مەسروور بارزانی: گرێدانا مووچەیێ فەرمانبەرێن هەرێما کوردستانێ راستەوخۆ ب بەغداڤە نەدەستووری یە
گاڤ
سەرۆکێ حکومەتا هەرێما کوردستانێ ئەڤرۆ راگەهاند کو نابیت چ ئالیێن هەرێما کوردستانێ رێکێ بۆ چ ئالیێن دی خۆشبکەن مافێن دەستووری یێن هەرێمێ بنپێبکەن.
مەسروور بارزانی د پەیاما خۆ دا گۆت ” نابیت مووچە تێکەلی کێشەیێن سیاسی بهێتەکرن، ئەگەر مووچە ژ بابەتێن دی بهێتە جوداکرن ژی، پێدڤیە ب رێکا سازیێن فەرمی یێن حکومەتا هەرێما کوردستانێ بهێتەدان”.
هەروەسا گۆت “هندەک کەسان داخواز کریە ب میکانزمەکا نەدەستووری مووچەخۆران راستەوخۆ ب بەغداڤە گرێبدەن، لێ پێدڤیە مافێن دەستووری یێن هەرێما کوردستانێ د پاراستیبن و نابیت فیدرالی ل ئیراقێ بهێتە لاوازکرن، د دوماهی سەرەدان دا ئەم شیاین کارتێکرنێ ل حکومەتا بەغدا بکەین و چارەسەریێن نێزیک بۆ ژمارەکا کێشەیان ببینین، لێ هندەک کەسان ب رێکا نڤیسینا نامەکێ بەروڤاژی وێ لێکتێگەهشتن و رێککەفتنا د ناڤبەرا هەولێر و بەغدایێ دا داخوازکریە بەغدا راستەوخۆ مووچەیێ مووچەخۆرێن هەرێما کوردستانێ بدەت، ئەڤە بنپێکرنا مافێن دەستووری یێن هەرێما کوردستانێ یە و لاوازکرنا قەوارەیێ هەرێمێ یە”.
سەرۆکێ حکومەتێ گۆت ژی “داخوازژێ ژ هەمی ئالیان دکەین نەبنە ئاسانکاری و رێخۆشکەر بۆ چ ئالیان کو مافێن دەستووری یێن هەرێما کوردستانێ بنپێبکەن و رێکێ نەدەن رێزێن خەلکێ هەرێما کوردستانێ تێکبچن، ژبەرکو بتنێ ب رێکا ئێکرێزیا خەلکێ هەرێما کوردستانێ مافێن دەستووری دهێنە پاراستن”.
ل دوماهیا پەیاما خۆ دا سەرۆکوەزیر مەسروور بارزانی دا زانین ژی “هەبوونا هەمی ئالیێن سیاسی ب بهێزبوونا قەوارەیێ هەرێما کوردستانێ ڤە گرێدایە و ئەگەر بزاڤ بۆ لاوازاکرنا هەرێما کوردستانێ هاتە کرن، بەری هەمیان ئەو کەسێن نوکە ڤێ داخوازیێ ژ بەغدا دکەن دێ زەرەرەمەندبن”.
تُتاح هذه الصورة أيضا في: کوردی
