ژن، کوشتن و خوەکوژی
جوان عزه‌ت
کوژتن و خوەکوژی وەکو ئێک رویێ تاوانێ یە، نموونە ژنەک بەرەڤ کوژتنێ دچیت، ژنەک دی هەولدەت خوە بکوژیت، پرسیار چاوان یان بۆچی؟ ،دەمێ ژن وەسا هزرکەت، کو جەستەیێ وێ مولکێ کەلتوورەکێ یان خوەدانەکێ یان کەسەکێ یە، هینگێ ئەو تاوانا کوژتنێ ددەتە خوە، هەروەها دەمێ ئەو هزردکەت جەستەیێ وێ ئالاڤەکێ بکارئینانێ یە، هینگێ ئەو ب رێکا دەست درێژیکرنێ تاوانا خوەکوژیێ دەتە خوە، چونکو ل گور یاسایێن نەریتێ رۆژهەلاتێ ب تایبەتی یێن کوردی ئەو رێزێ ل جەستەیێ خوە ناگریت و وەسا فێربوویە، کو پەروەردە گرێدای دەستکاریکرنا جەستەیی یە، ئەڤجار چ ب رێکا جوانکاری، نیشتەگەری، یان ژی جورێن مودە و دیاردەیان،ل جهێ ئەو هزر د بەرهەمهێنانێ دا بکەت بۆ داهێنانێ، مخابن هزر د بکارئینانێ دا دکەت، بێ کو وەک مرۆڤەک هزربکەت، کو ئەو خوەدانا جەستەیێ خوە یە. ل سەر ڤێ پەروەردێ ئەو هوسا تێدگەهیت ئەگەر ئەو وەنەکەت ئەرێ پا دشێت چ بکەت؟!،ژ بلی ڤێ نزانیت، کو ئەو کالەبوونا خوە پتر ل سەر ڤان بنگەهێن نەزانینێ دئینیتە بەرهەم، ژبەرکو هێشتا ئەو زاروک فێرنەبوویە هزر بکەت و بێژیت، ئەگەر ئەز نیشتەگەریەکێ د ناخێ دا خوە بکەم، ئەرێ دێ چ جورە شارستانیەت دناڤ ئەقلێ من دا رویدەت؟ یان ئەگەر ئەز خوە ل سەر کریارەکا ئەقلانە ئاڤابکەم ئەرێ وی دەمی ژیان دێ ل سەر بوونا من چاوان دناخێ مێر و جڤاکی دا هێتە خواندن و بەرهەم؟،ب ڤی مەرجی بەراوردکرنا پەروەردا ژنێ، ل سەر تێگەهێ روکەشیێ خالا مەعریفەیەکا بێ بوون، بێ داهێنان، بێ زانین و بێ کەرامەت بەرجەستەکریە، هەروەها قیمەمێ (مرۆڤ) ئێخستیە د بچووکترین پێناسە دا،گرنگە ژ نها و پێدا ژن رولێ خوە یێ مرۆڤی بزانیت و دایکاتیا خوە هەم ژ رویێ مەعریفی هەم ژ رویێ جوتیاری هەم ژ رویێ ئابووری و خێزانی و جڤاکی و دەستهەلاداریا دەولەتی بینیتە زمان نەکو خوە ب خزمەتکار و کاربدەست بزانیت.
تُتاح هذه الصورة أيضا في: کوردی
