د پلانا بنگەهێ لالش دایە نوێنەراتیێن خۆ ل وەلاتێن بیانی ڤەكەت
تۆرا لالش:
دناڤا ئێزدیان دا بنگەهێ لالش یێ ڕەوشەنبیری و كۆمەڵایەتی،ئێك ژ ناڤەندێن مەزن یێن ڕەوشەنبیرییە كو ل سەر ئاستێ جیهانێ كار دكەت بۆ ڕەوشەنبیركرن و پێگەهاندنا خەلكی و گەنجان، د پلانا بنگەهێ لالش دایە نوونەراتیا خۆ ل وەلاتێن بیانی یێن ئێزدینشین ڤەكەت.
دەربارەی گرنگیا ناڤەندێن ڕەوشەنبیری دناڤ ئێزدیان دا(كاروان باعەدری)بەرپرسێ بەشێ ڕاگەهاندنا بنگەهێ لالش بۆ دەنگێ لالش خویاكر،هەلبەت دناڤ هەر كۆمەلگەهـ یان جڤاكەكی دا تەخا ڕەوشەنبیران بۆ پێشڤەبرنا وی جڤاكی و ڤەكرنا ناڤەندێن ئەكادیمی و ڕەوشەنبیری كار دكەن و هەر بۆ ڤێ مەرەمێ باندۆرەكا گەلەكا مەزن ل سەر پێشڤەبرنا وی جڤاكی یا هەی و ناڤەندێن ڕەوشەنبیری دبنە ئەگەر،چنكو داینەمۆیێن پێشڤەبرنا جڤاكی نە،هەروەسا دناڤ ئێزدیان ژی دا بنگەهێ لالش یێ ڕەوشەنبیری و كۆمەڵایەتی هەیە كو ناڤەندەكا مەزن یا ڕەوشەنبیری و كۆمەڵایەتی یا مە ئێزدیانە كو ل سەر ئاستێ جیهانێ كار دكەت،ئارمانجا بنگەهی ژی ڕەوشەنبیركرن و پێگەهاندنا خەلكی و گەنجانە ژ بۆ ڤێ یەكێ ژی نێزیكی نیڤ چەرخی یە بنگەهێ لالش ژ پێخەمەتی جڤاكێ مە ئێزدیان كار دكەت.
هەرل دۆر ئارمانجێن بنگەهێ كاروان باعەدری گۆت:ئێك ژ كار و ئارمانجێن دی یێن بنگەهێ لالش جڤاكێ ئێزدی هشیار بكەت و ب جیهانێ بدەتە ناسین،پشتی كۆنگرێ چاردێ بنگەهێ لالش كارنامەیەكا ستراتیژی یا بەرفرەهـ ژبۆ ڤەكرنا چەندین نڤیسینگەهێن دی خەباتێ دكەت داكو ل هەموو ناڤچەیێن ئێزدیان و هەر جیەكێ ئێزدی لێ هەین تا یان نڤیسنگەهەكا بنگەهێ لالش بێتە ڤەكرن،هەروەسا ل سەر ئاستێ وەلاتێن بیانی ژی ئەوێن ئێزدی لێ دمینن د پلانا بنگەها لالش دایە نوونەراتیا خۆ لێ ڤەكەت، هەلبەت ناڤەندێن دی یێن ڕەوشەنبیری ژی هەینە،دیسان بنگەهێ لالش كار ژ بۆ وێ چەندێ دكەت پەیوەندییان دگەل هەموو ناڤەندێن ڕەوشەنبیری گرێ بدەت ئەوژی ل سەر بنیاتێ وان بنەمایێن خەلك ل سەر دژین.
دبەردەوامیا ئاخفتنا خۆ دا گۆت:پشتی كۆمكوژیا ئێزدیان یا ساڵا 2014ێ و بەری هنگی ژی بنگەهێ لالش بەردەوام ژ بۆ وێ چەندێ كار كریە كو ل سەر ئاستێ هشیاری و ڕەوشەنبیری یێ خەلكێ ئەو نڤیسین و بەلگەیێن ل سەر ئێزدیان دئێنە نڤیسین ئەو ب خۆ بنڤیسن،هەروەسا ئەوێن كو خەلكی ژی ل سەر نڤیسین كۆم بكەت و دناڤا خەلكی دا پارڤە بكەت،هەر دیسان پشتی ساڵا 2014ێ و ئالۆزی یا كەفتیە د ناڤچەیێن ئێزدیان دا ب تایبەتی ژی شنگال و دەشتا نەینەوا قوربانیێن ڤان ئالۆزیانە و ژبەر وان ئالۆزیێن ل دەڤەرێن ئێزدیان خەلكی نكاریە ناڤەندێن ڕەوشەنبیری ل دەڤەرێن خۆ ڤەكەن،ڕێ بمە نەهاتیە دان بنگەهێ لالش ل وان ناڤچەیان كارێ خۆ ب دروستی بكەت،هەر چەندە پشتی ڤەقەتیانا مە ژ وان ناڤچەییان بنگەهێ لالش دناڤ كەمپاندا كار و خەباتا خۆ بەردەوام كرییە،نەخاسمە ئەنجامدانا چالاكیێن ڕەوشەنبیری و هشیاركرنا خەلكی و ڤەكرنا ڤان ناڤەندا تشتەكێ پێتڤییە دناڤ ئێزدیان دا و پێتڤیە جڤاك گرنگیێ ب ڤان كارێن وەسا بدەت،لەوران ژی بنگەهێ لالش نەبتنێ ب ڤەكرنا ناڤەندێن ڕەوشەنبیری بەلكو ب پێشكێشكرنا دیدارێن مەزن ژی ل سەر ئاستێ دەڤەرێن ئێزدیان ئەنجام د دەت و ب تایبەتی ژی بابەتێ ڤەگەڕیانا ئاوارە و ئاستەنگێن دكەڤنە د ڕێیا واندا.
بەرپرسێ بەشێ ڕاگەهاندنا بنگەهێ لالش دووپاتكر،بنگەهێ لالش دناڤ جیهانا دیجیتالی ژی دا كارەكێ مەزن دكەت،بۆ نموونە ڕۆژناما دەنگێ لالش ل سەرانسەری ناڤچەیێن ئێزدیان و ل سەر هەموو فەرمانگەهێن میری یێن پارێزگەها دهۆكێ ژی دئێتە بەلاڤكرن،هەروەسا سایتێ ئەلكترۆنی هەیە كو ب چەندین زمانان وەشانا خۆ دكەت و هەموو كاروچالاكیێن گرێدایی دەڤەرێن ئێزدیان لێ دئێنە بەلاڤكرن.
تُتاح هذه الصورة أيضا في: کوردی
