ده‌رونناسه‌ك:باشتره پێكئینانا هه‌ڤژینیێ دناڤبه‌را 25تا30 سالیێ دا بت
پێكئینانا ژیانا هه‌ڤژینیێ بریاره‌كا گرنگه د ژیانا مرۆڤى دا و پێتڤیه د ته‌مه‌نه‌كێ گونجاى دا بت و دڤێت ئه‌ڤ بریاره ب هشیارى بێته دان،داكو ژیانا خۆ بۆ هه‌تا هه‌تایێ تێك نه‌ده‌ن و ب به‌خته‌وه‌رى بژین و خودان پاشه‌رۆژه‌كا گه‌ش بن،دڤى ده‌رباره‌ى دا ده‌رونناسه‌ك دبێژت:باشتره پێكئینانا ژیانا هه‌ڤژینیێ دناڤبه‌را 25تا30 سالیێ دابت،ژبه‌ركو ته‌مه‌نه‌كێ گونجاى یه.
تۆرا لالش یا راگه‌هاندنێ / راپۆرت:دلگه‌ش نه‌واف
ده‌رونناس ناسین عه‌بدى،بۆ ده‌نگێ لالش دیاركر،ته‌مه‌نێ مرۆڤى په‌یوه‌ندیه‌كا كاریگه‌ر و راسته‌وخۆ ل سه‌ر ژیانا هه‌ڤژینیێ هه‌یه یا پێتڤیه د ته‌مه‌نه‌كێ گونجاى دا ژیانا هه‌ڤژینیێ بێته پێكئینان،ئه‌ڤ چه‌نده ژ جڤاكه‌كى بۆ جڤاكه‌كى یا جیاوازه ژبه‌ر گهۆرین و جیاوازیا ژینگه‌هێ هه‌روه‌سا گه‌شه‌یا مێشكى گرنگتره ژ گه‌شه‌یا ته‌مه‌نى ئانكو ئه‌و كه‌سێ خێزانێ د ته‌مه‌نێ سنێله‌یێ دا پێكدئینت هیچ ره‌وشه‌نبیریه‌كا خێزانى ل جه‌م نینه،دزانستێ ده‌روونناسیێ دا ئه‌و به‌شێن مێشكى یێن به‌رپرس ژ بریاردان و هه‌لبژارتنا دروست ته‌مه‌نێ 25 سالیێ یه ده‌ستنیشانكرینه،ژبه‌ركو بتر گه‌شه دكه‌ت ژبه‌ر ئه‌ڤێ چه‌ندێ باشتره پێكئینانا ژیانا هه‌ڤژینیێ دناڤبه‌را 25تا30 سالیێ دابت ژبه‌ركو ته‌مه‌نه‌كێ گونجاى یه.
ئه‌ڤى ده‌رونناسى گۆت:هه‌ردوو لایه‌نێن كچ و كور ئه‌گه‌ر د ته‌مه‌نێ سنێله‌یێ ژیانا هه‌ڤژینیێ پێكبینن دێ تووشى ئاریشان بن،ژبه‌ركو هه‌ردوو لایه‌نان كێم شاره‌زاى و نه‌گه‌شه‌یا هزرى و جڤاكى یا هه‌ى و ل پاشه‌رۆژێ كارتێكرنه‌كا مه‌زن ل سه‌ر ژیانا ناڤخۆیا كه‌سى دكت،چنكو ته‌مه‌نێ سنێله‌یێ دا تاك هێشتا نه‌گه‌هشتیه ته‌مامه‌تیا ئه‌قلى و له‌شى و مه‌عریفى و ده‌ما ژڤێ قۆناغێ ده‌رباز دبن هزرێن وان دئێنه گهۆرین د ژیانا پێكئینانا خێزانێ دگه‌هن،هه‌روه‌سا پێكئینانا خێزانێ د ته‌مه‌نێ سنێله‌یێ دا كارتێكرنه‌كا مه‌زن ل هه‌ردوو لایه‌نان دكت،ژبه‌ركو ژ پرۆسا خووندنێ دوور دكه‌ڤن و ئه‌ڤ چه‌نده دبته ئه‌گه‌رێ بێ هیڤیبوونێ ژ ئارمانجێن پاشه‌رۆژێ و ئه‌ڤ یه‌ك سه‌ر جڤاك و ژینگه‌هێ ژى یا ب مه‌ترسى یه ژبه‌ركو گه‌له‌ك سنێله چاڤ ل هه‌ڤ دكن.
