سەرۆكێ لیژنا كۆچ وكۆچبەران:پێتڤیە بەغدا هاریكاریا ئاوارەیێن شنگال بكەت
تۆرا لالش:
سەرۆكێ لیژنا كۆچ وكۆچبەران ل پەرلەمانێ ئاشكەراكر،مەترسیەكا مەزن هەیە ل داویا ئیسالە ژبەر خۆڤەكێشانا ڕێكخراوان ژ عێراقێ و مانا ئاواران ل هەرێما كوردستانێ هەیە،بارگرانیەكا گەلەكا مەزن ل سەر حكومەتا هەرێمێ دروست ببت و پێتڤیە بەغدا بێدەنگ نەمینت هەڤكاریا ئاوارەیێن شنگالێ ل كەمپان بكەت.
شەریف سلێمان،سەرۆكێ لیژنا كۆچ وكۆچبەران ل پەرلەمانێ عێراقێ بۆ دەنگێ لالش خویاكر،رێكخراوێن خێرخوازی یێ خۆ ژ عێراقێ ڤەدكێشن هندەك ڕێكخراو نەماینە چۆینە ئۆكرانیا و دەولەتێن بیانی ل داویا ئیسالە ژی ئەو ڕێكخراوێن كارێن خێرخوازی دكەن نامینن دێ خۆ ژ عێراقێ ڤەكێشن،لەورا ژی مە داخواز كریە حكومەتا عێراقێ وێ ڤالاتیێ پر بكەت ژبەركو هەتا نۆكە ئاوارێن عێراقێ ل هەرێما كوردستانێ ماینە،ڕێكخراو و حكومەتا هەرێما كوردستانێ هەڤكاری و پشتەڤانی یا ئاواران دكەن دەمێ ڕێكخراو نەمینن دێ بارگرانیەكا گەلەك مەزن ل سەر حكومەتا هەرێما كوردستانێ دروست بت،پێتڤیە حكومەتا عێراقێ بێدەنگ نەمینت هەڤكاریا ئاواران بكەت دهەموو بواراندا.
هەروەسا دوپاتكر،د حكومەتا سوودانی دا گەلەك رژدی ل سەر كەیسا شنگال هاتیە كرن ژوانژی زڤرینا ئاواران بۆ سەر جیێن وان،د كارنامەیا حكومەتا سوودانی ژی دا رژدی ل سەر بجهـئینانا ڕێككەفتنا شنگالێ هاتیەكرن و نۆكە سوودانی یێ پێگیرە ڕێككەفتنا شنگال بێختە د واری بجهـ ئینانێ دا و رەوشا شنگال خۆش بكەت و ئاوارە بزڤرنە سەر جی و مالێن خۆ ڤە.
پیر دەیان،رێڤەبەرێ كۆچ وكۆچبەران وبەرسڤدانا قەیرانا ل پارێزگەها دهۆكێ بۆ دەنگێ لالش گۆت: ل دەمێ ل رۆژا 16/11/2022ێ سەرۆك كۆمارێ عێراقێ سەرەدانا كەمپا شاریا یا ئاوارێن شنگال ل پارێزگەها دهۆكێ كری دەزگەهێ خێرخوازی یێ بارزانی رۆنكرنەك دایە و ل سەر خۆڤەكێشانا ڕێكخراوێن خێرخوازی ژی بابەت هاتیە بەحسكرن، داخواز هاتە كرن عێراق هەڤكاریا ئاواران بكەت و دەزگەهێ خێرخوازیێ بارزانی چەندین داخوازی ئاراستەی سەرۆك كۆماری كرن ژوانژی داخواز هاتەكرن ڕێككەفتنا شنگال بكەفتە د واری بجهئینانێ دا و كەسێن چەكدار د ناڤ شنگالدا نەمینن و پۆلیسێن فیدرال ل وێ دەڤەرێ بن،ب ڤێ چەندێ دێ ئاوارە ڤەگەرنە سەر جهـ و مالێ خۆ و هەتا نۆكە نیڤ ملیۆن ئاوارە ل دهۆك ماینە نكارن ڤەگەرنە سەر مال و حالێ خۆ.
پشتی هاتیە ڕاگەهاندن كو ڕێكخراوێن مرۆڤی دێ خۆ ل كەمێن ئاوارەیان و ب تایبەت ل پارێزگەها دهۆكێ ڤەكێشن،ڤێ چەندێ ئاوارەیێن شنگال دلگران كرینە و دخوازن هاریكاریێن مرۆڤی ل سەر وان نەئێنە قوتكرن و دبەردەوام بن.
تُتاح هذه الصورة أيضا في: کوردی
