بابێ رۆژانێ ستێرەكا نووی ڤەمری
سەگڤان شنگالی
بابێ رۆژانێ مامۆستا و نڤیسەر و راوێژكارێ جڤاتا رۆحانی یا ئێزدیا و پێشمەرگەیێ شۆرەشا گولانێ،ناڤێ وی یێ دروست (فەهمی حەسەن عەمەر)ە یێ بەرنیاس ب (فەهمی بابێ رۆژانێ) یان (فەهمیێ قریسكێ) ل سالا(1952)ێ ل گوندێ كەورێنیێ ل دەڤەرا سلێڤانیا ل قەزا زاخۆ ژ دایك بوویە، بەلێ ژبەر شۆرەشا ئەیلولێ و هەستێ وی یێ نەتەوەی چەندین جاران دگەل مالباتا خۆ ئاوارەیی شنگال و شێخان و باعەدرێ بوویە و بۆ جارا داویێ ل باعەدرێ ئاكنجی بوویە.
فەهمی حەسەن قۆناغێن خووندنا خۆ یا سەرەتایی ل دێرەبوونێ و گوهبەل و یا ناڤنجی ل شێخان و شنگال و یا ئامادەیی ل مووسل ب داوی ئینایە،مامۆستایەكێ تژی بوو ژ خزمەتێ بۆ جارا یەكێ بۆ دەمێ شەش هەیڤا ل باژارێ بەغدا بەشداری بوویە د خۆلەكا بەرهەڤكرنا مامۆستایان دا و ل سالا(1977)ێ بوویە مامۆستا و(38)سالێن خزمەتا مامۆستایێ هەنە و گەلەك جاران بوویە رێڤەبەر و سەرپەرشت ل پەروەردا قەزا شێخان بۆ دەمێ یازدە سالان،هەروەسا راوێژكارێ جڤاتا رۆحانیا ئێزدیان بوویە، چەندین باوەرنامە هەبوون ژ وانژی دەرچوویێ كولیژا پەروەردا گشتی ل زانكۆیا سانت كلیمینتس یا بریتانی و ماستەر ب دەروونزانیا پەروەردێ ل زانكۆیا سانت كلیمینتس یا ئازاد هەبوویە و هەروەسا بوویە پێشمەرگە ل شۆرەشا گولانێ و ب گرانی بریندار دبت.
د ئالیێ نڤیساندن و رۆژنامەڤانیێ دا خزمەتەكا بەرفرەهـ كریە و هەر جیەكێ لێبایە خزمەتا وی یا دیاربوویە، كارێن وی یێن رۆژنامەڤانیێ بۆ نموونە:
_بتر ژ دەهـ سالان پەیامنێر بوویە ل رۆژناما پەیمان و ئەڤرۆ.
_ئەندامێ سەندیكا رۆژنامەڤانێن كوردستانێ/لقێ دهۆكێ بوویە.
_بەرپرسێ پشكا كوردی بوویە ل رۆژناما دەنگێ لالش بۆ دەمێ چار سالان.
_سەرۆكێ ئێكەم بنگەهێ لالش تایێ باعەدرێ بوویە.
_سەرنڤیسەرێ ئێكەم گۆڤار ل باعەدرێ بوویە بناڤێ سلاڤگەها لالش و دیسان ژی بەرپرسێ دەزگەهێ دم دم تایێ باعەدرێ بوویە.
و د ئالیێ كارێ رێكخراوان دا ژی یەك ژ دامەزرینەرێن رێكخراوا ئەلند بوو بۆ دیموكراسیكرنا گەنجان ل دهۆكێ،دئالیێ نڤیساندنێ دا چەندین راپۆرت و ڤەكۆلین لدۆر ئێزدیاتیێ و نەتەوا كورد و دیرۆكا كەڤن یا كوردی د رۆژنامە و گۆڤارێن دەڤەرێ دا بەلاڤكرینە و وەشاندینە ژ وانژی(لالش،مەحفەل،پەیڤ،ئاسۆیێ پەروەردە،دەنگێ پێشمەرگە،نور لالش،چرایێ لالش)…هتد.
هەروەسا چەندین پەرتۆك چاپ و بەلاڤكرینە ژ وانژی:
1_دەولەتا كوردی بەری زاینی، میتانی و هوری وەك نموونە.
2_ئێزدیاتی پاشمایێ میترایێ نە.
3_ئێزدی و زەردەشتی د هەڤسەنگیا دیرۆكێ دە.
4_ئۆلێن دێرینێن میزۆپۆتامیا و زاگرۆسیان.
5_ (گرق التدریس و أپرها علی نسب النجاح)ب زمانێ عەرەبی یە.
ژ هەژی گۆتنێ یە كو دڤان دەمێن داویێ دە پەرتۆكا خودێ ژێ رازی یا بناڤێ(ئێزدی و زەردەشتی د هەڤسەنگیا دیرۆكێ دا) ژلایێ بنگەهێ لالش یێ رەوشەنبیری و كۆمەلایەتی ڤە هاتیە چاپكرن،بەلێ ب مخابنی ڤە خودێ ژێ رازی نە گەهشت رێورەسمێن بەلاڤكرنا پەرتۆكا خۆ ببینت و ژبەر نەخۆشیا وی یا بەردەوام ل رۆژا(4/7/2021)ێ ل وەلاتێ ئەلمانیا دلێ وی یێ مەزن و تژی ژ رەوشەنبیری ژ لێدانێ سەكنی و وەغەرا داویێ كر.
تُتاح هذه الصورة أيضا في: کوردی