ل كۆمه‌لگه‌ها شاریا پانێلەك ل دۆر سترانا فڵکلۆرێ چیایێ شنگالێ هاتە ل دارخستن
تۆڕا لالش:
ئێڤارييا ئيرۆ 20ى چريا ئێكێ 2023،بنگەهێ لالش تایێ شاریا ب هەڤکاری دگەل ڕێکخراوا نوپێل ڕابوو ب ئەنجامدانا دوو سمیناران و ڤەکرنا پێشانگەهەکا پەرتووکان.
ل دەستپێکێ “دلگەش سەلیم”بەرپرسێ بنگەهێ لالش تایێ شاریا په‌يڤه‌ك پێشکێشکرو ب خێرهاتنا ئامادەبوویان کر.
ل دووڤدا سمینارا ئێکێ ژ لایێ ڕێزدار “سه‌عيد جردۆ”سەرۆکێ دەستەیا بلندا بنگەهێ لالش ڤە هاتە پێشکێشکرن،تێدا باس ل گرنگیا سترانا فڵکلۆرێ چیایێ شنگال کر و دا دیارکرن کو هەر مللەتەك ب فڵکلورێ خۆ دیارە وباس ل بنەمایێن سترانێ کر و چەندین نموونە ل سەر سترانێ دانە دیارکرن و ستران د شەراندا و ستران د فڵکلورێ کوردی دا و ب درێژی باس ل سترانا چیایێ شنگالێ کر.
سمینارا دوویێ ژلایێ نڤیسەر “مەروان داوود” ڤە هاتە پێشکێشکرن و تێدا باس ل ئێکەم بەرهەم و پەرتووکا خۆ یا بناڤێ(ئاوازێن هێژیران) کر و ژیانا سترانبێژین چیایێ شنگالێ کو ئەوێن د پەرتووکا خۆ یا نوو دا باس لێ کری و هەروەسا دا دیارکرن کو ئەڤ پەرتووکا وی وەك پرۆژەيه‌ك دبت بەردەوام بت.
پاشى دەرگەهێ پسیاران بۆ ئامادەبوویان هاتە ڤەکرن ل دۆر هەردوو سمیناران و بەرسڤ ب شێوەیەکی تیروتەسەلی ل سەر سترانا فڵکلۆری و سترانبێژین چیایێ شنگالێ هاتە دان ژلایێ هەردوو بەرێزان ڤە.
د برگا داویێ دا پێشانگەهەکا پەرتووکان ژلایێ مامۆستا سالح جاسم ڤه هاتە ڤەکرن،ژبۆ پتر بلندکرنا ئاستێ ڕەوشه‌نبيری ل دەڤەرێ و ژبۆ پشتەڤانیەك بۆ گەنجێ مە پتر نێزیکی خووندنا پەرتووکان بن و ژێ نەئێتە دورکرن.
بۆ زانين پەرتووکا ئاوازێن هێژیران بێ بەرامبەر ب سەر ئامادەبوویان دا هاتە بەلاڤکرن و ئەو پەرتووکێن هاتینە پيشان دان ل پێشانگەهێ ب بەهایەکێ رەمزی بوون.
تُتاح هذه الصورة أيضا في: کوردی
