بنگه‌هێ لالش خيڤه‌تگه‌ها گه‌شه‌پێدانا مرۆڤايه‌تى بۆ 90 گه‌نجێن ئێزدى ب داوى ئانى
تۆڕا لالش/دهۆك
دڕێوره‌سمه‌كا ژ هه‌ژى دا بنگەهێ لالش ل دهۆكێ ب هه‌ماهه‌نگى دگەل دەزگەهێ خێرخوازیێ بارزانی،خيڤه‌تگه‌ها گه‌شه‌پێدانا مرۆڤايه‌تى بۆ 90 كچ و كوڕێن ئێزدى ب داوى ئانى كو تێدا چه‌ندين برگه و چالاكيێن ڕه‌وشه‌نبيرى و جڤاكى و ده‌روونى و زانستى دگه‌ل گه‌شتێن زانستى هاتنه ئه‌نجامدان.
ئيرۆ ڕۆژا ئێك شه‌مبوويێ 7ى نيسانا 2024ێ ل ده‌ڤه‌را بارزان ب ئامادەبوونا “عه‌لى عه‌ونى” بەرپرسێ پەیوەندیێن نیشتیمانی یێن (pdk) و”هه‌رمان میرزا بەگ” ڕاوێژكارێ سەرۆکێ حکوومەتا هەرێما کوردستانێ و “نازم هركى” بەرپرسێ لقێ 17 يێ پارتى ل شنگال وپەرلەمانتاران “مه‌حما خه‌لیل” و “ڤیان ده‌خیل” و”سعود مستۆ” ڕێڤەبەرێ گشتیێ كاروبارێن ئێزدیان وهەردوو قایمقامێن شنگاڵ ومێرگەسۆر و “سه‌عيد جردۆ”سه‌رۆكێ ده‌سته‌يا بلندا بنگه‌هێ لالش و “د.سه‌عيد خودێدا” جێگرێ سه‌رۆكێ بنگه‌هى و “جه‌عفه‌ر سمۆ” و “د.فارس كتى” و “ئه‌سعه‌د ره‌شيد” و “د.منيب سه‌يدۆ” و “خه‌له‌ف ئلياس” ئه‌ندامێن ده‌سته‌يێ و چه‌ند به‌رپرسێن دى يێن حزبى،ڕێوره‌سمێن ب داوى ئينانا خيڤەتگەها گه‌شه‌پێدانا مرۆڤایەتی کو بۆ دەمێ پێنج ڕۆژان ژئالیێ بنگەهێ لالش ب هەماهەنگی دگەل دەزگەهێ خێرخوازیێ بارزانی بۆ 90 کوڕ وکەچێن ئێزدی هاتبوو ل دارخستن هاتنە گێڕان.پشتى خۆله‌كه‌ك ڕاوه‌ستيان ل سه‌ر گيانێ جانگۆريێن كوردستانێ سه‌روه‌رێ وان بارزانيێ نه‌مر و كاك ئدريسێ هه‌رده‌م ل بير،ل دووڤدا په‌يڤێن ڕێڤه‌به‌رييا خيڤه‌تگه‌هێ ژلايێ “ره‌واج حاجى” و قایمقامێ مێرگەسۆر و “سه‌عيد جردۆ” سه‌رۆكێ بنگه‌هێ لالش و “مه‌حسن حه‌سه‌ن” ئێك ژ به‌شداربوويان هاتنه پێشكێشكرن.
ل ڕۆژا 3ى نيسانا 2024ێ،خیڤەتگەها گه‌شه‌پێدانا مرۆڤى یا تايبه‌ت يا بنگەهێ لالش دگەل دەزگەهێ خێرخوازی یێ بارزانی،ب به‌شداريا 90 كچ و كوڕان ل هه‌موو ده‌ڤه‌رێن ئێزديان ده‌ستپێكر و تێدا چه‌ندين سمينارێن ڕه‌وشه‌نبيرى و جڤاكى و ده‌روونى و زانستى دگه‌ل گه‌شتێن زانستى ژلايێ كه‌سانێن ڕه‌وشه‌نبير ڤه بۆ به‌شداران هاتنه ئه‌نجامدان و بۆ ماوێ پێنج ڕۆژان يا به‌رده‌وام بوو.
ل دووڤ پرۆگرامێ هاتى بجيئينان ڕۆژانه 16 ده‌مژمێران ژ 6ى سبێ تا 10ى ب شه‌ڤێ ده‌ست ب ئه‌نجامدانا به‌رنامێ خيڤه‌تگه‌هێ بۆ به‌شداران دهاته كرن.
دناڤا خيڤه‌تگه‌هێ دا كه‌سێن به‌شدار ل سه‌ر 9 گرۆپاندا هاتبوون دابه‌شكرن كو خۆ ب خۆ ڕێڤه‌برنا كاروبارێن خيڤه‌تگه‌هێ دكرن.
به‌شداربوويان دكه‌شه‌كێ دلڤه‌كه‌ر دا دلخۆشيا خۆ ده‌ر‌برين ژبۆ ل دارخستنا ڤێ خيڤه‌تگه‌ها گه‌شه‌پێدانا مرۆڤى و سوپاسيا ده‌سته‌يا بلندا بنگەهێ لالش دەزگەهێ خێرخوازیێ بارزانی كرن.
پاشان باوه‌رنامه دگه‌ل دياريان كو ژلايێ دەزگەهێ خێرخوازیێ بارزانی ڤه هاتبوون به‌رهه‌ڤكرن ل سه‌ر به‌شداربوويان هاتنه به‌لاڤكرن.
تێ زانين تا نۆكه شه‌ش خۆلێن خيڤه‌تگه‌هێن جودا جودا ژلايێ بنگه‌هێ لالش يێ ڕه‌وشه‌نبيرى و كۆمه‌ڵايه‌تى ل دهۆكێ بۆ گه‌نجێن ئێزدى ژ كچ و كوڕان هاتينه ڕێكخستن.
تُتاح هذه الصورة أيضا في: کوردی
