نێچیرڤان بارزانى ساڵڤەگەڕا دامەزڕاندنا بنگەهێ لالش پیرۆز دكەت
تۆرا لالش:
نێچیرڤان بارزانی،سەرۆكێ هەرێما كوردستانێ د پەیامەكێ دا ساڵڤەگەڕا دامەزڕاندنا بنگەهێ لالش پیرۆز كریە كو ئەڤەژی دەقێ وێ یە:
ڕێزداران ل دەستەیا بلند یا بنگەهێ لالش یێ ڕەوشەنبیری و جڤاكی
سلاڤ و ڕێز..
بیرانینا (30) ساڵیا دامەزڕاندنا بنگەهێ لالش یێ ڕەوشەنبیری و جڤاكی، ل هەموو خوشك و برایێن ئێزدی پیرۆز دكەم، هیڤییا بەردەوامی و سەركەفتنێ ژبۆ وە دخوازم.
د دەمەكێدا كو ب ڕێز و پێزانین ل خزمەت و كار و كەدا بنگەهێ لالش ژبۆ ئێزدیاتیێ دنێڕین، جارەكا دی هەموو پشتەڤانیەكێ ژبۆ بنگەهێ لالش یێ ڕەوشەنبیری و جڤاكی و خوشك و برایێن مە یێن ئێزدی دوبارە دكەین و وە پشتڕاست دكەین كو وەك هەردەم دێ پارێزەرێن هەموو ماف و داخوازێن وە یێن ڕەوا بین.
د (30) ساڵێن چووییدا بنگەهێ لالش یێ ڕەوشەنبیری و جڤاكی،د گەلەك واراندا خزمەتەكا بەرچاڤ یا ئێزدیاتیێ و جڤاكا ئێزدی ب گشتی كریە و بوویە ناڤەندەكا گرنگ یا پاراستن و پێشڤەبرنا ئێزدیاتیێ،دەستخۆشیێ ل ڤێ خەباتا وە دكەین، هەروەسا ب ڕێز و پێزانین هەموو وان ڕێزداران ب بیر تینین یێن كو خزمەتا بنگەهێ لالش كرین و وەغەر كرن، جانێ وان شاد و بیرهاتنا وان ب خێر بیت.
بیرهاتنا دامەزڕاندنا بنگەهێ لالش ل هەموویان پیرۆز بیت.
هەر سەركەفتی بن.
نێچیرڤان بارزانی
سەرۆكێ هەرێما كوردستانێ
2023/5/12
تُتاح هذه الصورة أيضا في: کوردی
