Li Reqayê gencek bi çêkirina qehweyê li ser qûma germkirî bûye kesekî navdar

Hewlêr (Rûdaw) – Li qada Neîm li nav bajarê Reqayê ku niha beşek ji rêveberiya xweser a Bakurê Rojhilatê Sûriyê ye, gencek qehweyê bi cizwên sifir li ser qûma germkirî çêdike.

Umer ji ber çêkirina wê corê taybet ê qehweyê, li Reqayê bûye kesekî naskirî û xelk bi şevê berê xwe didin qada Neîm û li ba Umer qehweya qûmê vedixun.

Umer wiha xwe û karê xwe dide naskirin: “Ez Umer im ji parêzgeha Reqayê me, ez qehwê li ser qûma gerimkirî çêdikim, ez cizwê sifir ê Tirkî bikar tînim. Dema me destpê kir, me tenê qehwe pêşkêş dikir, niha em qehwê, qehweya bi şîr û kapitşîno û Çayê jî pêşkêş dikin.”

Umer yekem kes e ku li Reqayê qehweya li ser qûma germkirî çêdike, di destpêkê de serdankerên wî kêm bûn, lê piştre meraqdarên qehweya qûma germkirî zêde bûn û niha Umer û qehweya xwe li Reqayê deng vedane.

Ew gencê Reqayî dibêje: “Hijmareke zêde ya xelkê dipirsin, gelo çi cudahî di navbera qehweya çêkirî li ser qûma gerimkirî û qehweya li ser gazê çêdibe heye? Tişta ku qehweya çêkirî li ser qûma gerimkirî ji ya din cuda dike, ew e ku ya qûmê hêdî hêdî çêdibe, û qehwe naşewite wek ya ku li ser gazê çêdibe.”

Qada Neîm li Reqayê di dema DAIŞê de bibû cihê kiryarên êşkencedanê û kuştinê, lewra bi navê qada Cehîm-dojehê hatibû naskirin, lê piştî kontrolkirina bajar ji aliyê HSDê ve bi piştevaniya Hevpeymaniya Navdewletî di Cotmeha 2017ê de, proseya jinûavakirinê ji aliyê encûmena sivîl a ser bi Rêveberiya Xweser ve bi alîkariya Fransayê li bajê dest pê kir.

Jibo jinûavakirina bajêr 82 milyon euro hatiye terxankirin û di 7 warên nûjenkirina jêrxanê, pûçkirina mînan, piştevanîkirina çandiniyê, piştevanîkirin koçberan, peydakirina avê, parastin û fêrkirina zarokan û piştevanîkirina civaka sivîl û ragihandinê de xebat birêve diçin.