“وه‌زیرێ وزه‌یێ یێ توركیا بۆ به‌حسكرنا هنارتنا په‌ترۆلا كوردستانێ دێ سه‌ره‌دانا ئیراقێ كه‌ت”
گاڤ
وه‌زیرێ په‌ترۆلێ یێ ئیراقێ راگه‌هاند كو وه‌زیرێ وزه‌یێ یێ توركیا بۆ به‌حسكرنا دوباره ده‌ستپێكرنا هنارتنا په‌ترۆلا هه‌رێما كوردستانێ دێ سه‌ره‌دانا ئیراقێ كه‌ت.
وه‌زیرێ په‌ترۆلێ ئاماژه دا سه‌ره‌دانه‌كا نزیك كو دێ ئه‌رپارسلان بایراكتار وه‌زیرێ وزه‌یێ یێ توركیا بۆ ئیراقێ ئه‌نجامده‌ت و تێدا دێ ل گه‌ل وه‌زاره‌تا په‌ترۆلێ یا ئیراقێ ژ بۆ به‌حسكرنا دوباره هنارتنا په‌ترۆلێ ب رێكا توركیا كۆمبیت.
حه‌یان عه‌بدولغه‌نى ئه‌ڤرۆ پێنجشه‌مبیێ بۆ NNC راگه‌هاند كو گۆتوبێژێن ئیراقێ ل گه‌ل توركیا بۆ دوباره هنارتنا په‌ترۆلێ د به‌رده‌وامن و گۆت ژى “سه‌ره‌دانه‌كا چاڤه‌رێكرى یا وه‌زیرێ وزه‌یێ یێ توركیا بۆ ئیراقێ ژ بۆ كۆمبوونێ ل گه‌ل وه‌زاره‌تا په‌ترۆلێ هه‌یه”.
دیار ژى كریه “دوباره ده‌ستپێكرنا به‌رهه‌مئینانێ ب رێكا به‌نده‌رێ جیهان دێ ئێك ژ ته‌وه‌رێن سه‌ره‌كى یێن كۆمبوونێ بیت”.
ئاماژه ب وێ چه‌ندێ ژى كر كو ئیراق یا پێگیره ب بڕیارێن كۆمبوونا بۆرى یا رێكخراوا ئوپێك.
هه‌ر ژ رۆژا 25ى ئادارا بۆرى پشتى بڕیارا ده‌سته‌یا ناڤبژیڤانیێ یا گرێداى ژوورا بازرگانى یا نێڤده‌وله‌تى ل پاریس ب پێگیركرنا توركیا ب دانا 1.5 ملیار دۆلاران وه‌ك قه‌ره‌بۆ بۆ ئیراقێ ژ به‌ر هنارتنا په‌ترۆلا كوردستانێ ب رێكا توركیا دناڤبه‌را سالێن 2014 و 2018 دا، هنارتنا په‌ترۆلا كوردستانێ راوه‌ستیایه.
سه‌ره‌راى رێككه‌فتنا حكومه‌تێن هه‌رێما كوردستانێ و ئیراقێ ل ده‌ستپێكا هه‌یڤا نیسانێ ل سه‌ر فرۆشتنا په‌ترۆلا كوردستانێ ب رێكا كۆمپانیا سومۆ یا فیدرالى، هێشتا هنارتن ده‌ستپێنه‌كریه و توركیا ژماره‌یه‌كا مه‌رجان بۆ دوباره ده‌ستپێكرنا هنارتنێ داناینه.
تُتاح هذه الصورة أيضا في: کوردی
