سامپلێن خوینێ بۆ ناساندنا روفاتێن ئێزديان دئێنە وەرگرتن
ئه‌ڤرۆ نيوز:
دەستەیا ڤەكۆلین و كۆمكرنا بەلگەنامەیان ل دهۆكێ دیار كر، سەمپلێن خوینی بۆ ناساندنا رووفاتێن ئێزدی یێن قوربانیێن دەستێن تیرۆرستێن داعش دهێنە وەرگرتن، هەتا نوكە پتر ژ 200 رووفاتێن قوربانیێن جینوسایدا شنگال ل بەغدا ماینە و ناسنامەیێن وان ئاشكرانەبووینە.
دڤێ دەربارێ دا، عەقید شاكر مەحمود ئەفسەرێ دەستەیا ڤەكۆلین و كۆمكرنا بەلگەنامەیان ل دهۆكێ راگەهاند: «تیمەكێ پێكهاتێ ژ نوژداریا داد ل بەغدا و وەزارەتا شەهیدان سەرەدانا دهۆكێ كرن بۆ وەرگرتنا سەمپلێن خوینێ ژ كەس و كارێن قوربانیێن جینۆسایدا شنگال، مەرەم ژی وەرگرتنا سەمپلێن خوینێ ئەوە بوویە ناسنامەیێن رۆفاتێن ئێزدی یێن قوربانیێن دەستێن تیرۆرستێن داعش بهێنە ئاشكراكرن. ئەڤ هەوا كۆمكرنا سەمپلێن خوینی ل كۆمەلگەها شاریا سەر قەزا سێمێلێ ڤە دهۆك و ناڤ سەنتەرێ شنگال دا هاتە كرن، رووفاتێن 379 قوربانیێن جینوسایدا شنگال ژ ناڤ گۆرێن بكۆم و تاكە كەسێ هاتینە دەرئێخستن هەتا نوكە ناسنامەیێن 200 قوربانیان ئاشكرانەبووینە «.
ئاشكەرا كر:» ئەڤ سەمپلێن خوینێ بۆ پشكنینا DNA هێنە وەرگرتن داكوو رۆفاتێن قوربانیێن جینوسایدا شنگال ئاشكرابن كو 370 رۆفاتان ژناڤ گۆرێن بكۆم و تاكە كەسێ هاتینە دەرئێخستن هەتا نوكە ناسنامەیێن 170 رۆفاتێن ئێزدیان ئاشكرابووینە و هێشتا ناسنامەیێن پتر ژ 200 رۆفاتان ئاشكرانەبووینە».
خەیری بۆزانی، سەرپەرشتێ دوسیەیا رزگاركرنا رەڤاندیێن ئێزدی دیاركر:» هەتا نوكە پینچ هزار كەسێن ئێزدی ژ ئەگەرێ جینۆسایدا شنگال شەهید بووینە 120 هزار كەسێن ئێزدی كۆچبەری دەرڤەی وەلاتی بووینە «.
سەرپەرشتێ دوسەیا رزگاركرنا رەڤاندیێن ئێزدی راگەهاند:» 550 هزار كەسێن ئێزدی ل عێراقی هەنە هەتا نوكە 135 هزار و 860 كەسێن ئێزدی ناڤ كەمپێن ئاواران ل هەرێما كوردستانێ ماینە و 189 هزار و 337 كەسێن ئاوارە ئێزدی ل هەرێما كوردستانی ژ دەرڤەی كەمپان ژی دژین ، پینچ هزار كەسێن ئێزدی هەتا نوكە ژ ئەگەرێ جینۆسایدا شنگال شەهید بووینە و دوو هزار و745 كەس بووینە ئەتیم».
ئاشكەرا كر:» كار بۆ رزگاركرنا رەڤاندیێن ئێزدی یێ بەردەوامە هەتا نوكە سێ هزار و 570 كەسێن ئێزدی ژ هەردوو رەگەزان ژبن دەستێن تیرۆرستێن داعش رزگاربووینە و هێشتا چارەنڤیسێ دوو هزار و پتر 800 كەسان دیارنینە».
تُتاح هذه الصورة أيضا في: کوردی
