مەهدی حەسەن:رۆژیێن ئێزی و رۆژیگڕتن د باوەریا ئێزدیان دا

رۆژیێن ئێزی و رۆژیگڕتن د باوەریا ئێزدیان دا
مەهدی حەسەن
ڕۆژیگڕتن د باوەریا ئێزدیان دا خێرەكا مەزنە، ژبەرهندێ‌ ئێزدی بتر ژ هەر ئاین و نەتەوەكا هەی ڕۆژیان دگرن و باوەری پێ‌ هەیە، نەبتنێ‌ هەر (3) ڕۆژیێن ئێزی دگرن بەلكو د باوەریا ئێزدیان و فەلسەفا ئێزدیاتیێ‌ دا نێزیكی (100)ڕۆژیان هەینە و دگرن ژوانژی ڕۆژیێن (چلێ‌ هاڤینێ‌،چلێ‌ زڤستانێ‌، ڕۆژیێن شێشمس و ڕۆژیێن خدر و ئەلیاس و یێن خودانی و شێخ و پیران و خاس و بابچاك و یێن خوداوەندان…هتد)دگرن، بەلێ‌ ئەڤ رۆژینە ل سەر هەموو كەسان نەفەرزن، بتنێ‌ هەرسێ‌ ڕۆژیێن ئێزی ل سەر مرۆڤێ‌ ئێزدی فەرزن.
وەكی د قەولێ‌ مەرسوما جبێرا دا هاتیە:
ل ئاخرەتێ‌ خۆ رۆس بكە
ل دنێ‌ عبادەتێ‌ زۆر بكە
سێ‌ رۆژیا بگرە و فەرزێت خۆ ب جهـ بكە
و هەرە و دەرباسی لالشا نورانی ببە
پێخواس بە دا خێرا تە یە ناس بە
ئەڤە ژی پشتی هاتنا شیخادی سلاڤێن خودێ‌ ل سەر بن و ئەو را.
مەزن ب ڕۆژیگرتنێ‌ دناڤ ئێزدیان دا هەیە، دەمێ‌‌ رۆژیێن ئێزی نێزیك دبن كەسانێن دەولەمەند و كەتخودایێن دناڤ ئێزدیان دا خێر و خێراتان دكەن و دەستێ‌‌ هاریكاریێ‌‌ بۆ وان هەژار و بەلنگازان درێژ دكن.
رۆژیگڕتن ب ڤی رەنگی یە: پشتی نیڤا شەڤێ‌‌ ، پاشیڤێ‌‌ دخۆن و دگەل تاری گەوركێ‌‌ دبتە دەڤگڕتن، دەڤگڕتن ژی ئەوە: نابت مرۆڤ هیچ تشتەكی بخۆت و ڤەخۆت و دڤێت خۆ ژ هەموو پەیڤێن خراب و گوننەهـ و بەدكاریان دوور بكەت، دڤێت مرۆڤێ‌ ئێزدی ب زمانێ‌ خۆ ب چاڤێن خۆ ب نەفسا خۆ یێ‌ ب رۆژی بت، ل هێڤاری بەری رۆژئاڤابوونێ‌ ڕۆژیگر دەست و چاڤێن خۆ دشۆت و خۆ پاك و تەمییز دكەت و بەر ب ڕۆژئاڤا ڤە پەروەستەی خودێ‌‌ دبن و دوعایا هێڤاری دكەن،پشتی ڕۆژئاڤا دبت دبتە فتار، رۆژیگر ب دەستووری خودێ‌‌ فتاردبن ب ڤی تەرزی هەر سێ‌‌ ڕۆژیان ب ڕۆژی دبن.
هەژی گۆتنێ‌‌ یە بۆ ڤان ڕۆژیان هەر مالەكا ئێزدی ل رۆژا دوو شەمبوویێ‌‌ سەربڕەكێ‌‌ سەرژێ‌‌ دكەت،دبێژنێ‌‌ رۆژا پەز كوشتنێ‌‌ بۆ پاشیڤێ‌‌ و فتارێ‌‌، ئێزدی دگەل هندێ‌‌ دا هەڤدوو مێهڤان دكەن نەخاسمە مالێن دەولەمەند و كەدخودا بۆ پاشیڤ و فتارێ‌‌ خوارنێ‌‌ بۆ مالێن بەلنگاز دبەن، ل هێڤارا جەژنێ‌‌ سەوكا دپێژن و ل هەڤدوو دگێرن، تاكو نانێ‌‌ وان تێكەلی هەڤ بت ، هەروەسا ژنك سەرەدانا گۆرستانا گوندی دكەن و ل خاسا زیارەتی دبن، ل وێدەرێ‌‌ ژی سەوك كو نانەكێ‌ تایبەتە ل جەژنا دئێتە دروستكرن و شرینیا ب سەر هەڤدوودا دا بەلاڤ دكەن، ل سبەیكا جەژنێ‌‌ هەموو ئێزدی جەژنا هەڤ پیرۆز دكەن و قەستا نیشانگەهێن خاس و چاكان دكەن و لێ‌‌ زیارەتی دبن و دلێن خۆ لێك خۆش دكن و هەر مالەك ل سبەیكا جەژنێ‌‌ زادێ‌‌ خۆ دبەتە بەر نیشانگەها خاسێ‌‌ گوندی و هەموو پێكڤە دخۆن.
ژلایەكێ‌ دیڤە هەر ئاین و مللەتەك ب رەنگەكی ڕۆژیێن خۆ دگرن و ڕۆژی هەنە، ل پەی باوەریا هەر ئاینەكی ڕۆژیگڕتن خێرەكا مەزنە و فەڕزەكا ئۆلی یە پێ‌ دئێنە سپاردن و فەرە مرۆڤ ڕۆژیێ‌ بگرت داكو ب بڕسێ‌ و بەلنگازیێ‌ ب حەسێت و ئاگەهـ ژ خەلكێ‌ هەژار و بەلنگاز هەبت.
ژێدەر:
پەرتۆكێن پەروەردا ئێزدیاتیێ‌.
مامۆستایێ‌ ئاینی پیر خەلات ئەلیاس.