مه‌سرور بارزانى : پێدڤییه ل ده‌مێ بجهئینانا پرۆژه‌یان، ده‌ستێ كارێ ناڤخۆ و پاراستنا ژینگه‌هێ به‌رچاڤ بهێنه وه‌رگرتن
خانى نيوز:
مه‌سرور بارزانى سه‌رۆكێ حكومه‌تا هه‌رێما كوردستانێ د رێوره‌سمه‌كیدا به‌رێ بنیاتییێ كارگه‌ها چیمه‌نتۆیا دابین دانا، كو ئێك ژ پرۆژه‌یێن ستراتیجى و گرنگێن كابینه‌یا نه‌هێیه، گوتاره‌ك ژى پێشكێشكر.
ده‌قێ گوتارا مه‌سرور بارزانى :
ب ناڤێ خۆدێ مه‌زن و دلوڤان
ئاماده‌بوویێن به‌رێز
سوپاسییا به‌رهه‌ڤبوونا هه‌موو لایان دكه‌م، گه‌له‌ك گه‌له‌ك بخێر بهێن، بخێرهاتنه‌كا تایبه‌ت ل دكتۆر شنگ ڤان فوو سه‌رۆكێ پاوه‌رچاینا و شاندێ هه‌ڤپشك دكه‌ین بۆ كوردستانێ، گه‌له‌ك گه‌له‌ك بخێر بهێن.
دلخۆشم ئه‌ڤرۆ دگه‌ل هه‌وه‌دا پشكداربووم د دانانا به‌رێ بنیاتییێ پرۆژه‌یه‌كێ گرنگ ل هه‌رێما كوردستانێ كو كارگه‌ها چیمه‌نتۆیا دابینه و دێ بیته ئێك ژ كارگه‌هێن گرنگێن هه‌رێما كوردستانێ و رۆله‌كێ دیار دگه‌شه‌پێدانا پرۆسه‌یا بیناسازى و بنیاتدانانا كوردستانێدا هه‌بیت، ده‌ستخۆشییێ ل كۆمپانییێن دابین و پاوه‌رچاینا دكه‌م بۆ بجهئینانا پرۆژه‌ى و دروستكرنا كارگه‌هێ، هیڤیدارم ئه‌ڤ پرۆژه وه‌كو سوز پێ هاتییه دان ب كۆالیتییه‌كا بلند و د ده‌مه‌كێ دیاركریدا بهێته تمامكرن، و د دروستكرنا وێژیدا هه‌موو مه‌رجێن سلامه‌تییا كرێكاران، هه‌روه‌سا ژینگه‌هـ پارێزى به‌رچاڤ بهێنه وه‌رگرتن.
بێگومان چ ل قووناغێن درووستكرنا كارگه‌هێ و چ ل ده‌مێ ده‌ستبكاربوونێ ژى سه‌دان ده‌رفه‌تێن كارى كو پێدڤییه 75%ێ یا ده‌رفه‌تین كارى یێن وان پرۆژه‌یان بۆ وه‌لاتییێن هه‌رێما كوردستانێ بیت و راهێنان ژى ب كرێكاران و ئه‌ندازیارێن كوردستانێ بهێنه‌كرن بۆ بلندكرنا ئاستێ شاره‌زاییا وان دڤى كاریدا.
هیڤیدارین ل دروستكرنا ئه‌ڤێ كارگه‌هێ هندى دشیاندابیت بابه‌تێ ژینگه‌هـ پارێزى و گه‌رمبوونا ئه‌ردى و سنۆرداركرنا ده‌ركه‌ڤتنا گازا پیس به‌رچاڤ بهێنه وه‌رگرتن.
حكومه‌تا هه‌رێما كوردستانێژ چارچووڤێ كارنامه‌یا خوه دبوارێ هه‌مه‌جۆركرنا ئابووریدا گرنگییه‌كا مه‌زن ب هه‌ردوو كه‌رتێن پیشه‌سازى و چاندنێ د ده‌ت و ده‌ڤه‌را مه كه‌ره‌سته‌یه‌كێ خام و ده‌ستپێكى یێ مه‌زن هه‌یه كو دشیاندایه ببیته هێڤینێ دروستكرنا گه‌له‌ك كارگه‌هان و بوژاندنا پیشه‌سازى و دابینكرنا پێدڤییێن بازارێن هه‌رێما كوردستانێ و هنارده‌كرنێ ژى بۆ ده‌ڤه‌رێ.
جهێ خۆشحالییێ یه كو من گوهـ لێ هه‌یه ئه‌ڤ كارگه‌هه ب شێوه‌یه‌كێ سه‌ره‌كى پشت ب كه‌ره‌ستێن خام یێن ناڤخۆ دبه‌ستیت.
به‌رێزان
ئه‌گه‌ر ته‌ماشه‌ى ماركێت و مالێن كوردستانێ بكه‌ین، ئه‌ڤرۆ دێ بینین كو به‌هرا پتر یا كه‌لۆپه‌لێن وان دهێنه هاورده‌كرن، د ده‌مه‌كیدا كو ئه‌م دشێین پشكه‌كا مه‌زن یا وان به‌رهه‌م و پێدڤییان ل كوردستانێ دروست بكه‌ین، ئه‌ڤه دێ هه‌م كه‌رتێ مه یێ پیشه‌سازى پێشئێخیت، هه‌م بێكارییێ ژى كێمتر لێ كه‌ت، دێ پشتبه‌ستنا هه‌رێمێ ب ده‌رڤه ژى سنۆرداربیت، ژڤى لایڤه هه‌ر هاریكارییه‌ك ل سه‌ر حكومه‌تا هه‌رێما كوردستانێ بیت، ئه‌م دئاماده‌ینه بكه‌ین بۆ هندێ كه‌رتێ مه یێ پیشه‌سازى پێشكه‌ڤتنه‌كا باش بخۆڤه ببینیت، هه‌ر ل ڤێرێ ژى لایه‌نێن په‌یوه‌ندیدارێن حكومه‌تا هه‌رێمێ رادسپێرم كو ئاسانكارییا زێده‌تر بۆ پێشخستنا كه‌رتێ پیشه‌سازى بكه‌ن و هه‌ر ئاسته‌نگه‌كا هه‌بیت پێدڤییه بده‌نه لابده‌ن.
ئه‌ز جاره‌كا دى ده‌ستخۆشییێ ل بجهئینانا ئه‌ڤى پرۆژه‌یێ گرنگ دكه‌م و هیڤیدارم پرۆژه‌یێن هه‌ڤشێوه‌یێ ڤى ل به‌هرا پترا ده‌ڤه‌رێن كوردستانێ بهێنه بجهئینان.
جاره‌كا دى گه‌له‌ك گه‌له‌ك سوپاس بخێر بهێن، هوون هه‌ر سلامه‌ت و به‌خته‌وه‌ربن و كوردستان ژى هه‌ر ئاڤه‌دان بیت.
تُتاح هذه الصورة أيضا في: کوردی
