ژ بیره‌وه‌ریێن مه(پشكا دووێ)
جه‌هوه‌ر هه‌كارى
من ده‌ست وچاڤێن خۆ شووشتن و زڤریمه مالا موختارى و حه‌جى یێ راوه‌ستاى بوو ل هیڤیا من ده‌مێ ئه‌ز گه‌هشتیمه نك وى به‌رى ئه‌ز سلاڤێ بكه‌م گۆت مه‌رحه‌با خورتۆ من گۆتێ سه‌رچاڤان وى گۆت توو كه‌نگى هاتیه گوندى من گۆتێ شه‌ڤا دى ئه‌وى گۆت هوونن ب سلامه‌تن؟،من ژى به‌رسڤ دا و گۆتێ سوپاس بۆ خودێ ئه‌م ب سلامه‌تین گۆته من توو جه‌هوه‌رى من گۆتێ به‌لێ به‌س توو كى و چاوا من ناس دكه‌ى گۆت ما ئه‌و كى بوون وێ شه‌ڤێ ئه‌و ئه‌مانه‌ت ژ ته وه‌رگرتى ئێكسه‌ر من گۆتێ توو حه‌جى قه‌سیمى گۆت به‌لێ گۆت توو ل مالا كێى من گۆتێ موختارى گۆته من هه‌ره ئه‌ز دێ بێهنه‌كا دى ئێمه نك وه و ئه‌ز هاتمه مالا موختارى و من تێشت خوار و پاشى من پسیارا كاك محه‌مه‌دى كر و كورێ موختارى چۆ پرسیارا وى كر و ل گه‌ل خۆ ئینا نك مه و پشتى بێهنه‌كێ حه‌جى قه‌سیم هات و گۆت رابن دا بچین مالا مه ئه‌ز و كاك محه‌مه‌د ل گه‌ل وى چۆین و رێزه‌كا مه‌زن ل مه گرت.
ل رۆژێ و ل شه‌ڤێ بۆ مه گه‌له‌ك سوحبه‌ت كرن من پرسیار ژ حه‌جى كر و من گۆتێ ئه‌رێ وه چاوا مالا بارزان ناسكر و كه‌نگى و چاوا وان ئه‌و باوه‌رى دایه وه گۆت ل سالا 1947 ئه‌ز هێشتا سنێله بووم بارزانى هاته گوندێ مه و هاته مالا مامێ من (مالا بابێ محه‌مه‌د ره‌شیدێ موختار) و مه گه‌له‌ك رێز ل بارزانى گرت و وان خۆ به‌رهه‌ڤ دكر بۆ چۆنا ئێكه‌تیا سۆفیه‌ت،ده‌مه‌كى بارزانى تشته‌ك ژبه‌ر شووتكا خۆ ئینا ده‌ر و دا مامێ من و گۆتێ ئه‌ڤ ئه‌مانه‌ته بلا ل نك وه بت هه‌تا ئه‌ز رۆژه‌كێ دزڤرم ڤه مامێ من ژێ وه‌رگرت و ئه‌و چۆن،مه نه‌زانى ئه‌و ئه‌مانه‌ت چى یه بتنێ وه‌ك داره‌كێ زراڤ ب په‌رۆكه‌كى یێ پێچاى بوو هه‌ما مامێ من د به‌ر شه‌قلێن خانى راكر و پشتى چه‌ند سالا جاره‌كێ ئینا ده‌ر و ڤه‌كر به‌رێ خۆ دایێ باسكه‌كێ دارى یێ جگاره كێشانێ یه و جاره‌كا دى پێچا و دبه‌ر شه‌قلا راكر.
پشتى بارزانى زڤریه به‌غدا ل سالا 1959 و پشتى هنگى زڤریه بارزان ئێدى مامێ من گۆت دا ئه‌م ئه‌مانه‌تێ بارزانى بۆ وى ببه‌ین و مه كارێ خۆ كر و ئه‌م چۆینه بارزان و ئه‌م چۆینه باره‌گایێ بارزانى ده‌مێ زانى بایى یێت هاتین پێشوازیه‌كا گه‌رم ل مه كر و مامێ من ئه‌و ئه‌مانه‌ت دا بارزانى و هه‌تا نۆكه ئه‌و په‌یوه‌ندیا مه ل گه‌ل مالا بارزان یا به‌رده‌وامه.
س.س
تُتاح هذه الصورة أيضا في: کوردی
