Herêma Kurdistanê pêşwaziyê li sala nû dike

Hewlêr (Rûdaw) – Herêma Kurdistanê pêşwaziyê li sala nû dike û taybet jî li Hewlêra paytext ahengên bo sersalê birêve diçin ku hejmareke zêde ya xelkê beşdariyê tê de dikin.

Li bajarên Herêma Kurdistanê aheng û merasîmên bo pîrozbahiyên pêşwazîkirina sala 2020an birêve diçin. Taybet jî li Hewlêra paytexta Herêma Kurdistanê şeqam, park û cihên giştî bi boneya sersalê hatine xemilandin.

Hewlêr îsal ji salên berê zêdetir hatiye xemlandin û hejmareke zêde ya xelkê li derdora Keleha Hewlêrê kom bûne û bi aheng û pîrozbahiyan pêşwaziyê li sala nû dikin.

Herwiha hejmareke zêde ya xelkê ji welatên derdor û bajarên başur û naverasta Iraqê jî berê xwe dane Hewlêrê û li paytexta Herêma Kurdistanê pêşwaziyê li sala nû dikin.

Li gor amarên ku qeymeqamtiya qezaya navendî ya Hewlêrê belav kirine, bi boneya sersalê zêdetirî 64 hezar geştyaran berê xwe dane Hewlêrê.

Herwiha qeymaqamiya qezaya Hewlêrê ragihandiye di warê emnî û hêsankirina hatinûçûnê de di rojên serê salê de, hemû amadekarî hatine kirin.