شێوەكارەك:پتریا كەڤالێن من یێن رەخنەیی نە ل سەر دیاردەیێن دناڤ جڤاكی دا پەیدا دبن
تۆرا لالش:
شێوەكارەكێ خەلكێ شنگالێ ب ڕێیا كەڤالێن خۆ دیاردەیێن نە د جوان یێن دناڤ جڤاكی دا پەیدا دبن بەرچاڤ دكەت و رەخنێ لێ دگرت،هەروەسا دخوازت پتر گرنگی ب هۆنەرێ شێوەكاریێ بێتە دان.
شێوەكارێ گەنج “صباح فێسەل خەلەف” خەلكێ شنگالێ یە، بۆ ڕۆژناما دەنگێ لالش خویاكر؛د تەمەنەكێ بچووك دا حەزا وێنەكێشانێ هەبوویە، هەر جارەكا روودانەك یان گوهۆرینەكا دناڤ جڤاكی دا روو بدەت ئەڤجا چ یا ئەرێنی یان نەرێنی بت ب ڕێیا شێوەكاریێ دەربرینێ ژ هەستێن خۆ دكەم،هەروەسا د ڤی بواری دا مالباتا من ب تایبەتی ژی دەیكا من پشتەڤانێن من بوون،دەیكا من هەر ژ زارۆكینیێ دا فێری شێوەكاریێ كرم و ئەڤە ماوێ پازدە ساڵایە ل سەر ڤی كاری یێ بەردەوامم.
هێشتا گۆت:بەهرا پتر تابلۆیێن من رەخنەنە ل سەر دیاردێن نە د جوان یێن دناڤ جڤاكی دا پەیدا دبن،وێنێن زەیتی ل سەر تابلۆیا چێدكەم،دیسان ل سەر پەركێت سپی ب پێنوسێ رصاصی و فەحمی و جۆرێت وێنێ( comics )ژی چێدكەم(قصص صوریە)،دیسان دڤێت جڤاكێ مە ب چاڤەكێ مەزنتر ل كارێ شێوەكاریێ و شێوەكاران بنێرت و پتر گرنگیێ پێ بدەن،ژبەركو شێوەكاری هۆنەرەكێ گەلەكێ جوانە و جڤاك ب هۆنەری پێش دكەڤت و مرۆڤ دكارت ب ڕێیا شێوەكاریێ ناما خۆ و مللەتێ خۆ بگەهینتە جیهانێ.
وی شێوەكاری ئەو ژی گۆت:پشتەڤانیكرنا شێوەكاران گەلەك یا كێمە و مە گەلەك بەهرەمەند هەنە بەردەوامیێ ب كارێ خۆ نادەن،چنكو پشتەڤانی یا ماددی و مەعنەوی نینە یانژی یا كێمە، هۆنەر ئانكو ژیان ئانكو جوانی تشتەكە سەرەنجا خەلكێ رادكێشت، مرۆڤ دكارت ب ڕێیا هۆنەری دەربرینێ ژ هەستێن خۆ و هەر تشتەكێ دیتر بكەت، ل پاشەرۆژێ دا من دڤێت تابلۆیێن من ب ناڤ وندەنگ بن و پشكداریێ ل پێشانگەهێن بیانی یێن هۆنەری دا بكەم، داكو بكارم ناما مللەتێ خۆ بگەهینم.
ناڤهاتی دا زانین ژی ل سەر هندەك تابلۆیان كار دكەم كو ناڤەرۆكا وان ل سەر كۆمكووژیا ب سەرێ خەلكێ شنگالێ دا هاتی یە،هەروەسا ل بەرە بۆ سالڤەگەرا نەهێ یا كۆمكووژیێ پشكداریێ د پێشانگەهەكێ دا بكەم.
تُتاح هذه الصورة أيضا في: کوردی
