بیرەوەریا هەشت سالیا 3ی تەباخێ رۆژا جينۆسایدكرنا ئێزدیان ل شنگالێ
مەھدی حەسەن
بیرەوەریا هەشت سالیا جێنوسایدا كوردێن ئێزدی یا پر ئێش و ئازار دەرباز دبت ئەڤە ھەشت سالێن مالوێرانكرنێ و دەربەدەریێ كەسەكی برین دەرمان نە كرن و چ مراز ب جیھ نەھاتن بلی ھلكرنا چەند مومكا و خوندنا داخویانیا و خرڤەبوونا ھندەك ژ چالاكڤان و رێكخراوێن چڤالێ سڤیل و كەس و كارێن قوربانیا ژ بو ساخكرنا ڤێ رۆژا رەش ، جھێ داخیە ئەڤ قیری و گازیا ڤان دەیك و خوشك و باب و برایێن قوربانیا چ ل پێ نەھات ئەڤ ھەشت سالا ب شەڤ و رۆژ مللەت ھەمی دكەتا گازی و ھاوار چ ئەنجام دیار نەبوون نە دادگەهكرنا تاوانبارێن داعشێ داكو بگەهنە سزایێن خۆ یێ دادپەروەرانە و نە دانپێدانەكا دەولی ب ڤێ تاوانا دەرھەقی ئێزدیان ھاتیە ئەنجامدان نە خەلكێ مە ڤەگەریا سەر حال و مالێ خو نە گڕتیێن دەستێ داعش رزگاربون، ھەشت سال ژیەكی درێژە زارۆك ل كەمپا پەیدا بوون نھا یێ ل قوتابخانێن كەمپا د خونن د بێژن ئەم خەلكێ كەمپانین ب ھەزارا پیر و كالێن مە وەغەر كرن ب مرازا شنگالێ بوون ڤەگەرێن بێ مراز چون نەگەھشتن ڤێ رۆژێ كچ و كورێن شنگالێ ئەڤە ھەشت سالا ل بەندا رۆژەكێ ئاھنگا ھەرە مەزن ل شنگالێ بكەن و جارەكا دی شنگالا جارا ڤەگەرێت و ھەمی خەلكێ شنگالێ ئازاد و سەربست بژین ، خەلكێ نەیار و تێكدەر و بیانی ژ شنگالێ دورپێخن ئەڤ رۆژ نەھات ، شنگال و شنگاری پێتڤی ب ھاریكاریێ و مەھرەبانیێ نە،فرمانەكا دژوار و مەزن ب سەرێ وان ھاتیە نابت شنگال بتە جھێ ململانێ ژ بو بەرژەوەندێن ئەقلیمی و دەولی ! رۆژانە تورك بین شنگالێ توپ باران كەن و زارۆك و گەنجێن شنگالیا ب كوژن دڤیا حكومەتا ھەرێمێ دگەل حكومەتا ئیراقێ ب وجدان شنگالێ ئاڤاكەن و پارێزن خو لێ بكەن خودان و بھێتە قەرەبوكرن و ئەو رێكەفتنا ھاتیە مۆركرن بھێتە جیبەجی كرن و ئەو چەكدارێن (پە كە كێ و ھێژێن حەشدا شعبی) بھێن دەركرن ، ژبەر كو ئەو تاوانێن لدژی مرۆڤایەتیێ یا دەرهەق خەلكێ مەیێ شنگالێ هاتیە ئەنجامدان لسەر دەستێ دژوارترین رێكخستنا تیرۆرستی یا ئیسلامی یا توندرەو بناڤێ داعش، هۆڤانەترین كریارێن سەربرینێ و كوشتنا ب كۆم و گرتنێ و هەتكبرنێ و بازاركرنا ب مرۆڤان و فرۆتنا ژن و زارۆكان بیە ، جھێ داخییە مللەتەك بەری شەش ھەزار سال ل سەر ڤێ ئاخێ ژیایی كو قورسترین ژیان مرۆڤێ ئێزدی ب سەر بریا خو ژ سر و سەقایێ دەورانێن بەفرێ وئاژەلێن دورندە پاراستیە خو ژ دەستێ ئیسلاما توند رەو و فەرمانێن خەلیفا قورتالكریە خو ژ دەستێ دكتاتور و سیاسەتێن فاشست رزگاركرینە نھا جیھەك نەبت لێ ڤەحوێن ھەمی وەكی ئێخسیرا دبن چادرا دا بژین ئەڤە یە مافێ مرۆڤا ئەڤە یە پێكڤەژیان ئەڤە دادپەروەری دەرهەقێ خەلكێ مەیێ بێ تاوان و رەسەن هاتیە ئەنجامدان ،هه‌چكو ئەم ل سەردەمەكی دا كو هیچ پەیوەندی ب رەوشت و مۆرالێن مرۆڤایەتیێ ڤە نەبت ئەڤە ھەشت سالا خەلكێ مە ل ھیڤیا رۆژەكا گەش ھەر سال ل رۆژا (٣ )ی تەباخێ ھیڤی و مرازێن خو ژ دنیایێ ھەمیێ ژ دەولەتێن رۆژئاڤا و رۆژھەلات دخازین بەلكی دەرگەھەكی خێرێ ل مە ڤەبت و خەلكێ مە یێ بەلنگاز ڤەگەرێن سەر چی و وارێن خو و دەرگەھێن