ئایار 18, 2024

Lalish Media Network

صحيفة إلكترونية يومية تصدر باشراف الهيئة العليا لمركز لالش الثقافي والاجتماعي في دهوك - كوردستان العراق

ڕێورەسمێن جەژنا سەر سالێ‌ دێ‌ ئێنە گێران

ڕێورەسمێن جەژنا سەر سالێ‌ دێ‌ ئێنە گێران
تۆرا لالش:
جەژنا سەرسالێ‌ كەڤنترین و گرنگترین جەژنا ئێزدیایە و كەڤناتیا وێ‌ دزڤرتە دەستپێكا ئافراندنا كنیاتێ‌،دكەفتە چارشەمبوویا ئێكێ‌ ژمەها نیسانا ڕۆژهەلاتی و ئیسالە دكەفتە ڕۆژا 19/4/2023،كو ڕێورەسمێن وێ‌ ل پەرستگەها لالش و گوند و كۆمەلگەهێن ئێزدی دێ‌ ئێنە گێڕان.
ل دۆر ڕێورەسمێن جەژنا سەرسالێ‌ نڤیسكار(شێخ مەروان)بۆ دەنگێ‌ لالش دبێژت:ل گۆڕەی بیروباوەرێن مە ئێزدیان كەڤناتیا ڤێ‌ جەژنێ‌ دزڤرتە دەستپێكا ئافراندنا كنیاتێ‌ ئانكو ل ڕۆژا چارشەمبوویێ‌ ڕۆژا دروستبوونا دوونیایێ‌ یە ڕۆژا پژقینا دورێ‌ یە دورا خودێ‌ دور پژقی ئەرد و ئەسمان چیا دۆل نهال و زەڤی و دەشت ژێ‌ چێبوون،ئەرد خەملی كەسك و سۆر و زەر بوو ڕەنگا و ڕەنگ بوون،لەورا دەمێ‌ هیكێ‌ دكەلینن دناڤ ئاڤێ‌ دا هێكێ‌ ڕەنگا و ڕەنگ دكەن،هیك هێمایە ژبۆ جەبرینا وێ‌ جەبرینا ئەردێ‌ و پەیدابوونا گول و گیا ل سەر ڕوویێ‌ ئەردێ‌ .دبەردەوامیا ئاخفتنا خۆ دا گۆت:هژمارەكا ڕێورەسمان ل ڤێ‌ جەژنێ‌ دئێَنە گێڕان مینا ڕێورەسمێن هێڤارا جەژنێ‌ و ڕۆژا جەژنێ‌ ژ وان ژی هێڤارا وێ‌ ژ هەموو دەڤەرێن ئێزدیان قەستا پەرستگەها پیرۆزا لالش دكەن،ل پێشیێ‌ بابێ‌ شێخ و جۆقەتا وی ل گەل دەنگێ‌ دەف و شبابا و قەول و بەیت قەسیدا چرا ل سوكا مەعریفەتێ‌ ڤێدخن و خەلكێ‌ ئامادەبووی ژی وەك خێر ژ خوەرە هەلدكەن,سەما دئێتە كێشان ژلایێ‌ سەما كێشاڤە ل گوندان مجێورێن خاس و چاكان ل سەر دەرەچكێن وان چرا ڤێدخن،ل ڕۆژا جەژنێ‌ هەر مالەكا ئێزدی سەربرەكێ‌ سەر ژێدكەت ب خێرا تاووسی مەلەك و ئێزدی جەژنێ‌ ل هەڤ پیرۆز دكەن،جۆتیار هندەك هیكا دبەتە دناڤ دەخل و دانێ‌ خۆ ئەوان هیكان دشكینن قالكێن وان بەلاڤ دكەتە ناڤ دەخل و دانێ‌ خۆ ژبۆ خێر و بەرەكەتێ‌ ،خەلك ل گوندان قەستا مەزارێن خۆ دكەن لێ‌ تەواف دبن،هەروەسا چەندین یاری ژی دئێنە كرن،جوداهیا ڤێ‌ جەژنێ‌ دگەل جەژنێن دیتر ئەوە كو گرنگترین و كەڤنترین جەژنە پەیدابوونا وێ‌ دگەل پەیدابوونا دوونیایێ‌ یە ئەم دبێژن جەژنا تاووسی مەلەكە.
ژلایەكێ‌ دی ڤە(نەڤیا ئەسڤەر)بەحس ل ڕۆلێ‌ كابانیا مالێ‌ ك و بۆ دەنگێ‌ لالش گۆت:ل هەموو جەژن و هەلكەفتان كابانیا مالێ‌ ماندیبوونەكا درێژ دبەت ژبۆ گێڕانا ڕێورەسمێن جەژنا سەرێ‌ سالێ‌ ،كابانی ڕۆلەكێ‌ مەزن دبە دڕێڤەبرنا ڕیۆرەسمێن جەژنان دا جەژنا سەرێ‌ سالێ‌ دناڤ مالێ‌ دا دچاخ و وەختێن بەرێ‌ دا كابانیا مالێ‌ پێش چەند ڕۆژان هیكا كۆم دكەن و سەوكا چێدكەن ل سەر ئێك و دوو بەلاڤ دكەن ودكەلینن و ڕەنگا و ڕەنگ دكەن،شریناهیا دگەل هندەك هیكا دگەل خۆ دبەنە گۆڕستانێ‌ ‌ ب خێرا مریێن خۆ ددەن ل ڕۆژا جەژنێ‌ دگەل هەلاتنا ڕۆژێ‌ هندەك كولیلكێن نیسانێ‌ دگەل تایێن بێناڤێ‌ و قالكێن هیكا ب دەرگەهێن مالێ‌ ڤە دكەت.
مللەتێ‌ ئێزدی هەر ژ كەڤن دا هژمارەكا جەژن و هەلكەفتان هەنە،پتریا وان ب سرووشتی ڤە دگرێدایی نە،جەژنا سەرێ‌ سالێ‌ كو ئێك ژ وان جەژنایە دبتە دەستپێكا سالا نوو،هەروەسا ئێزدی گەلەك ڕێز و بەهایی و پیرۆزیێ‌ ددەنە ڤێ‌ مەهێ‌ ژبەر هندێ‌ دڤێ‌ مەهێ‌ دا ژنا ناینن،چنكو نیسان ب خۆ بووكا سالێیە و ب جوانترین ڕەنگ و خەملا یەخەملاندییە و چوو بووكا د سەر خۆڕا نابینت،دیسان دڤێ‌ مەهێ‌ دا ئێزدی ئەردی ناكۆلن و جۆتی ناكەن.

تُتاح هذه الصورة أيضا في: کوردی

مقالات ذات صله

الرد

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

Copyright © 2021 by Lalish Media Network .   Developed by Ayman qaidi