مەلا میكائیل هەركی نموونا پێكڤەژیانێ
هۆگر نەجیب
پێكڤەژیان واتە ژیانكرنا كۆمەكا مرۆڤان د سنوورەكێ جوگرافی دا رەنگە ئایدۆلۆژیا وان یا هزری یان یا ئاینی یان ژی ژلایێ رەنگێ پیستی ڤە ژێك د جودا بن، لێ ئەڤ كۆما جیاوازیان نابت ببنە ئەگەرێ ئالۆزكرنا جڤاكی یان هەر گرۆپەكی، بەلكو جوانتر و مفاداری یە ئەڤ كۆما جیاوازیان بێنە قەبوولكرن و پەیوەندیێن درێژخایەن دناڤ كۆمەلگەهێ دا لسەر بێنە دروستكرن.
كوردستان یە پێكهاتیە ژ كۆمەكا پێكهاتێن جودا یێن ئاینی و نەتەوەیی، هەموو لسەر ئێك جوگرافیێ دا دژین ئەو ژی كوردستانە و د هەموو ئەركێن نشتیمانی دا پشكدارن ئەڤەژی بوویە جوانیەك و پەناگەهەكێ ئارام بۆ ژیانكرنا نەژادێن لێ دژین و جیهان ب گرنگی ڤە تەماشە دكت، ل رۆژێن بۆری دا مەلا میكائیل هەركی ل مزگەفتەكێ ل هەرێما كوردستانێ بابەتەك ئازراند ئەو ژی (ئێزدی پێكهاتەكا كوردستانی یە، پێتڤیە بتر پەیوەندیێن نشتیمانی ب پێكڤەژیانێ خورتر بكەین) ئەڤێ گۆتارێ رەنگڤەدانەكا مەزن دناڤ جڤاكێ كوردستانی ب گشتی و ئێزدیان ب تایبەتی پەیداكر و ئێزدیان ب گرنگی ڤە پێشوازی ل گۆتارێ كر.
ئاین بۆ هەر كۆمەلگەهەكێ هاتبت ئارمانج ژێ ئەو بوویە كو هەر كۆمەلگەهەك رێكخستنێ د ژیانا خۆ یا ئاینی و كۆمەلایەتی دا بكت و پەیاما مرۆڤایەتیێ رەنگڤەدایە واتە پەیاما هەموو ئاینان مرۆڤایەتی و پێكڤەژیانا دناڤبەرا ئاینان و نەتەوانە، ل كوردستانێ ژی گەلەك ئاین هەینە مینا موسلمان و ئێزدی و مەسیحی و كاكەیی، و نەتەوە ژی مینا كورد و عەرەب و توركمان و كلد و ئاشووری…هتد.
تُتاح هذه الصورة أيضا في: کوردی