بیرەوەریا کارەساتێ
دلڤین خەلەف
بهەلکەفتا بۆرینا هەشت سالان لسەر کارەساتا شنکالێ یا كو ل رۆژا ٢٠١٤/٨/٣ لسەر دەستێ دوژمنێ مرۆڤایەتیێ چەکدارێن رێکخراوا تیرۆرستی یا داعش هاتیە ئەنجامدان و ز ئەگەرێ وێ چەندێ ب هەزاران زارۆک و ئافرەت و پیروکال بوینە قوربانی و دیسان ب هەزاران کەسێن بێ گونەهـ بکۆم هاتینە بن ئاخکرن و باژێرێ شنگال بگشتی هاتە تالان و وێران کرن و خەلکێ وێ دەربەدەر و ئاوارەبوون و هەتا نهۆ ژی ژیانا خوە ل ژێر چادران و لناڤ خیڤەتگەهان دەربازدکەن.
مەرەما دوژمنێ خوین مێژ ژ ڤێ هێرشا بێ وژدان قرکرن و نەمانا جڤاکێ ئێزدی بوو ل شنگالێ، لەوما ب هزرو بیرێن خوە یێن کەڤنار و گەتنی دەست بڤێ هێرشا تیرۆرستی کرن و بهەزاران کچ و دایکێن مە یێن ئێزدی رەڤاندن و ئێخسیر و بێ روومەت کرن و هەولێن شکاندنا کەسایەتیا وان دان وەکو هەر کەرستەکێ ل بازارێ کرین و فرۆتن ب وان هاتە کرن
ئەوا کارەساتا رۆژا ٨/٣ ل شنگالێ روودای تاوانەکا مەزن بوو تیرۆرستان ل دژی خەلکێ مە یێ ئێزدی ئەنجامدایین ب هەموو قەبارە و پبڤەران ڤە و ئەڤێ چەندێ ژی هەستێ هەر کەسەکی خودان وژدان ل سەرانسەری جیهانێ هەژاند و بوویە خالەکا رەش بناڤ چاڤێن دوژمنێن دڕندە خودانێن هزر وبیرێن کەڤنار و پاشڤەمایی و هەر لایەنکی بوویە پشتەڤانێ رێچ و شۆپا وان یا هۆڤانە و خراب .
کارەساتا شنگال زیانەکا ئێکجار زۆر گەهاندیە ئافرەتا شنگالی و وتۆشی ئێش و ئازارێن مەزن کریە ژ هەموو ئالیان ڤە و بتایبەتی دبوارێ سەرەدەریا خێزانی و دەربازکرنا رەوشەکا سەخت و دژوار کو ئەڤرۆ دبەتەسەر و ئەڤ چەندە ژی بوویە ئەگەرێ شەپەرزەبوون و لاوازیا هێز وشیانێ وێ کو ب زەحمەتیەکا مەزن رووبەرووی ژیانا خوە یا رۆژانە دبێ و ب بێدەنگی دناڤ خەم و کۆڤانێ خوە دە دنالێ.
ئەڤرۆ ب هەزاران ئافرەتێن کەفتینە دەستێ وان هۆڤا رزگاربووینە و ژکۆلەتیێ ئازاد بووینە لێ گەلەک جاران تۆشی ئاستەنگیان دبن و نکارن ژیانەکا ئاسایی ببەنەسەر ژ ئەگەرێ دابونەریتێن جڤاکی یێن بەرتەنگ و ۆەڤ چەندە ژی بۆ ئافرەتێ بوویە بارگرانیەکا مەزن
هیڤیدارین ژ هەموو لایەکی پەیوەندی دار بلەز ئەو دایک و خویشکێن مە یێن ماینە دناڤ دەستێن تیرۆرستان دە رزگاربکەن، ژبەر کو خێزان و کەسوکارێن وان چاڤەرێی وێ رۆژێنە ڤەگەرێنە همبێزا وان و ژبن دەستیێ قورتال ببن.
وهەروەها هیڤیدارین ئارامی ل شنگالێ پەیدابێ و خەلکێ مە ب سەربلندی ڤەگەرێ سەر جیهـ و وارێ خوە و تیرۆرستێن بێ وژدان بکەڤنە دەست دادگەهێ و بێنە سزادان.
* – روورەشی و شەرمەزاری بۆ دوژمنێ مرۆڤایەتیێ تیرۆرستێن داعش.
* – سەربەرزی و سەرفەرازی بۆ کەسوکارێن قوربانیێن کارەساتا شنگال.
* – ئازادی بۆ دیک و خوشکێن مە یێن ماینە دناڤ دەستێن تیرۆرستان دە.
تُتاح هذه الصورة أيضا في: کوردی