مالێن خو ڤەكەن پشتی ھەشت سالێن دەربەدەریێ و بن چادرێن رزی و ژیانا كەمپا ئەڤ جار یێ نەدیتی ل ھاڤینێ ژ گەرما د سۆزن و ل زڤستانا ئەڤ سەقایێ سڕ بلی ئەڤ كارەساتێن ب سەرێ وان دھێن ژ لەھیێن بارانێ و ئاگر بەربونا چادرا و بێ عیش و حالی ژ بلی ئەو كول و كەسەرێن ددلدا كو چو جارا وان رۆژێن رەش و كرێت ل بیرا مە ناچن، ئەو رۆژێن (6417) مرۆڤێن ئێزدی ژ كچ و ژن و مێر و خورت و زارۆكان هاتینە رەڤاندن و زێدەتر(1300)مرۆڤێن هاتینە شەهیدكرن ژ هەردوو رەگەزان ژ هەموو تەمەنان، و هەروەسان پشتی بۆرینا ھەشت سالان هێشتا خوینا ژ برینێن مە درژێت ھەر رۆژ سپێدا ل ھیڤیا كەس و كارێن خوینە یێن ئەڤە ھەشت سالا ل بەردەستێ كافرا و بێ خودێ یا دنالن و ژ كەس و كارێن خو د دوركەفتین، بەلێ تشتەك نینە و نەی دارە دلێ ڤان دەیك و بابا خوش كەت، ژ بەر ڤان ئەگەرا سال بو سالێ بێ ئۆمێدبین ژ عەزیزێن خو و وارگەھێ خو ، هەرچەندە ئەڤە شەش سالە شنگال لسەردەستێ پێشمەرگەهێن قەهرەمان ب سەركردایەتیا سەرۆك(مەسعود بارزانی)هاتیە ئازادكرن، پشتی روودانێن 16ی ئەكتۆبەرا 2017ێ پێشمەرگە نەچاربوو خۆ ڤەكێشت ژ شنگالێ لەوما پرانیا خەلكێ مە رازی نابت كەمپێن ئاوارەیی یێن هەرێما كوردستانێ بهێلن و بزڤرنە شنگالێ ھەگەر رەوش ئارام نەبت و ھێزێن یاسای نە ڤەگەرێن شنگالێ نەخاسمە پێشمەرگەھ ئەڤێ ئەڤسانەیا داعش شكاندی ، ھەر چەند هەرێما كوردستانێ ب خەلكێ خۆڤە سه‌ره‌رای وان قەیرانێن حكومەتا عیراقێ بۆ كوردستانێ دروست دكه‌ت ب هاندانا وەلاتێن هەرێمی ،لێ هەردەم د خزمەتا خەلكێ مەدا بوون، بەلێ كەسەرا خەلكێ مە ڤەگەرێن شنگالێ شنگال ژی ئەڤرۆ وەكو باژێرەكێ وێران خوەیا دكە، نەخزمەتگوزاری و نەبوونا دەلیڤێن كاری و نە ئاڤەدانی و ب سەدان مال د هەرفینە و كەیسێ قەرەبووكرنا شنگالێ نڤستیە، و ئەو هێزێن نهۆ كۆنترۆلێ ل شنگالێ دكن هزرێ ل هاندانا خەلكی بۆ زڤرینێ ناكن وەكو پیلانەكا ب مەبەست و دارشتی و هەر بەغدا یا نڤستیە و بریارا نەزڤرینا خەلكی بۆ جهـ و وارێ وان هێلایه دالقاندی ،لەوا ئەم یێ ل وێ باوەریێ ب ھاریكاری و پشتەڤانیا حكومەتا ھەرێما كوردستانێ و جھۆدێن سەرۆكێ حكومەتێ رێزدار مەسرۆر بارزانی و سەرۆكێ ھەرێما كوردستانێ رێزدار نیجیرڤان بارزانی دگەل لێ ڤەگەرێ گەلێ كوردستانێ سەرۆك مەسعود بارزانی دێ ھەولێن بتر ھێنە ھاڤێتن ل ڤێ سالا بێت ژ بو جیبەجی كرنا رێكەفتنا حكومەتا بەغدا و شنگالێ و خەلكێ مە یێ شنگالێ ڤەگەرێن و ھێزێن بیانی بھێنە دورئێخستن ژ شنگالێ و بەلا توركا ژ شنگالێ ڤەبت ھەرۆژ بھێتە بومبەباران كرن و درێكا وەزارەتا دەرڤەیا ئیراقێ و كوردستانێ دا داكوكی ل ئەورپا و ئەمریكا بێتەكرن داكو دانپێدانا پەرلەمانێن ڤان وەلاتا ب جینوسایدا ب سەرێ ئێزدیان ھاتی بھێتە كرن دگەل قەرەبوكرنا قوربانیێن دەستێ تیرۆرێ و داعش و ئاڤاكرنا پاژارێ شنگالێ و كۆمەلگەھ و گوندێن وێرانكری و ھەولێن پارێزگەھبوونا شنگالێ زو بێتەدان وژیان وەكی بەرێ و باشتر ل شنگالێ بھێتە ب رێڤەبرن دگەل رزگاركرنا ھەمی كچ و ژن و زارۆك و پیر و كالێن دەستەسەر ل ھەر جھەكی ھەین .
تُتاح هذه الصورة أيضا في: کوردی
