نڤيسينگه‌ها ڕزگاركرنا گرتيێن ئێزدى:پشتى 9 ساڵان كچه‌كا دى يا ئێزدى ژ ده‌ستێ داعش هاته ڕزگاركرن
رووداو دیجیتاڵ
بەرپرسی نووسینگەی رزگارکردنی رفێندراوانی دەستی داعش دەڵێت، کچێکی دیکەی کوردی ئێزدی رزگارکرا، بەمەش ژمارەی رزگارکراوان گەیشتە سێ هەزار و 574 رزگارکراو.
حوسێن قائیدی، بەرپرسی نووسینگەی رزگارکردنی رفێندراوانی دەستی داعش ئەمڕۆ “چوارشەممە 27-09-2023″ لە کۆنگرەیەکی رۆژنامەڤانیدا رایگەیاند ”ئەمڕۆ بە پشتیوانیی بەردەوامی نێچیرڤان بارزانی، سەرۆکی هەرێمی کوردستان، کچێکی دیکەی ئێزدی بە ناوی (د. ا.)، کە بۆ ماوەی 9 ساڵ لە دەستی داعشدا بوو، رزگارکرا.”
حوسێن قائیدی ئاماژەی بەوە کرد، ئەوانەی تاوەکو ئێستا رزگارکراون ژمارەیان سێ هەزار و 574 کەسە، گوتی “لەسەر راسپاردەی سەرۆکی هەرێمی کوردستان، تاوەکو یەک کەس لە دەستی داعشدا بمێنێت، کاری نووسینگە بۆ رزگارکردنیان بەردەوام دەبێت.”
بەگوتەی بەرپرسی نووسینگەی رزگارکردنی رفێندراوانی دەستی داعش، تەمەنی کچە رزگارکراوەکە 23 ساڵە و خەڵکی ناوچەیەکی شنگالە. لەکاتی رفاندنیدا، تەمەنی تەنیا 14 ساڵ بووە.
حوسێن قائیدی بەبێ ئەوەی ئاماژە بەو شوێنە بکات کە کچەکەی لێ رزگارکراوە، گوتی سێ یان چوار کەسی دیکەش لەو ناوچەیەدا هەن، کە بۆ رزگارکردن دەستنیشانکراون ”ئەگەر توانرا، ئەوانیش رزگار بکرێن، ئەوکات ناوی ئەو وڵاتە ئاشکرا دەکەین.”
بەرپرسی نووسینگەی رزگارکردنی رفێندراوانی دەستی داعش ئەوەشی خستەڕوو، تاوەکو ئێستا حکومەتی عێراق ”بە هیچ شێوەیەک” بۆ رزگارکردنی رفێندراوانی ئێزدی، هاوکاریی نووسینگەکەی نەکردووە.
لە هێرشی داعشدا بۆ سەر شنگال، لە سێی ئابی ساڵی 2014، داعش کوردانی ئێزدیی کۆمەڵکوژ کرد و، شەش هەزار و 417 کەسیشی رفاند، کە تائێستا سێ هەزار و 574 کوردی ئێزدی رزگارکراون و نزیکەی 2843 کەسیش بێسەروشوێنن.
نووسینگەی رزگارکردنی رفێندراوانی دەستی داعش ساڵی 2014 بە بڕیاری نێچیرڤان بارزانی کرایەوە.
تُتاح هذه الصورة أيضا في: کوردی
