تۆرا لالش
ل بنگه‌هێ لالش ل دهۆكێ دانوستاندنه‌كا ڤه‌كرى ل دۆر (فه‌رزێن حه‌قیقه‌تێ و گرنگیا وان د ئێزدیاتیێ ده) هاته سازكرن، نڤيسكار ژى دبێژت: ئه‌ڤ فه‌رزنه ئۆل و ئه‌ركان و ڕه‌هــ و ڕیشالێن ئێزدیاتیێ دده‌نه دیاركرن.
ئێڤارييا ئيڕۆ پێنج شه‌مبوويێ، 10ى ته‌موزا 2025، بنگه‌هێ لالش ل دهۆكێ دانوستاندنه‌كا ڤه‌كرى ل دۆر (فه‌رزێن حه‌قیقه‌تێ و گرنگیا وان د ئێزدیاتیێ ده) بۆ نڤيسه‌ر پير خه‌لات ئه‌لياس ڕێكخست، ب ئاماده‌بوونا كۆمه‌كا ئه‌كادیمی، كه‌سايه‌تى و ڕه‌وشه‌نبيران.
ل به‌راهيێ نڤيسه‌رى ب تێر و ته‌سه‌ڵى به‌حسێ بابه‌تى كر و گۆت: فه‌رزێن حه‌قیقه‌تی ب حه‌قیقه‌ت فه‌رزێن مه ئێزدیانه و ئۆل و ئه‌ركان و ڕه‌هــ و ڕیشالێن ئێزدیاتیێ د ده‌نه دیاركرن و ڕێیا ڕاست یا تاكێ ئێزدی و خودانێ خۆ و فه‌رز و ئه‌ركانێن خۆ ب ناست بۆ ڕێیا خودێ، له‌وما ژ فه‌رزێن حه‌قیقه‌تێ دئێته ناسین كو پیر و ناسناڤێ پیراتیێ و قۆناغا پیراتی تێدا ده‌ربازبووی، هه‌روه‌سا مرید و ناسناڤێ مریدان و قۆناغا تێدا ده‌ربازبووین و شێخ و ناسناڤێ شێخانیێ و قۆناغا تێدا ده‌ربازبووی دیاركرن.
ژلايه‌كێ دى ڤه، پیر خه‌لات به‌حسێ هۆستا و مه‌ره‌بی و یار و برایێن ئاخره‌تێ كر و دیاركر، هۆستا و مه‌ره‌بی ئانكو شیره‌تكار یانژی مامۆستا، هه‌روه‌سا یار و برایێ ئاخره‌تێ و ئێزدیاتی فه‌لسه‌فه‌كا كه‌ڤناره و بژوون و پاقژه، ئه‌ڤه‌ژی د ئێزدیاتیێ دا دیاربت كا ئێزدی چه‌ند ئۆل و ئه‌ركانێن خۆ ب باوه‌ری بجهـ دئینن.
لدووڤدا، ئاماده‌بوويان ب پرسيارێن خۆ بابەت پتر دەولەمەندکرن و نڤيسه‌رى هه‌موو پرسيار به‌رسڤدان.
ل هه‌موو ڕۆژێن پێنج شه‌مبا ل بنگه‌هێ لالش ل دهۆكێ، دانوستاندنه‌كا ڤه‌كرى ل دۆر مژارێن جودا جودا ده‌رباره‌ى ڕه‌وشا ئێزديان بۆ ڕه‌وشه‌نبيران ڕێكدئێخت.
دڤێ دانوستاندنێ دا ئاماده‌بوويى گه‌نگه‌شێ ل سه‌ر مژارێن گرنگ يێن گرێدايى ب ڕه‌وشا ئێزديان ڤه دكه‌ن و ڕاسپارده‌يان ئاراسته‌ى بنگه‌هێ لالش دكه‌ن.
تُتاح هذه الصورة أيضا في: کوردی
