جەژنا قوربانێ ل نك ئێزديان
مه‌هدى حه‌سه‌ن
ئەڤ جەژنە ب جەژنا قوربانێ یە ناڤدارە براھیم خەلیل كوڕێ خۆ نەبی سماییل كرە قوربانیا خودێ دلوڤان ، ئێكە ژ جەژنێن مە ئێزدیانە ئەڤ جەژنە وەكو جەژنێن دی یێن ئێزدیان نەیا جێگرە، بەلكو جھێ خوە دگھۆریت ھەر سال دەھ(١٠) رۆژا پێشڤە دئێت ، ھەر وەسا ئەڤ جەژن ڤەدگەریتە سەر دەمێ ئیبراھیم خەلیل و كورێ وی ئیسماعیل پێغەمبەر .
بابێ نەبیا براھیم خەلیلە
بۆ خودێ خۆ كربوو دەخیلە
قوربانیا خودێ خۆ كربوو سماییلە.
رێ و رەسمێن وێ ل پەرستگەھا لالش دھێنە گیران ، ل ھێڤارا جەژنێ و رۆژا جەژنێ سەما ژ بال زەلامێن ئولی ڤە ل سەرێ چیایێ عەرەفات د ھێنە كرن ، دیسا ھەر مالەكا ئێزدیان گیانەوەرەكی نێر ل سەر خاترا ئبیراھیم خەلیل و قوربانی یا سەرێ ئیسماعیل پێغەمبەر سەرژێ دكەت.
………………………….
چەند سەبەقە ژ قەولێ براھیم خلیل و نەبی سمایل
براھیم خەلیل دھات و دكر سلاڤە
نەبی سماییل ژ كەرەمێ سلاڤ ڤەدایە
یا براھیم خلیل توو ل سەر سەرێ من ھاتی و ھەر دوو چاڤە……
یا بكەم ھنداڤە
ھەی تەفالۆ یی زەرباڤە
چاوا دزانی من چی ناڤە
————–
ھەی بابۆ توو خاسی
تو ب خالقێ خۆ كەی و لباسی
عەسل زارە و كوڕ باب نەدیتی نەكەت ناسی
————–
براھیم خلیل دەست ل ستۆیێ وەرانی
ئەمین جبراییل نازلبوو ژ بانی
یابراھبم ئەمین جبراییل روحا نەبی سمایل ژتە دخوازی
——————
براھیم خلیل وێ د گورمژی
مینا ھێتوونەكا گەرم دلێ وی د سۆژی
كێ دیتییە باب كوڕێ خۆ ب دەستێ بكوژی
———————–
بڤێ یەكێ براھیم خەلیل ئێكجار تەنگاڤ و پوسیدە دبت :
سماییلی تەفالە
ژ دەشتێ دھاتە مالا
بابێ خەمەكە گران ل بالە
———————–
بابۆ ئەم درەواین
میرێ مەزن ژ ژور ئەم داین
ئەم ب قوربانیا خودێ د شاین
ئینا نەبی سماییل داخاز ژ دەیكا خو كر كو شیرێ خۆ لێ حەلال بكەت ….
سماییلی تەفالە
وێ دبێژتە دیا كالە
دایێ شیرێ بەرێ خۆ ل من بكە حەلالە
ھاتە سەر من مەرسووما باری تەعالە
———————
ئەو ماكا ب ناڤ ھاجرە
شوشتبوون جل و سەرە
گۆت لاوۆ شیرێ من حەلال بوو ژ جانێ تەڕا
———————
ئەو كێرا وەكە خشتە
سێ جارا د گەردەنا نەبی سماییل را د ھشتە
كێرێ دەڤ وەرگەرا بوو پشتە
براھیم خلیل گوتە كێرێ توو ھندە یە تووژ چما توو ستۆیێ نەبی سمایل نابڕیە ! كێرێ گۆت : دەستووری ژ با خودێ نینە.
كێرێ وە جەواب دایە
یا براھیم من چی خەتایە
ژ با خودێ نەھاتبوو رەدایە
ھنگی خودێ دلۆڤان بەرانەك ژ عەزمانا ھنارت و ب قوربانیا سەرێ نەبی سماییل قەبلاند
ژ قەولێ پیری خدر
بلا بەرانەك نازلبت ژ ھەدر
قوربانیا سەرێ نەبی سماییل دكر
——————–
ئەو بەرانێ ھڕاندی
ھۆریا ھەفت سالا ل بەھشتێ چێراندی
قوربانیا سەرێ نەبی سماییل قەبلاندی
————————-
ئەو بەرانێ بەلەكە
ھاتبوو ژ خزینا خالقە
قوربانییا سەرێ نەبی سماییل دكە
بەرانەك ژ بانا د ھاتی
كەلی بوو ل وێ سماتێ
مە و حازر و گوھدێرا بەھر ھەبیت ل وێ سماتێ
((ئەم د كێمین و خودێ یی تەمامە))
تُتاح هذه الصورة أيضا في: کوردی
