ئایار 18, 2024

Lalish Media Network

صحيفة إلكترونية يومية تصدر باشراف الهيئة العليا لمركز لالش الثقافي والاجتماعي في دهوك - كوردستان العراق

كۆچكرنا ئێزدیان بۆ دەرڤەی وەلاتی بەرەف زێدەبوونێ‌ یە

كۆچكرنا ئێزدیان بۆ دەرڤەی وەلاتی بەرەف زێدەبوونێ‌ یە
تۆرا لالش:
پشتی جینۆسایدا بسەرێ‌ ئێزدیان هاتی ل شنگالێ‌ تەباخا 2014ێ‌ و ب ئەگەرێن جودا جودا گەنجێن ئێزدی ب خێزان ڤە ب تایبەت خەلكێ‌ شنگالێ‌ دەست ب كۆچكرنێ‌ كر بۆ دەرڤەی وەلاتی،نۆكە ژی كۆچكرنا گەنجان بەرەف زێدەبوونێ‌ یە.

عەلی عیسا،ئاوارەیەكێ‌ خەلكێ‌ شنگالێ‌ یە ل كەمپا ئێسیا بۆ رۆژناما دەنگێ‌ لالش دبێژت:دیاردا كۆچكرنا گەنجێن ئێزدی ژبۆ ژدەرڤەی وەلاتی نە دیاردەیەكا نوویە لێ‌ پشتی جینۆسایدا بسەرێ‌ ئێزدیان دا هاتی ل تەباخا 2014ێ‌ لسەر دەستێ‌ دڕەندەترین هۆڤێن چەرخێ‌ بیست و ئێكێ‌ و پشتی چەند ساڵێن ئاوارەبوونێ‌ و بێ‌ كو ب هیچ رەنگەكی پێنگاڤەك بێتە هاڤێتن ژبۆ خۆشكرنا پاشەڕۆژا وان، هەروەسا ژبەر نەبوونا ئێمناهیێ‌ و هێزەكا فەرمی و كێمیا خزمەتگۆزاریان ل دەڤەرا شنگال وبێ‌ هیڤیبوونا ئێزدیان ژ دەستهەلاتێن عێراقێ‌ ئاوارەیێن ئێزدی یێن ل كەمپان ئاكنجی بێ‌ هیڤی بووینە ژ ڤەگەریانا جیێن خۆ و دەست ژ ئاخ و جیێ‌ باب و كالێن خۆ بەرددەن و كۆچبەری وەلاتێن بیانی دبن و ژیانا وان بەرەف وندابوونێ‌ و نەمانێ‌ ڤە دچت ل وان وەلاتان، هێدی هێدی گەنجێن ئێزدی ئاخا خۆ یێ‌ بجهـ دهێلن و قەست دكەنە كۆچكرنێ‌ بەرەف وەلاتێن ئەورۆپا و ئەمریكا و ئوسترالیا،و ب سەدەمێ‌ دەركەفتنا گەنجێن ئێزدی جڤاك دكەفتە دبن هندەك پێلێن دژوار و بهێز یێن ب زەحمەت و خەمگینیێ‌‌ دا،ژبەركو بیێ‌ بەهر دبت ژ شیان و هێزا گەنجان دگەل زێدەبوونا ڤێ‌‌ دیاردێ‌ جڤاكا ئێزدی بتر خەمگین دبە، بێگومان ئەڤ چەندە ژی وەسا بۆ مە دیار دكت كو مەترسیەك لەسەر نەمانە ئێزدیان هەیە ل عێراقێ‌ ،ژبەركو دەمێ‌ هەر مللەتەكی ئاخ و جوگرافیەت و زمانێ‌ خۆ بجهـ هێلان ئەو مللەت وێ‌ هێدی هێدی بەرەف كێم بوون ونەمانێ‌ ڤە چت.
مامۆستا خدر موراد بۆ رۆژناما دەنگێ‌ لالش دیاركر،كۆچبەری ئێكە ژ دیاردێن مەترسیدار ل ناڤ جڤاك و كۆمەلگەهێ‌‌ دا كو دبتە خالەكا ئاستەنگ ونەرێنی و كارتێكرن لسەر گهۆرینا هاوكێشێن پاراستن و مەزنكرن و پێشكەفتنا جڤاكی،كۆچكرنا گەنجێن ئێزدی ڤەدگەرت ژبۆ گەلەك ئەگەران ژ فرمان و جینۆساید وبارودۆخێن سەخت و دژوار و نەخۆشی و گرنگی پێنەدان و پاشگۆهاڤێتنا گەنجان و نەبوونا دەلیڤێن كاری و خزمەتگۆزاریان و هەڤركی و ململانێن سیاسی ل دەڤەرێن وان،هەروەسا ئاوارەبوون و دەربەدەریا ب