را حكومه‌تێن هه‌رێم و ئیراقێ دا دیاركر و راگه‌هاند، زوو هنارتنا په‌ترۆلا هه‌رێما كورستانێ گرنگ و پێدڤى یه.
ئه‌ڤرۆ سپێدێ 13-11-2-2023یێ نێچیرڤان بارزانى، سه‌رۆكێ هه‌رێما كوردستانێ ل گه‌ل حه‌یان عه‌بدولغه‌نى، جێگرێ سه‌رۆكوه‌زیران بۆ كاروبارێن تێهنێ كو وه‌زیرێ په‌ترۆلا ئیراقێ ژى یه و شاندا ل گه‌ل دا كۆمبوو.
د كۆمبوونێ دا هه‌ر دو جیگرێن وه‌زیرێن په‌ترۆلا ئیراقێ و وه‌زیرێ سامانێن سروشتى یێ حكومه‌تا هه‌رێما كوردسانێ ب وه‌كاله‌ت ژى ئاماده ببوون، دوماهى پێشهات و رێكار بۆ ده‌ستپێكرنا هنارتنا په‌ترۆلا هه‌رێما كوردستانێ و دانوستاندنا ئالیێن په‌یوه‌ندیدار یێن حكومه‌تێن ئیراقێ و هه‌رێمێ به‌حسكرن.
سه‌رۆك نێچیرڤان بارزانى دوپاتى ل پشته‌ڤانیا خۆ بۆ دانوستاندن و گاڤێن حكومه‌تێن فیدرالى و هه‌رێما كوردستانێ بۆ چاره‌كرنا كێشه‌یان و دوباره هنارتنا په‌ترۆلا هه‌رێما كوردستانێ كر، هه‌روه‌سا ئاماژه دا كو راوه‌ستاندنا په‌ترۆلا هه‌رێما كوردستانێ زیانه‌كا مه‌زن ب داهاتێ گشتى یێ ئیراقێ گه‌هاندیه، لەورا هەر چەند زووتر پەترۆلا هەرێما کوردستانێ بۆ ژدەرڤەی وەلاتی بهێتە هنارتن، بۆ هەردو حکومەتان باشترە.
ژ ئالیێ خۆ ڤه وه‌زیرێ په‌ترۆلا ئیراقێ دوپاتى ل خواستا جدى یا حكومه‌تا فیدرالى یا ئیراقێ و سه‌رۆكوه‌زیر سوودانى بۆ چاره‌كرنا كێشه‌یان و ده‌ستپێكرنا هنارتنا په‌ترۆلا هه‌رێما كوردستانێ كر و هه‌روه‌سا هنده‌ك ژ ئه‌نجامێ سه‌ره‌دانا خۆ بۆ هه‌رێما كوردستانێ و ئه‌نجامێ دانوستاندنێن ئالیێن په‌یوه‌ندیدارێن حكومه‌تێن فیدرالى و هه‌رێما كوردستانێ دیاركرن.
تُتاح هذه الصورة أيضا في: کوردی
