هەبوونا پارتی ل بەغدا
سەربەست خالد هاجانی
پێشڤەچوونا تێگەهێ فرەلایەنی و هەمەرەنگی د هزرا سیاسی و جڤاكیا عێراقێ دا پشتی ڕۆژا(9/4/2003)ێ رۆژا ژناڤچۆنا رژێما بەعس وەرە هاتیە سەردەست، كو داوی ب حكومداریا دكتاتۆری ل عێراقێ ئینا، ئەو جۆرێ حكومداری بوویە كو تاكەكەس و چ گرێدانا وێ ب دەستووری ڤەنە، هەموو بەرژەوەندیێن مللەتی قوربانی تاكێ حوكومدارە،پشتی نەمانا ئەڤی جۆرێ حكومداریێ ل عێراقێ، ئالیێن ئوپوزسیۆن دگەل پێكهاتەیێن عێراقێ و هێزێن ناڤدەولەتی ب تایبەتی ئەمریكا هەموویان پێداگێری لسەر وێ چەندێ دكر دڤێت (بیروباوەرێن رژێمەكا دیموكراسی) د گیانێ عێراقا نوو دا بێنە چەسپاندن و گەل ببتە ژێدەرێ دەستهەلاتێ و مافێن هەموو نەتەوە و پێكهاتان بێنە پاراستن، دەستهەلات دەربرینێ ژ هەموو رەنگ و توخمێن جودا بكت لدووڤ وەكهەڤیەكا سیاسی، مەدەنی و ئاشتیانە د چارچۆڤێ عێراقەكا ئێكگرتی دا،د را وەرگرتنا(15ی ئوكتۆبەرا 2005)ێ دا پرانیا گەلێ كوردستانێ دەنگ ب دەستوورێ نوو یێ عێراقێ دا، ئەو خەباتا ب دەهان سالان گەلێ كورد درێژی پێدای د رێیا وی دەستووری دا كو ئەو مافێن د دەستوورێ عێراقا نوو دە هاتینە راگەهاندن ئارمانجا داكوكیێ و راستیێ بوو ژلایێ سەركرداتیا رامیاریا كوردی كو دخواست عێراقەكا نوو یا دیموكراسی بێتە ئاڤاكرن، بەلێ دەستهەلاتا عێراقێ یان عەقلیەتا رامیاریا عێراقێ هێشتا نەگەهشتیە وێ باوەریێ كو باوەری ب پرەنسیپێن دیموكراتیێ نینە، میناك ژی پاشئێخستن و نەجێبەجێكرنا تەڤ ماددە و بەندێن دەستووری یێن گرێدایی كوردستانێ و ب تایبەت جێبەجێنەكرنا ماددێ (140)ێ ژ دەستوورێ عێراقێ، هەتا نهۆ قەیرانا دەستهەلاتێ ل عێراقێ و عێراق ب گشتی د دۆخەكێ ئالۆز و د نە سەقامگێریا (رامیاری، ئابووری، تەناهی و بێ باوەریێ دا) د بۆرت،دەربارەی رۆلێ سەركرداتیا كوردی دڤان هەموو دۆخێن عێراق تێدا دبۆرت، سەركرداتیا كوردی و ب تایبەت پارتی دیموكراتی كوردستان خۆ نەدایە پاش ژ كەتوارێ عێراقێ و د هەموو گەرێن هەلبژارتنان دا ب هێز ڤەگەریایە بەغدا، هەبوونا هێزەكا سیاسیا كوردی مینا پارتی كاریە بەرگریێ ژ مافێن كوردان بكت، ب درێژیا خەباتا وێ بۆ جارەكێ بتنێ ژی پرسا كوردان ل عێراقێ پشت گوهـ نەهاڤێتیە و هەتا نۆكە ژی ئەڤ پرسە بوویە گرژی و ئاستەنگ ل هەمبەر هێزێن سیاسێن عێراقی و چارەیەكا بنگەهی بۆ پرسا كوردان و دانا مافێن وان یێن دەستووری نەهاتیە كرن، ئەگەر بێنە دناڤ كەتواری دا و ڤان هەموو هەڤكێشەیێن سیاسی و ئەو بارودۆخێ نەجێگر ل عێراقێ، كوردان پێتڤی ب سەنگەكا بهێز و ئێكگرتنەكا سەرتاسەری هەیە بۆ هندێ كورد نەهێنە پەراوێز ئێخستن یان ژی بێ بەشكرن ژ مافێن وان،بۆچی ئیرۆ باوەریێ بدەینە پارتیا دیموكراتا كوردستانێ؟ برسیكرن و بێ بەهركرنا كوردان ژ ماف و شایستەیێن وان یێن دارایی مەزنترین ستەما دوژمنكاریێ بوو ل هەمبەری كوردان هاتیەكرن ژلایێ حكومدارێن عێراقێ، لەوران ژبەرهندێ ماف و شایستەیێن دەستووری یێن خەلكێ كوردستانێ ئێك ژ تەوەرێن سەرەكی بوویە د كارناما پارتی دا ل بەغدا، پارتی هۆیێن ئاشتیانە دگەل بەغدا بكارئیناینە ژ پێخەمەت ب دەستڤەئینانا مافێن كوردان، و هەردەما بابەتێ بودجێ گەهشتبا هۆلا ئەنجومەنێن نوونەرێن عیرَاقێ چەندەها موزایدە و دژایەتی لسەر خواستا مافێن كوردان دهاتنە كرن و ئاستەنگ دئینان پێش، ژبۆ هندێ پێگەهێ كوردان لاواز بكن یان ژی وەكو هێزەكا كەمینە ب هەژمێرن، سیاسەتا جێبەجێكرنا زۆرینە پەیرەو دكرن ل دژی كوردستانێ و ئیرۆكە ژی هندەك لایەنێن كوردستانی ل بەغدا دژی پێگەهێ هەرێما كوردستانێ نە ب ئاشكەرایی لسەر راگەهاندنێ دبێژن پلانا مە ئەوە ئەم مووچەیێن فەرمانبەرێن خەلكێ كوردستانێ ڤەگەرینن بەغدا كو راستەوخۆ ژلایێ حكومەتا ناڤەندی ڤە بێنە شاندن، بەلێ بنەكۆكا ئارمانجا ڤێ پلانێ دژایەتیە بۆ لاوازكرنا حكومەتا هەرێما كوردستانێ، دناڤ ڤان هەموو هێزان دا تاكە هێزا سیاسی كو كاری بت مافێن كوردان ب دەستڤەبینت، سەركردایەتیەكا كوردی یا بهێز ل عێراقێ نیشان بدەت و بكارت سەروەریا هەرێما كوردستانێ پارێزت بتنێ پارتی دیموكراتی كوردستانە،لەوران ژبۆ ڤێ قۆناغێ ژی دڤێت باوەریێ بدەینە پارتی چنكو خەباتا پارتی خەباتكرنە بۆ عێراقەكا دیموكراسی و مافێن هەموو پێكهاتەیان د پاراستی بن.
تُتاح هذه الصورة أيضا في: کوردی
