رائد غانم:پیرۆزیا كانییا پیرەخایێ‌ ل چیایێ‌ شنگالێ‌

پیرۆزیا كانییا پیرەخایێ‌ ل چیایێ‌ شنگالێ‌
رائد غانم
هەلبەت ل ناڤ هەموو مللەتێن جیهانێ‌ دا، جی، ئاقد، نیشانگەهـ ، و ناڤێن پیرۆز هەنە، و جیێن خۆ ل ناڤ ئایین و جڤاتێن واندا خۆ جهـ بووینە، ئێزدی ژی مللەتەكێ‌ كەڤنە و پیرۆزی دایە گەلەك تشتێن خوەزایی و سروشتی، و ب چاڤەكێ‌ مەزن تەماشە دكەنێ‌ ژوانژی كانییا پیرەخایێ‌ یە كو پیرۆزیەكا تایبەت ل جەم خەلكێ‌ دەڤەرا چیایێ‌ شنگالێ‌ هەیە،ئەڤ كانییە، دكەفتە گەلیێ‌ كەرسێ‌ ل باكوورێ‌ چیایێ‌ شنگالێ‌ ل نێزیك كەلەهۆشگا كۆلكا؛ كانیەكا ئاڤ زەلال و تەم خۆشە و شرینە، لێ‌ پرسیار دئێتە كرن پیرۆزیا ئەڤێ‌ كانیێ‌ چی یە، چاوا جیێ‌ خۆ ل ناڤ خەلكێ‌ شنگالێ‌ دا گرتییە و چما ب پیرۆزی دئێتە نیشاندان؟ دبێژن دەمێ‌ شیخادی ژ وەلاتێ‌ شامێ‌ هاتی و ب تایبەت ژ گوندێ‌ بەعلەبەك ژبۆ لالشا نوورانی ل گەلیێ‌ كەرسێ‌ ڕا دەرباز بوو، و ل جەم ڤێ‌ كانیێ‌ ل گەل جۆقەتا خۆ بێهناخۆڤەدان و هندەك ژ ئاڤا ڤێ‌ كانیێ‌ ڤەخوارن و دەست و چاڤێن خۆ پێ‌ هەمبێز كرن، لێ‌ بۆ زانین بەری شیخادی بێتە سەر ڤێ‌ كانیێ‌ ناڤێ‌ وێ‌ كانییا (گۆلاڤا) بوو، وەكو ل دڕۆزا خاسا دئێتە دیاركرن ب ڤی ڕەنگی (مەندێ‌ مال ئاڤا، و كانییا گۆلاڤا، و دیوانا بەرێ‌ شبایكێ‌ …هتد) لێ‌ پشتی شیخادی دوعا لێ‌ كری ناڤێ‌ وێ‌ كرنە كانییا پیرەخایێ‌، و هەتا نۆكە خەلكێ‌ دەڤەرا ناڤبری ب ئاڤەكا پیرۆز دبینن، و خەلكێ‌ وێ‌ دەڤەرێ‌ هۆسا هزر دكەن كو ئاڤا ڤێ‌ كانیێ‌ دەرمانە ژبۆ گەلەك نەخۆشییان،تێ‌ زانین ژیانا بەرێ‌ هەموو ل سەر ئاڤا كانییا بوو، هەر جیێ‌ ئاڤ لێ‌ نەبا ژیان لێ‌ نەدبوو، بەلێ‌ ئاڤ ڤەخوارنا خەلكێ‌ گوندێ‌ كۆلكا و سمێ‌ هێستر و مامیسێ‌ و ملك و ملكێ‌ كەدینێ‌ و دۆرماندۆری وێ‌ هەموو ژ ڤێ‌ كانیێ‌ بوو، هەروەسا چاندن ژی ل بەر دكرن نەخاسمە چاندنا تووتن و باغ و بوستانان، و ژبەر پیرۆزیا ئاڤا ڤێ‌ كانیێ‌ هۆزا فەقیرا ل وێ‌ دەڤەرێ‌ خەرقەیێ‌ خۆ پێ‌ جوان دكەن و مۆردكەن، گەلەك نیشانگەهـ ل دۆرماندۆری ڤێ‌ كانیێ‌ هەینە، وەك قوبا شیخادی ( ژبەر هاتنا وی بۆ وێ‌ دەڤەرێ‌ خەلكێ‌ شنگالێ‌ ب فەر دیت قوبەكا ب ناڤێ‌ وی چێكەن لەوران ل ساڵا 1995 هاتە چێكرن ژ با هۆزا فەقیران ڤە، و مەزارێ‌ خەرقە، و خزینا خەرقە،و گەلیێ‌ هارونێ‌، و كەلە هۆشگا كۆلكا، كەفرێ‌ حنگالا، كەفرێ‌ گەلۆ، و گەلەك دارێن زەڕگوزێ‌ ل نێزیك ئەڤێ‌ كانیێ‌ هەینە،هەروەسا ل وەرزێ‌ هاڤینێ‌ خەلكێ‌ دەڤەرا شنگالێ‌ سەرەدانا كانییا ناڤبری دكەن ئەوژی ژ بۆ مەرەمێن جۆراجۆر و ئاڤا وێ‌ وەك دەرمان دئێتە بكارئینان، بۆ زانین ئاڤا ڤێ‌ كانیێ‌ ب هەزارێن خەلكێ‌ دەڤەرێ‌ ژ تێهنی بوونێ‌ ڕزگاركرن ل فەرمانا 3/8/2014.