حكومەتا عێراقێ‌ دەڤەرێن ژ دەرڤەی ئیدارا هەرێما كوردستانێ‌ پشتگوه هاڤێتینە

حكومەتا عێراقێ‌ دەڤەرێن ژ دەرڤەی ئیدارا هەرێما كوردستانێ‌ پشتگوه هاڤێتینە
تۆرا لالش:
حكومەتا عێراقێ‌ ب چاڤەكێ‌ كێم تەماشەی دەڤەرێن كوردستانی یێن ژ دەرڤەی ئیدارا هەرێما كوردستانێ‌ دكەت،ئەو دەڤەرنە بووینە قوربانی دوو ئیداریێ‌ و هاتینە پشتگوه هاڤێتن و ژ هەر جۆرە خزمەتگۆزاریەكێ‌ د بێ‌ بەهرن،ب تایبەت گوند و كۆمەلگەهێن ئێزدیان.
خالیدا خەلیل،پەیڤدارا بارەگایێ‌ بارزانی بۆ دەنگێ‌ لالش دیاركر,ئەڤ دەڤەرێن دوو ئیداری دەڤەرێن پێكهاتانە و بووینە قوربانیێ‌ دوو ئیداریێ‌،د راستی دا ئەو دەڤەر دەڤەرێن كوردستانی نە لێ‌ ژ كوردستانێ‌ هاتینە ڤەقەتاندن،ل ساڵا 2007ێ‌ پشتی دەنگ ل سەر دەستورێ‌ عێراقێ‌ هاتیە دان و مادا 140 بێتە بجهئینان لێ‌ هەتا نهۆ نەهاتیە بجهئینان،حكومەتا عێراقێ‌ ب چاڤەكێ‌ كێم تەماشەی دەڤەرێن كوردستانی یێن ژ دەرڤەی ئیدارا هەرێما كوردستانێ‌ دكەت،ئەو دەڤەرنە بووینە قوربانی و هاتینە پشتگوه هاڤێتن و ژ هەر جۆرە خزمەتگۆزاریەكێ‌ د بێ‌ بەهرن،پشتی حكومەتا عێراقێ‌ یا نوو هاتیە پێكئینان ل دووڤ ڕێككەفتنا پێكئینانا حكومەتا نوو لژنا مادا 140 جارەكا دی دەست ب كار ببە و بودجەیەكا تایبەت ژی بۆ وان دەڤەران بێتە تەرخانكرن و ئێك ژ پێنگاڤا لژنا ڤی ماددەیی جێبەجێكرنا ڕێككەفتنا شنگالێ‌ و زڤراندنا خەلكێ‌ وێ‌ یە و خالەكا دی یا گرنگ دیاركرنا سنوورێ‌ ئیداری یە.
دڤی دەربارەی دا شەهوان داسنی،نڤیسەرەكێ‌ ئێزدی یە بۆ دەنگێ‌ لالش دیاركر، ژلایێ‌ جوگرافی ڤە هێلا 36ژ كۆمەلگەها نسێریێ‌ دەستپێدكەت و ل كۆمەلگەها بابیرێ‌ ب داوی دئێت,ژبلی قوربانیێن گیانی و ماددی بووینە قوربانیێ‌ كێمبوونا خزمەتگۆزاریان و ب شێوەكی گشتی ژلایێ‌ ناحیا ئەلقوش ڤە هاتینە پشتگوهـ هاڤێتن،ل ڤێ‌ داویێ‌ هندەك پرۆژەیێن خزمەتگۆزاری بۆ دەڤەرێ‌ هاتینە و ماوەكێ‌ درێژە ب نیڤی ماینە و نەهاتینە بجهئینان،ماددا140 ئەگەرێ‌ سەرەكی یە كو هەردوو ئیدارە نكارن ب دروستی پێشكەفتنێ‌ د ڤان دەڤەران دا بكەن و خەلك ب شێوەكی زێدە ژنەبوونا خزمەتگۆزاریێن پێتڤی بێزاربوویە،گەلەك ژ خەلكێ‌ ڤان گوندان و كۆمەلگەهان بەرێ‌ خۆ داینە دەرڤەی وەلاتی و ئەڤێ‌ چەندێ‌ مەترسیەكا مەزن ل سەر پاشەرۆژا ئێزدیان كریە،هەروەسا ئاریشەیا ڕێیا دناڤبەرا باعەدرێ‌ و هەتا بەدریێ‌ دا گەلەك كارتێكرنا خۆ ل سەر دەروونێ‌ خەلكێ‌ دەڤەرێ‌ كریە،ژبەركو ئەڤ رێیە وەكی چەپەرەكێ‌ ژدەستدانا خۆشتڤیان لیهاتییە, ل هەموو كۆمەلگەهێن دەڤەرێ‌ و گوندان ب دەهان چیرۆكێن ژدەستدانا خۆشتڤیان هەینە و ئەگەرێ‌ سەرەكی ژی ئێك سایدیا رێیە كو ئەڤە 20سالن ئەڤ رێیە وەكی خۆ یە و بێی هیچ لایەك دەستكاریێ‌ تێدا بكەتن.
