پارتی و ئێکەتیێ راگەهاندنەکا هەڤپشک بەلاڤکر
گاڤ
کۆمبوونا گۆپیتکی یا پارتی و ئێکەتی ب سەرپەرشییا نێچیرڤان بارزانی ئەڤرۆ ل پیرمام هاتەکرن و پشتی کۆمبوونێ هەردو حزبان راگەهاندنەکا هەڤپشک بەلاڤکر.
دەقێ راگەهاندنا هەڤپشک:
“ئەڤرۆ سێشەمبی 7/11/2023 ل بارەگەهێ مەکتەبا سیاسی یا پارتی دیمۆکراتی کوردستان ل پیرمام کۆمبوونا هەڤپشک د ناڤبەرا ئێکەتیا نشتیمانی یا کوردستانی و پارتی دیمۆکراتی کوردستان هاتەکرن”.
“د کۆمبوونێ دا رەوشا هەرێما کوردستانێ و ئیراقێ ب تایبەتی و رەوشا هەستیار یا دەڤەرێ ب گشتی هاتە بەحسکرن”.
“هەردوئالیان دوپاتی ل سەر هەماهەنگی و پێکڤەکارکرن، هەروەسا پێدڤیا کۆمکرنا هێز و شیانێن سەرجەم هێز و ئالیێن سیاسی هاتەکرن، ژبۆ پاراستنا قەوارەیێ هەرێما کوردستانێ و دارشتنا ستراتیژیەکا هەڤپشک کو ل گەل رەوتا رویدان و گوهۆڕینێن ڤێ قووناغێ و بەرهنگاربوونا ئاستەنگیان یا گونجایی بیت”.
“هەردوئالی هەڤبوچوون بوون ل سەر بهێزکرنا خالێن هەڤپشک و چارەسەرکرنا کێشەیان ب ئارستەیا بەرژەوەندیێن نەتەوەیی و نشتیمانی”.
“د تەوەرەکێ دی یێ کۆمبوونێ دا دوپاتی ل پشتەڤانیکرنا گاڤێن حکومەتا هەرێما کوردستانێ هاتەکرن بۆ دابینکرنا شایستەیێن دارایی و مووچەیێ مووچەخۆرێن هەرێما کوردستانێ د چارچووڤێ دەستوورێ هەردەمی یێ ئیراقێ”.
“ل دوماهیێ ژی، بریار هاتەدان کۆمبوون د بەردەوامبن و بۆ ڤێ مەرەمێ ژی ئالیەتەکا گونجایی هاتە دیارکرن. جهێ ئاماژەپێکرنێ یە کو کۆمبوون د ژینگەهەکا ئارام و ئیجابی دا برێڤەچوو”.
تُتاح هذه الصورة أيضا في: کوردی
