تۆرا لالش
ب هەلکەفتا سالڕۆژا دامەزراندنا بنگەهێ لالش تایێ باعەدرێ کو د رۆژەکا وەکا ئیرۆ دا بەری بیست سالان ب پشتەڤانیا حکومەتا هەرێما کوردستانێ هاتبوو دامەزراندن، ئیرۆ رۆژا دوو شەمبوویێ رێکەفتی (14 / 7 / 2025) بنگەهێ لالش تایێ باعەدرێ رابوو ب سازکرنا سمینارەکێ بۆ رێڤەبەرێ ئامادەیا باعەدرێ م.خلات باعەدری ل دۆر بابەتێ (پەروەردە و فێرکرن ل باعەدرێ دناڤبەرا دوهی و ئیرۆ دا) ل باخچێ هۆلا باعەدرێ یا بیرەوەریا.
ڕێ و رەسمێن سمینارێ ب رێڤەچوون ب ئامادەبوونا به‌رێزان سەرۆکێ دەستەیا بلندا بنگەهێ لالش ڕێزدار سه‌عید جردۆ و بەرپرسێ لیژنا ناوچا باعەدرێ یا PDK نه‌جیم ئه‌لیاس و ئەنجومەنێ مالا میران و کەسایەتیێن رەوشنبیری و پەروەردەیی و ئۆلی و جڤاکی و تەخ و پێکهاتێن جودا یێن باعەدرێ و دەڤەرێ.
پشتی چەندەکێ وەک رێزگرتن بۆ شەهیدێن بزاڤا ڕزگاری خوازا گەلێ کورد سەرکێشێ وان بارزانیێ نەمر، ڕێ و رەسمێن سمینارێ دەستپێکرن.
ل دەستپێکێ سمیناربێژی بەحسا باعەدرێ کر وەکو زاراڤ و تێگەهێ پەیڤێ و رامانا ناڤی و بۆچوون ئینانا زمان، پاشی کورتیەکا دیرۆکی ل سەر باعەدرێ و قۆناغێن تێدا دەربازی و ئەو هێرشێن هاتینە سەر باعەدرێ دانە رۆنکرن و بەحسکرن، پاشان رۆناهی ئێخستە سەر باعەدرێ ژلایێ خزمەتگوزاری و شینواری و خەباتا سیاسی و پێکهاتێن خەلکێ باعەدرێ.
د تەوەرێ دیتر سمیناربێژی بەحسا دیرۆکا پەیدابوونا خواندن و فێرکرنێ ل باعەدرێ و مامۆستا و قوتابیێن پشکدار د وان سالان دا، هەروەها رۆناهی ئێخستە سەر سەدەمێن ڤەبوون و گرتنە قۆتابخانا میللی ل باعەدرێ، دیسان ئاماژە دا سال و جهێ دروست یێن ڤەبوونا قۆتابخانێ ب شێوەیەکی فەرمی و ستافێ رێڤەبەر و قوتابیان دگەل بەحسکرنا قۆناغێن جودا جودا یێن خواندنێ ل باعەدرێ ب درێژاهیا چەندین سالان، ئەڤە و چەندین رۆنکرن و زانیاری ل دۆر بابەتێ سمینارێ تەڤلی گۆتنێن خۆ کرن کو سمینار پتر زەنگین و دەولەمەند کر.
ل داویێ دان و ستاندنەکا گەرم لدۆر بابەتی دناڤبەرا سمیناربێژی و ئامادەبوویان ب چەندین پرسیار و رۆنکرنان دروست بوو کو هێڤاریا سالیادێ پتر ب ڕەوش و خەملتر کر.
تُتاح هذه الصورة أيضا في: کوردی
