زارۆك و موبایل
عبدالرحمن خشخاشی
موبایل ئێك ژئالاڤێن ھەری گرنگە ژبۆ بڕێڤەبرنا كارو بارێن روژانەیێن مروڤی ،خزمەتەكا ئێكجار زوور ژھەمی ئالیانڤە پێشكێشی مروڤایەتیێ دكەت . ئەڤ ئالاڤەژی دڤێت ب درستی بۆ وێ مەرەما بۆ ھاتییە دروستكرن بھێتە بكارئینان ، نەكو بۆ یاری و تشتێن بێ مافا و نابیت بكەڤیتە ددەستێن وان كەسان دا یێن بۆ كارو كریارێن شاش بكاردئین، نەخاسمە زاروكێن تەمەنێ وان ل دورێن ٢سالی تا ١٠ سالی دا چونكە دڤی ژیێ دەست نیشانكریدا موبایل یانژی ھەر ئالاڤەكێ دی ژڤی ھاوشێوەی دێ كاریگەریەكا خراب ل سەر رەوشا ساخلەمیا زاروكی و و دەرونێ زاروكی ھەبیت و زاروك برێكا موبایلێ دێ تۆشی شاشیێن مەزن بیت . مخابن گەر بەرێ خو بدەینێ ، دزوربەیا مالێن مەدا موبایل یانژی ئایپاد ژھەر ئالاڤەكێ دی بەردەست ترە بۆ زاروكی و بكەیفا دلێ خۆ زاروك ڤی ئالاڤی بكاردینیت ، براستی ئەڤەژی شاشییەكا مەزنە ل دەف دەیبابان كۆ ھەردەما زاروكی لڤینێن زێدەكرن و ئارامیا مالێ تێكدا ، بێی ل رێكێن پەروەردەیی بگەریێین بۆ ھاویژ كرنا وی زاروكی دێ ئێكسەر موبایلێ دلەپی ڕا كەین و وی پێڤە مژویلكەین ، لێ بەلكو ئەم نزانین بێ دەنگكرنا زاروكا بڤی ئاوای دێ پتر زاروكا بخورا بەردەین و پەروەردەیەكا سەقەت نیشا دەین بتایبەتی ھا وەرزێ ھاڤینێ درێ دایە و زووربەیا مە ھیچ پلانەكا دارێتی نینە داكو زاروكێن خو لسەر وێ پلانێ برێڤە ببەن و چ ب ڤرێكرنا وان بیت بۆ ھندەك خولێن تایبەت ، یانژی ل مال وان فێری ھندەك كارێن باش بكەین، چونكی گەر زاروك بتایبەتی ئەوێن تەمەنێ وان ژ ٦ سالیێ وێڤە بھندەك كارانڤە یان خولاڤە نەھێنە مژیلكرن پتردەرفەت بۆدروست دبیت كو ڤان ئالاڤابكاربینین و ئەڤ زێدە بەرێخۆدانا زاروكا بۆ موبایلێ دێ كارتێكرنێن خراب لسەر ھەمی لایەنێن ژیانا زاروكی ھەبن، چ ژلایێ دەرونی ، ساخلەمی ، فسیولوجی ، پەروەردەیی ڤە … ھتد ، ئەڤ زاروكە دێ بینین ھەمی دەما نەیێ ئارامەو باراپتر یێ تورەیە ، یانژی كارتێكرنێ ھەتا دكەتە سەر زمانێ زاروكی ژی ب درستی نەشێت فێری زمانێ خویێ دایكێ ببیت، و زمانێن جوراو جور تێكەل دكەت و بدرستی فێری ھیچ زمانەكی نابن ، یانژی زوی فێری ئاخفتنێ نابیت، بەلكو ھندەك زاروك ژیێ ٣ سالیێ ژی ب داوی دئینن لێ نزانن دوو پەیڤا بدرستی بدركینن و ژلایێ كومەلایتیژی ڤە رەنگە دووراتیەك دناڤبەرا وی و جڤاكی دا دروستبیت و نەشێت پەیوەندیێن ھەڤالینی و دوستایەتی دگەل دەو روبەرێن خودا دروست بكەت و بەلكو دێ كەسەكێ دوری جڤاكی بیت و ئاستێ كەسایەتیا وی دێ زوورا لاواز بیت ، دیسان ژلایێ فسیولوجی ژی ڤە دێ كاریگەریا خراب لسەر زاروكی ھەبیت ، چ زاروك قەلەو ببیت یانژی خەوا وی تێكبچیت و چ دەمێن دیاركری نابن بو نڤستنێ ، ھەروەسا خارن و ڤەخارنێن زاروكی دێ دئالوزبن و چ رێكخستن تێدا نابیت ، دبیت زووربەیا دانێن خوارنێ ل وەختێ وان ناخوت،و بڤی ئاوای بەرگریا وی یا لەشی ژی دێ یالاوازبیت. گەر ببینە جھێ ھیڤییا زاروكێن خۆ، دڤێت وان فەراموش نەكەین و ھەردەم خەما مە پێشڤەبرن و پەروەردەكرنا وان بیت لسەر رێكێن درست، داكۆ بكارین زاروكەكێ خودان شیان و باوەری بخۆبووی و خودان كەسایەتیەكا بھێز بەرھەم بینین و وی بەرھەڤ بكەین ئەو بخو ھزر دھەلبژارتنا رێكێن راستێن ژیانێ دا بكەت و دئاییندەدا ببیتە كارەكتەرەكێ ئەكتیڤ و كاریگەر دناڤا جڤاكی دا.
تُتاح هذه الصورة أيضا في: کوردی
