May 21, 2019

Lalish Media Network

صحيفة إلكترونية يومية تصدر باشراف الهيئة العليا لمركز لالش الثقافي والاجتماعي في دهوك - كوردستان العراق

Kurdên Êzidî di cejna Çarşema Sor de çi dikin?

Kurdên Êzidî di cejna Çarşema Sor de çi dikin?

Duhok (Rûdaw) Êvara roja sêşemê Kurdên Êzidî xwe ji Çarşema Sor re amade dikin û diçin Perestgeha Lalişê û 366 mûm û çirayan hil dikin û bi çendîn rêwresman pêşwazî li vê cejna xwe ya olî dikin.

Her malbateke Kurdên Êzidî sibehî zû berî hilhatina rojê ji xewê radibin û gulên sor li ser derezûnkên mala xwe didin. Herwiha rengkirina hêkên kelandî û paşê jî reşandina wê di nav dexl û dan û erdên çandiniyê de beşek din ji wan rêwreman e.

Kurdên Êzidî herwiha di Çarşema Sor de nanê biron û kuncî amade dikin û li ser xelkê xizan de belav dikin.

Jineke Kurd a Êzidî Xezal Silêman ku hêkên xwe bi reng dike, dibêje ku bihar hatiye û cejn e, ew jî ji ber vê yekê şahî dikin.

Piştî rengkirina hêkan, zilam qalikên hêkan direşînin ser dexl û dan û erdên xwe yên çandiyê, daku bibe xêr û bereketa salê.

Şêxekî Kurdên Êzidî, Şêx Îsmaîl Mîrzo diyar dike ku debara wan li ser wê dexl û danê ye û ew dixwazin bi vê reşandina qalikên hêkan, Xweda xêr û bereketê têxe nav dexl û danên wan.

Keç û kur di Çarşema Sor de diçin cem kulîlkên nîsanê, ku ev nîşana cejnê ye. Meha Nîsanê li gor baweriya Kurdên Êzidî bûka salê ye.

Xortekî Kurd ê Êzidî Aryan Newzad diyar dike ku her sal di Çarşema Sor de kulîlkan berhev dikin û dibêje: “Ev kulîlk nîşaneya cejna me ye, ev adet ji bav û bapîrên me ji me re maye.”

Kurdên Êzidî di cejnê de qalikê hêkan û kulîlkên sor li ber deriyên malên xwe dadiliqînîn. Keç û kurên Êzidî bi ava Kaniya Spî têne pîrozkirin.

Li gor baweriya Kurdên Êzidî zevî di roja çarşemê de hatiye çêkirin. 366 rojên sala Kurdên Êzidî hene û evara Çarşema Sor 366 çira li Lalişê têne vêxistin.

Ji Cejna Çarşema Sor re hinek caran dibêjin Cejna Serê Salê jî.

Related posts

Leave a Reply

Your email address will not be published. Required fields are marked *

Copyright © 2018 by Lalish Media Network .   Developed by Ayman Qaidi.