هەزاران ژ مللەتێ‌ ئێزدی ب مخابنی ڤە ئەڤە ماوێ‌‌ هەفت سالانە ئاوارێن ئێزدی ژیانا خۆ ل بن خیڤەتێن ئاوارەبوونێ‌‌ دا دبۆرینن و ل رەوشەكا سەخت و دژوار و نەخۆش و ژیانەكا گەلەك زەحمەت دا دژین و چ ماف بۆ وان نەهاتیە دابینكرن چ ژلایێ‌ حكومەتا عێراقێ‌ و چ ژلایێ‌ رێكخراوێن مافێ‌ مرۆڤی ڤە، سەرەرای ڤان نەخۆشیان رێژەیەكا زۆر ژ گەنجان د بێكارن و هندەك ژی خودان باوەرنامێن باشن و كەسێن زانستی نە،لێ‌‌ ب مخابنی ڤە پووتە پێ‌‌ نائێتە دان ناچار دبن كۆچبەر ببن داكو ژیانەكا باشتر بۆ خۆ پەیدا بكن.
رۆژنامەڤان دیاب غانم بۆ رۆژناما دەنگێ‌ لالش گۆت:ئێزدی وەك ئاین و وەك جڤاك ل گەلەك كاودانێن نەخۆش ڕا دەرباز بووینە و گەلەك دگەشبینن و ل بەندا وێ‌ چەندێ‌ نە چارەسەری ژ ئاریشەیێن وان را بێنە دیتن،لێ‌ ل راستی دا وەكو پێتڤی چ ژ ئێزدیان را نەهاتیەكرن وئەو ئاریشێن بەریا هەفت سالا دوەكی خۆنە ژبەر هندێ‌ تاكێ‌ ئێزدی بێزار بوویە نەدكارت ل كەمپا دا ژیانێ‌ ببەتە سەر و نە ژی گوند و وارێن وان ل شنگالێ‌ تێنە چێكرن و خزمەتگۆزاری بەردەست دبن،ژلایەكێ‌ دی ڤە توندرەوی ل عێراقێ‌ بەرب زێدەبوونێ‌ یە وبتر بەرب ئالیێ‌ ئاینی یە و هندەك ژێ‌ ئێزدیان ب چاڤەكێ‌ دی دبینن ئەڤجا ڤێ‌ چەندێ‌ مەترسیەك ل دلێ‌ تاكێ‌ ئێزدی دا چێكریە كو هزرا كۆچكرنێ‌ ب رێیێن جودا جودا و ئەڤ رێ‌ هەموو ژی دوو هەلبژارتن تێدانە یان ژیان ب ئازادی یان مرن،هەروەسا ڤەكێشانا هێزێن ئەمریكا ژ ئەفغانستانێ‌ و كەفتنا وی وەلاتی د دەستێن تالیبان دا گۆمانەكا دی ئێخستە دلێ‌ تاكێ‌ ئێزدی و ژێرا چەسپاند كو ل هەر وەختی چێدبت هێرش ل سەر وان هەبن،ژبەركو ئەوان تێستەك ژ دەستێ‌ داعشێ‌ دیتیە و هەتا نۆكە ب دەهان ئێزدی ل دەستێ‌ تیرۆرستێن داعشێ‌ دا ماینە و هێشتا چارەنڤیسێ وان نەهاتیە ئاشكەراكرن.
ژبال خۆڤە ئابووریناس مەیسەر بەرەكات بۆ رۆژناما دەنگێ‌ لالش خویاكر،دیارە ژبەر سەختیا ژیانێ‌‌ و نەئارامیێ‌ ل دەڤەرێن ئێزدیان ب تایبەتی ل شنگالێ‌‌ و نەبوونا هیچ خزمەتگۆزاریەكێ‌‌ ودەلیڤێن كاری ل دەڤەرێ‌‌ و نەبوونا ژێدەرەكێ‌‌ دارایی و پلانێن ستراتیژی بۆ ئاڤاكرنا شنگالێ‌ وڤەگەریانا ژیانێ‌ ل دەڤەرێ‌ و زێدەبوونا پێلێن دژوار یێن برسێ‌‌ و هەژاریێ‌،ئەڤ چەندە بوویە ئەگەرێ‌ پەیدابوونا ئاریشێن جڤاكی و پەیدابوونا كۆچبەریێ‌ بەرەف وەلاتێن جیهانێ‌ ب رێیێن نەیاسایی و ب زەحمەت.

تُتاح هذه الصورة أيضا في: کوردی

مقالات ذات صله

الرد

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

Copyright © 2021 by Lalish Media Network .   Developed by Ayman qaidi