گێچ و بەر و هێتون دگەل جارێن جاران
ئلیاس نعمۆ خەتاری
هەر دەڤەرەكا گێچ لێ هەبت دبێژنە وێ دەڤەرێ گێچین هەلبەت دەڤەرێن هۆسا دزاڤن ل گەلەك دەران و هەر خەلكەكی نێزیكی ڤان دەڤەران بەرێ گێچ بخۆ رادكرن بۆ مفا وەرگرتنێ، دەڤەرا بن كەندی ئێكە ژوان دەڤەران ئەوێن گێچ ل كەندێ وان یە زاڤ ، گوندێن ڤێ دەڤەرێ پێك هاتینە ژ خەتارێ و دۆغاتا و سریشكا و خەوشابا و نفێریێ لسەردەمێن بەرێ خەلكێ ڤان گوندان بخۆ گێچ ژ كەندی رادكرن ل رەخا گێچینێ و دەمێ گێچ رادكرن د كێشانە دەوروبەرێن گوندا و ل وێدەرێ كۆمدكرن پاشی دقوتان و هور دكرن و دكرنە كۆمك،هێتون لسەر وێ كۆما گێچێ ئاڤادكرن وەكی ئاڤایەكا كچكۆك و ژمارەكا كون و نەقەبا دئێخستنێ دگەل دەرۆكەكی ژبۆ ئینان و برنا گێچێ و سۆتنێ پاشی بەرەك لسەر سەرێ هێتونێ داتنا و ئاگرێ هێتونێ ب دەستێ هۆستایێن ڤی كاری دهاتە هەلكرن،هێتون ب شەڤێ دهاتە هەلكرن ژبەر گەرمیا ئاگرێ وێ و دەمێ ئاگر خۆش دبوو وەكی زمامیتكی دناڤا وان نەقەبانرا دكرە گورە گور هەتا گێچ هاتبا قەلاندن و نیشانا قەلاندنا گێچێ ئەو بوو دەمێ بەرێ لسەر سەرێ هیتۆنێ دهاتە قەلاندن دێ هۆستایی بەرەك هاڤێتبا وی بەری ل دەمێ لێ دكەفت دڤیا بەكژیبا ئانكو هووربا ل وی دەمی هێتون ڤەتمراند و بجهـ دهێلان هەتا سبێ دا ساربا رامانا وێ ئەو بوو ئانكو گێچ باش وا هاتیە قەلاندن،پاشی گێچ رادكرن و دهاتە بكارئینان ژبۆ ئاڤاكرنێ.
راكرنا بەرا:تایبەت ل گوندێن بەر چیا و بەر كەند و كەندە هوركا گەلەك ئەڤ كار برێڤە دچۆ و زەلامێن ئێزدی دچۆنە كارێ بەر راكرنێ ئانكو دچۆن بەرێت مەزن دێ شكاندبان و كربانە بەرێت كچك داكو بكێر لێكرنێ و ئاڤاكرنا خانی و قەسرا بێن و لسەر پشتا دەوارێن بارهلگر دكێشانا ناڤ گوندی و دكرنە كۆم ژبۆ ئاڤاكرنێ، شێوە و قەبارێ بەرا كارێ كەسێن خودان ئەزموون و شارەزایێن كارێ راكرنا بەرابوو ژبەركو هندەك جاران بەر دڤیا د هووربان و هندەك جاران دڤیان د مەزن بان ئەڤە ژی لدووڤ كارێ ئاڤاكرنێ دەما كا چی جۆرێ مالێ دێ هاتبا ئاڤاكرن،چێكرنا ئامیرێن پێتڤی ژ بەری:ل دەمێ راكرنا بەرا ژ جیێن تایبەت ب راكرنا وانڤە هندەك كەسێن شارەزایێن ڤی كاری گەلەك جۆرێن تشتان ژبەران دروست دكرن لدووڤ پێتڤیێن وی سەردەمی ژوانا چێكرنا دنگا ژبۆ قوتانا دەخلودانی، دنگ ژبەرەكی مەزن دهاتە چێكرن ب شێوەكی بازنی و نیڤەكا وی دهاتە ڤالایكرن ژبۆ دروستكرنا جیێ دارێ زڤراندنا دنگێ،قەحفك دهاتە چێكرن ژبەری بۆ ئاڤێ و ئاڤ ڤەخوارنا دەوارا ئێت مەزن هەبوون و ئێت كچك هەبوون، جۆنی دهاتنە چێكرن ژ بەری و دهاتنە بكارئینان ژبۆ قوتانا دەهنی و گەنمی و هەر خوارنەكا هەبا ، بەرێ گرێدانێ بەرەكی مەزن بوو دهاتە بكارئینان بۆ گرێدانا دەوارا دا نەرەڤن و دوور نەچن.
چێكرنا بەرێن تایبەت ب دەربازبوونا ئاڤێ دبنرا كو دگۆتنێ عەبارە ل پێشیا دەرگەهێن مالا داتنان ژبۆ دەربازبوونا ئاڤا مالێ و ئاڤا بارانێ و چێكرنا هندەك جۆرێن بەرا بۆ كێشانێ كو دهاتنە بكارئینان بۆ پیڤانا تشتان لسەر تەرازۆیێ لدەمێ كرین و فرۆتنا تشتان،ئانكو پیڤەربوون بۆ وی كاری بنێ دەرگەهـ دهاتنە چێكرن ژبەری ل دەمێ دانانا دەری دڤیا دەری لسەر وی بەری هاتبا دانان داكو بێت و بچت ل دەمێ گرتن و ڤەكرنێ.
تُتاح هذه الصورة أيضا في: کوردی