شاریا: سمینارەک لدۆر بیرەوەرییێن شۆڕهش و بەرخوەدانێ هاتە گێڕان
تۆرا لالش:
ڕێکەفتی (10\5\2023 ) ڕۆژا چارشەمبێ، سمینارەک هاتە ڕێکخستن ژ ئالیێ بنگەهێ لالش تایێ شاریاڤە لدۆر ( بیرەوەریێن شورش و بەرخوەدانێ ) بۆ پێشمەرگە و هەلبەستڤان ( رزگار کێستەیی )، هەروەسا ئیمزاکرنا پەرتووکا وی یا ( ل ژێر سیبەرا چیا ) ل هۆڵا لالش (1) ب ئامادەبوونا جەماوەرەکێ زۆر ژ کەسایەتی و ڕەوشەنبیرێن دەڤەرێ .
پێشمەرگەو هەلبەستڤان ( ڕزگار کێستەیی ) بەحس ل بیرەوەریێن شورشێ و بیرهاتن و رۆژانێن پێشمەرگایەتی و خەباتا وان پێشمەرگەهێن قارەمان و خەباتکار کر کو گەلەک ژ وان بیرەورییان د پەڕتووکا خۆ دا نڤێسینە و دیارکر دێ بتە ئەرشیفەکێ باش و گەنجینەیەکا باش بۆ ئاییندەیێ گەلێ مە.
جەخت ژی ل پڕۆژەیێ سەنتەرێ کۆماتە کر ژ بۆ ئەرشیفکرنا بیرەوەرییێن پێشمەرگەیان کو کارێ وان یێ سەرەکی دکیۆمێنتکرن و ئەرشیڤکرن و پاراستنا بیرەوەریێن شۆڕش و پێشمەرگایەتیێ نە کو ب شێوازێ پەرتووک و ڤیدیۆ دهێنە پاراستن.
پاشان مامۆستا ڕزگار کێستەیی ب ئارمێ بنگەهێ لالش تایێ شاریا ژ ئالیێ بەرپڕسێ بنگەهیڤە بەڕێز( دلگەش سلیم) هاتە خەلاتکرن.
ل داویێ ژی پەرتووکا نڤیسەری ( ل ژێر سیبەرا چیا ) ژ لایێ ویڤە هاتە ئیمزاکرن بۆ ئامەدەبوویان .
تُتاح هذه الصورة أيضا في: کوردی
