قوتانا زارۆيان ڤێ كاره‌ساتێ په‌یدا دكه‌ت
نوش نیوز:
رۆژانه ژ لایێ چه‌ند دایك و بابان ڤه د هه‌ر ماله‌كێ دا زارۆ دهێنه قوتان ده‌ما زارۆ تووشى خرابى و شاشیه‌كێ دبیت و چاره‌سه‌ركاره‌كێ ده‌روونى د وارێ زارۆيان دا خرابیێن قوتانا زارۆى دیار دكه‌ت.
سه‌روه‌ر عه‌بدولجه‌بار چاره‌سه‌ركارێ ده‌روونى و قوتابیێ ماسته‌رێ د وارێ ده‌روونى دا بۆ نوش نیوز دا دیاركرن سه‌ره‌ده‌ریا ل گه‌ل زارۆيان هند یا گرنگه مرۆڤ ب كورتى نه‌شێت باس بكه‌ت لێ نه‌خوشبه‌ختانه‌یه نها دا ئه‌و سه‌ره‌ده‌ریا ل گه‌ل زارۆيان دهێته كرن ژ هه‌ژى زارۆى نینه، چونكه گه‌له‌ك دایك و باب نه‌شیاینه سنوران بۆ زارۆيێن خوه ب رێيێن سه‌رده‌م بدانين مینا ده‌مێ خوارنێ و نڤستنێ و ئه‌نجامدانا یاریان و گۆتژى: “زۆربه‌یا دایك و بابان ئێك ئاخفتن نینن ل گه‌ل زارۆيان بۆ نمونه دایكه‌ك دێ بێژیتێ هه‌ره بنڤه باب دێ بێژیتێ نه‌خێر ده‌مێ ئاخفتنێ نینه بلا بمینیت هشیار له‌ورا ئه‌ڤ چه‌نده كارتێكرنه‌كا مه‌زن ل سه‌ر كه‌سایه‌تیا زارۆى دروست دكه‌ت”.
چاره‌سه‌ركارێ ده‌روونى و قوتابێ ماسته‌رێ د وارێ ده‌روونى دا ئه‌و چه‌نده ژى دیاركر گه‌له‌ك دایك و باب رۆژانه زارۆيێن خوه د قوتن و ئه‌ڤ چه‌نده كاره‌ساته‌كا مه‌زنه و گۆت: “ئه‌و قوتانا زارۆى دێ بیته ئه‌گه‌ر زارۆ هێدى هێدى توندره‌ۆ بیت چونكه ل مال یێ قوتانێ دخوت و ل گه‌ل هه‌ڤالان ل سه‌ر جاددێ دبیت بهێته قوتان و ل قوتابخانێ ژى دبیت هه‌ڤالێن وى ب قوتن، له‌ورا ده‌ما زارۆ قوتانێ دخوت ئه‌و نه‌چاره وێ قوتانێ وه‌ك تولڤه‌كرن ل كاره‌كێ دیتر دا ده‌ربێخیت ئه‌ڤجا ب چ كار بیت دێ هه‌ر كاره‌كێ خراب بیت”.
ناڤبرى ئه‌و چه‌نده ژى نه‌ڤه‌شارت كو پتریا وان زارۆكێن دژیێ زارۆكینیێ دا هاتینه قوتان ده‌ما مه‌زن بووین بووینه كه‌سێن دژى جڤاكى و دژى قانوونێ و كوشتن و دزى كرینه و ئه‌ڤ چه‌نده هه‌موو ده‌رئه‌نجامێ وێ قوتانێ یه ئه‌وا دایك و بابان د ژیێ زارۆینیێ دا زارۆ ئێشاندى، له‌ورا هیڤیه هه‌موو دایك و باب هه‌ر شاشیه‌كا زارۆيێ وان كر بلا ب ئارامى ب ئاخفتن ڤه بۆ دیار كه‌ن و بێژنێ (كورێ من، كچا من: ئه‌و كارێ ته ئه‌نجام داى یێ دروست نه‌بوو بلا دوباره نه‌بیته ڤه چونكو كاره‌ك خرابه) و ب ئه‌ڤێ ره‌فتارێ زارۆ دێ دوور بیت ژ وێ خرابیا وى ئه‌نجام داى”.
تُتاح هذه الصورة أيضا في: العربية
