روودانا كەمپا شاریا بەردەوامیا جینۆسایدا ئێزدیانە
سەگڤان شنگالی
ل رۆژا(3ی تەباخا2014)ێ دەولەتا ئیسلامی ل عێراق و شامێ ناڤدار ب رێكخراوا تیرۆرستیا(داعش) دەڤەرا شنگال داگیركر و جینۆسایدەكا مەزن بسەر ئێزدیان دە ئانی ل وێ دەڤەرێ، بگرە ژ كوشتن و گرتن و رەڤاندن و خرابكرنا مالان و ژ ئەنجامێ ڤێ فرمانێ خەلكێ شنگالێ ئاوارەی هەرێما كوردستانێ و باكوور و رۆژئاڤایێ كوردستانێ بوون.
نێزیكە هەفت سال دەربازبن ب سەر وێ جینۆسایدێ رە و سەرەرای ئازادكرنا شنگال ژ تیرۆرستێن داعش لێ هیشتا خەلكێ شنگالێ ئاوارەنە و بەهرا بتر ژ وان ل كەمپان دا ژیانا خۆ دەرباس دكن و رۆژانە ئەم ب چاڤێن خۆ دبینن كو جینۆسایدا خەلكێ شنگال یە بەردەوامە و هەر خەلكێ مە یێ بەلەنگاز دناڤ كەمپان دا د رەوشەكا خراب دا ژیانا خۆ دەرباز دكن،بەلكو رۆژ بۆ رۆژێ رەوش یا خرابتر دبت و روودانێن وەك( شەواتا چادرێن كەمپا، خۆكوشتن،كۆچا بەردەوام بۆ وەلاتێن رۆژئاڤا)،و چەندین روودانێن دی دیدەڤانن لسەر بەردەوامیا ئازار و دەردەسەریێن ئێزدیان.
روودانا ئاگربەربوونا كەمپا شاریا یا بەری چەند رۆژا ئێك ژ وێ روودانا هەرە نەخۆش و دل شەوات بوو،ژبەركو دیسان خەم و دەرد و مالوێرانی ل بیرا مە ئانین كو د وێ روودانێ دا نێزیكی(400) چادرێن ناڤ كەمپێ شەوتین و ژمارەكا مەزن یا ئاوارەیان دیسان بێ مال و حال مان و پەریشان بوون، ب خۆشبەختانە ڤە هیچ زیانێن گیانی نەبوون لێ زیانێن دارایی یێن مەزن هەبوون كو ئەو كەلوپەلێن ناڤ مالێ یێن ل دەمێ هەفت سالان دا كۆمكرین ژبۆ خۆ د وێ روودانێ دا شەوتین.
تُتاح هذه الصورة أيضا في: کوردی