ناسین عه‌بدى ئاماژه‌كر،كچ بتر ژ كورى د ته‌مه‌نێ سنێله‌یێ دا ژیانا هه‌ڤژینیێ پێك دئینت، زۆربه‌یا جاران گه‌له‌ك خێزان ژبه‌ر هه‌ژاریێ كچا خۆ د ده‌نه شوو و زۆربه‌یا جاران ژبه‌ر ره‌وش و تیتالێن ملله‌تان هزرا وان یا كه‌ڤن ئافره‌ت دبته قووربانى یا ئه‌ڤێ چه‌ندێ و گه‌له‌ك جاران ده‌مێ په‌یوه‌ندیا ئه‌ڤینیێ گرێده‌ت ئه‌گه‌ر سه‌رنه‌كه‌ڤت وه‌ك تۆلڤه‌كرن خێزانه‌كێ پێكدئینت،دڤێت خێزان و ده‌ستهه‌لات هشیاریان ب هه‌موو رێیان بده‌نه سنێله‌یان كا پێكئینانا خێزانێ دته‌مه‌نێ سنێله‌یێ دا یا چاوایه دا تووشى چ ئاریشێن هۆسا نه‌بن و زوو بریارێ نه‌ده‌ن و ژیانا خۆ بۆ هه‌تا هه‌تایێ تێك نه‌ده‌ن و ب به‌خته‌وه‌رى بژین و خودان پاشه‌رۆژه‌كا گه‌ش بن.
پارێزه‌ر هێمن فه‌ره‌ج،بۆ ده‌نگێ لالش دیاركر،پێكئینانا خێزانێ بریاره‌كا گرنگه د ژیانا مرۆڤى دا دڤێت ئه‌ڤ بریاره ب هشیارى بێته دان نه‌كو د ته‌مه‌نێ سنێله‌یێ دا بێته دان و رۆژانه سنێله خێزانه‌كێ پێكدئینن و ئه‌ڤ چه‌نده د ژیانا مرۆڤى دا بریاره‌كا شاشه،چنكو ئه‌ڤ بریاره هه‌تا داویا ژیانا وانایه و ئه‌و كه‌سێن خێزانێ پێكدئینن ئه‌وان كه‌سان ئاگه‌هـ ژ خۆ نینه هێشتا ئه‌قلێ وان ته‌مام نه‌بوویه رۆژ بۆ رۆژێ ئه‌ڤ دیارده دناڤ جڤاكێ ئێزدى دا به‌ربه‌لاڤ دبت،بكارئینانا سۆشیال میدیایێ ژى به‌ره‌لا بوویه و بوویه پالده‌ره‌ك كو سنێله خێزانێ پێكبینن دڤێت یاسا رێگریێ ل ئه‌ڤێ سۆشیال میدیایێ بكه‌ت و به‌ره‌لایه‌تیا وێ نه‌هێلت،و ئه‌ڤ چه‌نده هه‌موو بووینه ئه‌گه‌ر ئاریشێن خێزانى یێن سنێله‌یان ل دادگه‌هێ زێده‌بن و ژێك جودابن،دڤێت جڤاك ب ته‌مامى یێ هاریكار بت دگه‌ل سنێله‌یان و ئه‌و ژى ب رێیا قوتابخانێ و سمیناران و راگه‌هاندنێ و شلۆڤه‌كرنا ئه‌ڤى بابه‌تێ هه‌ستیارێ ژیانێ.
س.س
تُتاح هذه الصورة أيضا في: کوردی
