بادین ئیدریس حەسۆ یێ ناڤدار ب شێرێ کوردستانێ، ل هه‌فتيا بێت ل وه‌ڵاتێ ئەڵبانیا دێ یاریەكا گرنگ یا بۆكسینگێ ئەنجام دەت.

ئیدریس حەسۆ، بابێ بادينى بۆ تۆرا لالش دبێژت: ل ڕۆژا ئێک شەمبوویێ 23-11-2025، ل باژێرێ تیرانا پایتەختا وەڵاتێ ئەڵابانیا ژبۆ یاریەکا نێڤده‌وڵه‌تى یا بۆکسینگێ، یاریزانێ ژێهاتی خودانێ قەهرەمانی و ناسناما دوو کێشوەرا ئاسیا و ئەورۆپا بادین حەسۆ یێ ناڤدار ب شێرێ کوردستانێ دێ ل سەر ناسنامەکا نێڤدەوڵەتی یا مەزن یاریەکێ ئەنجامدەت.

گۆتژى: هیڤیدارين شێرێ کوردستانێ د ئەرکێ خۆ دا سەرکەفتى بت، پێخەمەت خۆ ئامادەکرن ژ بۆ قەهرەمانیا جیهانی ل دەمەکێ نێزیک.

بادينێ 31 سالى به‌رده‌وامه‌ ل سه‌ر سه‌ركه‌فتنێن خۆ د گۆره‌پانێن بۆكسينگا جيهانى دا، كو چه‌ندين سه‌ركه‌فتنێن لدووڤ ئێك ئيناينه‌ و بوويه‌ ئێك ژ ڕێزبه‌ندين ليستا بوكسڤانێن ديار ل سه‌ر ئاستێ ئه‌ورۆپا.

هه‌روه‌سا بادينى پشكدارى ل هه‌موو قه‌هره‌مانيێن جيهانى دا كريه‌ و ئاڵايێ كوردستانێ بڵندكريه‌.

ناڤبرى خه‌ڵكێ كۆمه‌ڵگه‌ها شاريا يه‌ و ل ده‌مێ زارۆك خێزانا وى كۆچبه‌رى وه‌ڵاتى ئه‌ڵمانيا بوون، ل وێده‌رێ ده‌ست ب كاروانێ خۆ ل گه‌ڵ بۆكسينگێ كر و تانوكه‌ چه‌ندين يارى ل سه‌ر ئاستێ ئه‌ڵمانيا ئه‌نجامداينه‌ و سه‌ركه‌فتن د هه‌موويان دا ئينايه‌.