ژنا ئێزدی بێ ئۆمێدبوویە
مەهدی حەسەن موراد
ب هەلكەفتا(١١/٢٥)رۆژا بەرهەنگاربوونا توند و تیژیێ دژی ئافرەتێ ل جیهانێ،سەرێ رێز و نەوازشە دچەمینین بۆ وان دەیك و خووشكێن ئێزدی ئەڤێن ئێخسیر كەتینە دەستێ داعش و كرین و فرۆتن ب وان هاتی كرن و كارێن هۆڤانە دەرهەقێ وان هاتین ئەنجام دان لڤی سەردەمێ پێشكەفتی، كو جیهان هەموو پێكڤە یە مژوولی رزگاركرنا ژنێ و هزرا هندێ دكن كا چاوا بەرهەنگاری نەمانا توندوتیژیێ بن بۆ ئازادی و ئاشتیخوازیا ئافرەتێ و ھێدی نەھێلن ژن تەپەسەر بمینت، لێ بەروڤاژی ل وەلاتێ مە كرین و فرۆتن ب كچ و ژن و بووك و دەیكێن مە ھاتەكرن و ھەتا نھا ژی ب ھەزارا ژنێن ئێزدیان یێت دەستێ داعش دا دگەل ھندێ ئەڤێن ھاتین رزگاركرن ژی بەشەكی ھەرە زۆر ژڤان یێ خۆ سێدارەدەن و خۆ سۆژن ژ بێ پوتەیا چڤاكێ دەولی و نیشتمانی كو ئەڤە ماەویێ (٧) سالانە ئەڤ ژنێن ھاتین رزگاركرن چ گرنگیەكا وەسا پێ نەھاتیە دان ژیانەكا بێ سەر و بەر د بن چادرا دا ب رێڤەدبن ،هەر چەندە ئافرەت ل رۆژهەلاتا ناڤین ب رەنگەكێ گشتی هاتیە چەوساندن وتەپەسەركرن و هەتا رادەكی كار دئێتە كرن بۆ نەمانا ڤێ توندوتیژیێ و ب مافێ خۆ شاد بت،لێ ژنا ئێزدی بێ ئۆمێد بوویە ل ڤان هەلكەفتا و گوتگۆتكا و نەتەوەیێن ئێكگرتی و جیهانا پێشكەفتی و رێكخراوێن جڤاكێ سڤیل و دەرەوێن بەرپرسا و پارتا و حكومەتا كو گرەنتیا ئازادیا ژنا ئێزدی هەبت و جارەكا دی نەكەفتە دەستێ چو نەیارا و كرین و فرۆتن پێ نەھێتەكرن و دەست درێژی ل سەر نەھێتە كرن ئەڤ باوەری كێمە د دیتنا ژنا ئێزدی دا ، ژبەركو هەتا ڤێ رۆژێ كرین و فرۆتن ب كچ و دەیكێن مە د ئێنە كرن و ئەڤ جیهانا بەرهەنگاربوونا توندوتیژیێ بێ دەنگە هەموو دكەر و لالن ،دێ چاوا جارەكا دی باوەریا وان لڤێ جیهانێ ئێت ژبەر ئیسلاما توندرەو ل رۆژهەلاتا ناڤین بژیت نەخاسمە سەرهلدانا چەند پارت و لایەنێن سیاسی تایبەت ل عێراقێ و كوردستانێ مینا پارتا دەعوە و كـۆمەلا ئیسلامی و ئێكگرتوو و بزاڤا ئیسلامی ،بێشك ترسا ئێزدیا زێدەبوویە ژ ڤان پارتێن دەستهەلات مینا پارتا دەعوە و گرۆپێن چەكدارێن شیعی ل عێراقێ و دروستكرنا حەشدا شەعبی كو چوو جوداهی دناڤبەرا وێ و داعش دا نینن تەنها مەزهەب ئێك سووننەیە و ئێك شیعەیە نهۆ حوكمی ل عێراقێ دكن و دەستهەلات ب تەمامی كەفتیە دەستێن وان و لدووڤ یاسایێن شەریعەتا شیعی و قم و تەهران تەشریعا یاسایێ ل پەرلەمانێ عێراقێ دكن تایبەت بەری چەند سالا پرۆژەك ئامادەكربوو ل پەرلەمانێ عێراقێ بۆ شوودان و ماركرنا كچێن تەمەن (٩) سالی وئەم یێ ل وێ باوەریێ دێ بەردەوام لسەر ڤێ رێبازا شیعی كاركەن و زێدەگاڤی دێ هەبن لسەر ئافرەتێ و لبن پەردا ئایینی دێ مافێ ئافرەتێ ئێتە پێشیلكرن و تەپەسەركرن،ژبەركو پارتێن ئایینی یێ حوكمی دكن ، هەر چەندە لڤان سالێن بۆری پشتی روخاندنا رژێما گۆربەگۆر درێیا رێكخراوێن جڤاكێ سڤیل و پارتێن علمانی ل عێراقێ و كوردستانێ پێنگاڤێن باش هاتینە هاڤێتن بۆ رێزگرتنا مافێ ئافرەتێ نەخاسمە بەرنامە و پرۆژێ حكۆمەتا ھەرێما كوردستانێ ،لێ جیێ داخێیە پارتێن ئیسلامی ل عێراقێ جارەك دی كەفتیە بن باندۆرا ئیرانێ و بیروباوەرێن خۆ سەپاندینە لسەر مللەتێ عێراقێ بگشتی،ب دیتنا كچا ئێزدی ئەگەر ئافرەت ل عێراقێ و كوردستانێ ئازاد بت ژلایێ مافێ خۆ و بەرهەنگاری توند و تیژیێ نەبت دێ پێنگاڤێن باش ھاڤێت و دێ خو ل وەلاتێ خو كەت خودان و ئامادەیا چەكێ شەرەفێ ژی ھلگرت ژ بو بەرخودانا وەلاتێ خو و مل بملێ زەلامی وەلاتێ خو دێ ئاڤاكەت ، ھێڤیدارین ل ڤێ رۆژا(١١/٢٥)رۆژا بەرهەنگاربوونا توند و تیژیێ دژی ئافرەتێ ل جیهانێ رێكخراوێن چڤاكێ سڤیل دگەل نەتەوەیێن ئێكگرتوو و حكۆمەتا ئیراقێ و كوردستانێ ھەوڵێن بتر بھێنە ھاڤێتن و خو ل ژنا ئێزدی بكەن خودان و ئەڤێ ترس و لەرزێ ژ دلێ وان دەرئێخن، ژبەر كو ژنا ئێزدی ترسا فەرمان و هاتنا داعش لپێ ناڤەكێ دی هەیە و دێ هەبت، ئەڤجا پتریا ژنا ئێزدی دخوازت ل ئەورۆپا بژیت هەم ژ ئیسلاما توندرەو دێ رزگار بت و دور كەفت هەم دێ ب مافێ خۆ شاد بت و دێ ژ توند و تیژیا زەلامی ژی رزگاربت نەبوونا توند و تیژیێ ب ھەر حالەكی مافێ ژنا ئێزدی یە سەربست و ئازاد بژیت پشتی ڤان دەردەسەریا و ئێش و ئازارێن دیتی بتریا ھەر ژنەكێ ل جیھانێ ل ڤێ رۆژێ دھێتە خاستن پالپشتیا ژنا ئێزدی بھێتە كرن .
تُتاح هذه الصورة أيضا في: کوردی