نڤیسینگەها لالش داخوازیێن ئاوارەیێن دێرەبوونێ دگەهینتە جهێن شۆلەژێ
دیدار:شمال خدر
هەر ژدەستپێكا كارەساتا شنگالێ ل رۆژا 3/8/2014 دەمێ خەلكێ مەیێ شنگالێ ئاوارەیی دەڤەرێن ئارامێن هەرێما كوردستانێ بووین،ژمارەكا زۆر ژ وی خەلكی ل دێرەبوونێ و دەوروبەرا ئاكنجی بوون،بەرپرسێ نڤیسینگەها لالش ل دێرەبوونێ(رێزان كچل) دیاركر، ئەم بەردەوام كار دكن بۆ گەهاندنا خواست و داخوازیێن ئاوارەیان بۆ جهێن شۆلەژێ و رێكخراوێن نێڤ دەولەتی،هەتا نۆكە ژی ئەم هەردەم هایداری رەوشا ئاوارەیێن شنگالێ و دەشتا مووسلێ ینە.
بەرپرسێ نڤیسینگەها لالش ل دێرەبوونێ ( رێزان كچل ) بۆ دەنگێ لالش دبێژت:هەر ژ رۆژا 3/8/2014 دەمێ خەلكێ مەیێ شنگالێ ئاوارەیی دەڤەرێن ئێمناهیێن هەرێما كوردستانێ بووین و ژمارەكا زۆر ژ وی خەلكی ل دێرەبوونێ و دەوروبەرا ئاكنجی بوون ،مە وەك دەستەكا رێڤەبەریا نڤیسینگەها خۆ یا لالش ل دێرەبوونێ دگەل چەند گەنجان ئەم رابوون ب ترومبێلا مە ئاڤا ڤەخوارنێ لگەل خۆ بر و چوونە سەر پرا سحێلا ،ژبۆ پێشوازیكرنا وان پشتی هنگی ژی مە جه بۆ دابینكرن و دەرگەهێن هەموو قوتابخانان ل دەڤەرێ مە بۆ ڤەكرن.
دبەردەوامیا ئاخفتنا خۆ دا گۆت:مە لژنەكا چەند كەسی پێك ئینا،ژبۆ برێڤەبرنا كاروبارێن ئاوارەیان وبەلاڤكرنا كەل و پەلێن خوارنێ ب سەر واندا،دیسان گەهاندنا دەردو ئێش و داخوازیێن وان ژبۆ جهێن شۆلەژی و رێكخراوێن نێڤ دەولەتی ومافێن مرۆڤی ،ژبۆ وێ چەندێ كو بەردەوام هاریكاری بگەهنە وان.
دەربارەی هاریكاریكرنا ئاوارەیان ناڤهاتی ئاشكەراكر،مە چەندین كەل وپەلێن خواندنێ ل سەر قوتابێن ئاوارە ل دەڤەرێ بەلاڤكرن ،دیسان ب هەلكەفتا جەژنا رۆژیێن ئێزی مە كەل وپەلێن خوارنێ ل سەر ژمارەكا زۆر ژ خێزانێن بەلەنگاز بەلاڤكرن،سەرەرای وێ چەندێ كو هێشتا ئاڤاهیێ نڤیسینگەها مە تژی ئاوارەنە دناڤدا،لێ ئەم هەر بەردەوامن ل سەر بزاڤ وچالاكێن خۆ و گەهاندنا خواست و داخوازیێن وان بۆ جهێن شۆلەژێ و رێكخراوێن نێڤ دەولەتی،هەتا نۆكە ژی ئەم هەردەم هایداری رەوشا ئاوارەیێن شنگالێ و دەشتا مووسلێ نە ودێ بەردەوام دخزمەتا واندا بن وهاریكاریا وان كن،ژبۆ باشتركرنا ژیانا وان دهەموو بیاڤاندا.
سەبارەت بەرنامەیێ نڤیسینگەهێ (رێزان كچل) گۆت: وەك نڤیسینگەها لالش ل دێرەبوونێ دێ مە بزاڤ وچالاكیێن زێدەتر هەبن ل دەڤەرێ،بۆ خزمەتكرنا ئاوارەیان ب تایبەتی.
تُتاح هذه الصورة أيضا في: کوردی