ژبال خۆڤە بەرپرسێ‌ نڤیسنگەها لالش ل مەهەتێ‌ مەهدی حەسەن،بۆ دەنگێ‌ لالش راگەهاند,پشتی ئازادیا عیراقێ‌ و چارەسەریا كێشە و گرفتێن سەرهلداین دناڤبەرا حكومەتا عێراقێ‌ و هەرێما كوردستانێ‌ نەخاسمە ماددا 140 یێ‌ دەستورێ‌ عێراقێ‌ بوو ، د چارچوڤێ‌ دەستورێ‌ هەمیشەیی بتریا دوو پشكێن گەلێ‌ عێراقێ‌ دەنگ ل سەر داینە و ئێزدیان ڕۆلەكێ‌ بلند هەبوویە د سەركەفتنا دەستورێ‌ عێراقێ‌ دا كو تێدا هاتیە ئێك ژ كێشێن هەلاویستی دەڤەرێن ڤەقەتیایی ژ هەرێما كوردستانێ‌ یە كو بتریا دەڤەرێن ئێزدیان كێشە كەفتنە سەر و دەڤەرێن مە ئێزدیان شنگال و شێخان و بەركەندی و باشیك و بەحزان دناڤبەرا حكومەتا عێراقێ‌ و هەرێما كوردستانێ‌ هەلاویستی مان و هەتا نۆكە ئێكلا نەبووینە و ئێزدی ل سەر ڤێ‌ چەندێ‌ یێ‌ د نالن،هەرچەندە مللەتێ‌ مە چاڤەرێ‌ ئازادیێ‌ بوون داكو خۆ ژ بن ڤێ‌ بندەستیێ‌ و تەپەسەریێ‌ رزگار بكەن ژبەركو ژ بتری هەر ئاین و نەتەوەیەكێ‌ ل عێراقێ‌ ئێزدی د زەرەرمەندبوون ئەوژی ل ژێر دەستهەلاتا رژێمێن گۆڕبەگۆڕێن بەری نۆكە و نۆكەژی كەفتینە دناڤ ڤێ‌ دوو ئیداریێ‌ دا.
بەرپرسێ‌ نڤیسنگەها لالش ل مەهەتێ‌ خویاكر ژی ئەم د چاڤەرێ‌ بووین خەلكێ‌ مە بێتە قەرەبووكرن ملك و مالێ‌ مە ڤەگەرنە عەردێن خۆ یێن كشتوكالی و وەكی گرێبەستێن هەردەمی بێنە تۆماركرن و ئەم ئازاد و سەربەست ل سەر ئاخ و وەلاتێ‌ خۆ بژین بەلكو بەروڤاژی هەتا نۆكە چ قەرەبووكرن نەهاتینە تۆماركرن و عەرد و ملكێن مەژی هەتا نۆكە دەستەسەركرینە و ل سەر ناڤێن جوتیارێن ئێزدی نەهاتینە تۆماركرن.