كوردێن ئێزدی داخوازا ڤەكرنا كەنالەكێ ئاسمانی ل هەرێما كوردستانێ دكن
راپۆرت:خێرهات بێدرڤان
ژدەستپێكا سالێن نۆتان دا و هەتا نۆكە ڤەكرنا كەنالەكێ سەربەخۆ یێ ئەسمانی هیڤیا كوردێن ئێزدی یە ل هەرێما كوردستانێ،داكو پەیام و ئێش و ئازارێن وان ب شێوەیەكی راست و دروست بگەهتە حەموو جیهانێ و داب نەریتێن خۆ ژی تێدا دیار بكن،ژبەركو هندەك كەنال پەیاما ئێزدیا ب دروستی ناگەهینن،لەوا دخواز دكن ببن خودان كەنالەك.
بەرپرسێ بنگەهێ لالش تایێ خانكێ(عەنتەر كەلۆ)دیاركر،گەلەك كەنالێن راگەهاندنێ ل كوردستانێ هەنە بتنێ ئێزدی وەك پێكهاتەیەكێ رەسەنێ جڤاكێ كوردیە كەنالەكێ راگەهاندنێ یێ سەربەخۆ نینە،ئەڤە ژی بوویە ئەگەرەك جڤاكێ مە بەرێ خۆ بدەتە كەنالێن دی،لەوا نۆكە ئەم پتر پێتڤی كەنالەكی نە،داكو پەیاما جڤاكێ مە ب شێوەیەكی راست و دروست بگەهیننە حەموو جیهانێ و داب نەریتێ خۆ ژی تێدا دیار بكن.
رۆژنامەڤانا ئێزدی(جیهان عەبۆ)دبێژت:پێتڤیە حكومەتا هەرێمێ و دەولەمەندێن ئێزدی كەنالەكی ژبۆ ئێزدیان ڤەكن،ڤەكرنا ڤی كەنالی دڤێ قۆناغێ دا گەلەك یێ گرنگە بۆ جڤاكێ مە،چنكو دێ رێ و رەسمێن خۆ یێن ئۆلی و نەتەوەیی و جەژن و هەلكەفتێن خۆ تێدا بینن، هەروەسا بۆ زارۆك و نڤشێ داهاتی بزانن د درێژییا مێژوویێ دە گەلێ ئێزدی چەند دەردەسەری و مال وێرانی دیتینە و چەند قۆناغێن زەحمەت را بۆرینە،دیسان مافێ ئێزدیایە دەزگەهەكێ میدیایێ هەبت،هەروەسا ئەڤ كەنالە دبتە ئەگەرێ كۆمكرنا گشت وان بەلگەیان كو تیرۆستێن داعش جینۆساید بەرامبەر ئێزدیێن شنگالێ ئەنجامدایە.
مامۆستایێ زانكۆیێ(ئەرشەد حەمەد)خویاكر،یا گرنگە ئێزدیان ژی كەنالەكێ راگەهاندنێ یێ تایبەت هەبت بۆ گەهاندنا پەیاما وان یا راست و دروست و ئێش و ئازار وگازندێن وان ،دیسان بۆ پتر ناساندنا ئایین و داب و نەریت ورێ ورەسمێن وان یێن ئایینی و جڤاكی.
هەروەسا(تەحسین ئلیاس)وەك مامۆستایەك دیاركر،ڤەكرنا كەنالەكی تایبەت ب ئێزدیان ڤە ل هەرێما كوردستانێ ب تایبەت ل باژێرێ دهۆكێ دەڤەرا داسنیا وبادینان كو كەڤنترین جهێ ئێزدیایە ل جیهانێ گەلەك یا گرنگە ،ژدەستپێكا سالێن نۆتان دا خەلكێ ئێزدی هیڤیا وان ئەو بوو كەنالەكی تایبەت ب وان ڤە بێتە ڤەكرن وهەردەم هەول داینە وان ژی وەك ئۆلێن دی یێن كوردستان وعێراقێ دا كەنالەكێ سەربەخۆ هەبت،دا بكارن كەلتۆر وكە ڤناتیا ئایینێ خۆ یێ رەسەن و رێ ورەسمێن خۆ یێن رەسەن بۆ حەموو جیهانێ دیار بكن.
كەسایەتیێ ئێزدی(حسێن قایدی)گۆت:یا فەرە كەنالەكی تایبەت ب ئێزدیان ڤە ل هەرێمێ بێتە ڤەكرن،داكو پەیاما خۆ بگەهیننە حەموو جیهانێ و ئەو كارەساتا ب سەرێ خەلكێ بێ گونەهـ هاتی بدەینە ناسین،هندەك كەنال وێت هەین پەیاما ئێزدیا ب شێوەیەكی دروست ناگەهینن،لەومائەم پێتڤی ڤی كەنالی نە دا ب دروستی بگەهینین.
تُتاح هذه الصورة أيضا في: کوردی
