ل كۆمه‌لگه‌ها شاريا ۆرکشۆپەك ل دۆر گەنج و گرنگیا خووندنێ هاته سازكرن
تۆرا لالش:
ب ئارمانجا هاندانا گه‌نجان بۆ خووندنێ،ئيرۆ شه‌مبوويێ 21ى چريا ئێكێ 2023،ل هۆلا لالش ئێك ۆركشۆپه‌ك ل دۆر گەنج و گرنگیا خووندنێ بۆ زێده‌ترى 35 گەنجێن ئاوارە و خوه‌جهێن كۆمه‌لگه‌ها شاریا ژ هەردوو ڕەگەزان هاته سازكرن.
بنگەهێ لالش تایێ شاریا ب هەماهەنگی دگەل ڕێکخراوا ڕۆشنگەری بۆ پیادەکرنا دیموکراسیێ و ڕێکخراوا نوپێل بۆ گەشەپێدانا جڤاکی و پاڵپشتیا ڕێکخراوا (ITTB) یا ئەلمانی، ورکشۆپەك سازکر ل دۆر گەنج و گرنگیا خووندنێ بۆ گه‌نجێن كۆمه‌لگه‌هێ و ئاواره‌يێن شنگالێ.
د ڤێ ۆرکشۆپێدا ب تێر و تەسەلی بەحسێ خووندنێ ب گشتی و گرنگیا وێ ب تایبەتی هاتە کرن وەک ستوونەکا تایبەت بۆ ئاڤاکرنا جڤاکی و جڤاکێ مە ب تایبەت و ئاڤاکرنا نفشەکێ کو خودان شیانێن سەرکردە بت بۆ بڕێڤەبرنا کۆمەلگەها خۆ د هەر بوارەکیدا.
هه‌روه‌سا ۆرکشۆپێ چەندین بڕگەیێن جودا بخۆڤە گڕتبوون ژ وانا گرنگیا خووندنێ بۆ مێشکێ مرۆڤی و خۆگونجاندن د ناڤ کۆمەلگەهێدا و گرنگیا خووندنێ ژ ئالیێ زانستی و هەر بوارەکێ دی دا.
ل دەستپێکێ “دلگه‌ش سه‌ليم” به‌رپرسێ بنگەهێ لالش تایێ شاریا دپه‌يڤه‌كێ دا دیارکر كو بنگەهێ لالش هەردەم پشتەڤانێ تەخا گەنجان و قوتابیانە و ئامادەییا بنگەهی دیارکر بۆ هەر خزمەتەکا وێ تەخا گرنگ ب تایبەت دبیاڤێ خووندنێ دا.
ل دووڤڕا”سلێمان خەمۆ” بەرپڕسێ ڕێکخراوا ITTB یا ئەلمانی په‌يڤه‌ك پێشكێشكر و دیارکر كو ئه‌و دێ به‌رده‌وام د خزمەتا تەخا گەنجان دا بن.
پاشی هەردوو ڕاهێنەرێن ۆرکشۆپێ مامۆستا “عبدالرحمن بامەرنی” و مامۆستا “جه‌لال لزگین” تەوەرێن خۆ یێن ل دۆر گرنگیا خووندنێ پێشکێشکرن و گرنگیا وێ بۆ ئامادەبوویێن ۆرکشۆپێ دیارکرن و تەکەز ل خووندنێ و گونجاندنا وێ د کۆمەلگەهێ دا کرن.
ل داویا ۆرکشۆپێ باوەرنامە بسه‌ر ئامادەبوویان دا هاتنە به‌لاڤكرن.
تُتاح هذه الصورة أيضا في: کوردی
