ئيڕۆ دووشه‌مبوويێ، 17ـى چريا دووێ 2025، ل په‌رستگه‌ها لالش مير حازم ته‌حسين به‌گ، ميرێ ئێزديان ل كوردستان، عێراق و جيهانێ پێشوازى ل باڵيۆزێ ئيتاليا ل عێراقێ و شاندێ دگه‌ڵدا كر.

نيكولو فونتانا، باڵيۆزێ ئيتاليا ل عێراقێ و كونسولێ گشتيێ ئيتاليا ل هه‌ولێرێ، ژلايێ ميرێ ئێزديان و زه‌لامێن ئۆلى و كه‌سايه‌تيێن جڤاكى ڤه‌ هاتنه‌ پێشوازيكرن.

لوقمان سلێمان، به‌رپرسێ ڕاگه‌هاندنا په‌رستگه‌ها لالش، بۆ سه‌ما دياركر، د ڕوونشتنێ دا میرێ ئێزدیان و باڵيۆزێ ئيتاليا، ڕه‌وشا ئێزدیان و ب تایبه‌تی یا شنگالێ و ژیانا ناڵه‌بار یا ئاواران دناڤ خیڤه‌تان دا و ڕه‌ڤانديێن دناڤ ده‌ستێ تیرۆرستێن داعشێ دا ماين گوتۆبێژكرن.

وه‌كو به‌رپرسێ ڕاگه‌هاندنا په‌رستگه‌ها لالش گۆتى: ميرێ ئێزديان داخواز ل حكومه‌تا ئیتالیا كر دگه‌ڵ هه‌ردوو حكومه‌تێن هه‌رێما كوردستانێ و عێراقێ هاریكاربن بۆ چاره‌سه‌ركرنا كێشه‌یێن ئێزدیان.

گۆتژى: پاشان شاندى گه‌ريانه‌ك دناڤ هندورێ په‌رستگه‌ها لالش دا كر و ژ نێزيك ڤه‌ زانيارى ل سه‌ر ڕێوره‌سمێن ئۆلى و جڤاكى يێن ل په‌رستگه‌هێ دئێنه‌ گێڕان وه‌رگرتن

ئه‌ڤ سه‌ره‌دان گرنگن بۆ نيشاندانا جيهانێ كو ئێزدى پێكهاته‌كا گرنگ يا مرۆڤايه‌تيێ نه‌ و هشياركرنا جيهانێ بۆ جينۆسايدا ب سه‌رێ ئێزديان دا هاتى ل سه‌ر ده‌ستێ داعشێ و ناساندنا باوه‌رى و چاندا ئێزديان، بده‌ستڤه‌ئينانا پشتگيريا نێڤده‌وڵه‌تى و ڕێگريكرن ل دووباره‌بوونا كۆمكوژيێن ل دژى ئێزديان.