“بنگه‌هێ لالش و گرۆپێ هيڤى،ڤيسته‌ڤالا پێكڤه‌ژيانێ ل كه‌مپا چه‌م مشكۆ گێران”
تۆرا لالش:
لژێر دروشمێ(شنگال و زاخۆ روحه‌كن)،ئيرۆ 6ى تيرمه‌ها 2022 بنگه‌هێ لالش تايێ شنگالێ و گرۆپێ هيڤى يێ خۆبه‌خش ڤيسته‌ڤالا ئاواره‌يێن خه‌لكێ شنگالێ ل كه‌مپا چه‌م مشكۆ ل سنوورێ ئيدارا سه‌ربه‌خۆ يا زاخۆ گێران.
ب ئاماده‌بوونا مير حازم ته‌حسين به‌گ ميرێ ئێزديان و بابا پێشيمام و ئه‌ندامێن جڤاتا رۆحانى و نوونه‌رێ پارێزگارێ دهۆكێ و ئيدارا زخۆ و به‌رپرسێ لقێ 17 يێ پارتى و قايمقامێ شنگالێ و سه‌رۆكێ جڤاتا پارێزگه‌ها نه‌ينه‌وا و نوونه‌رێ كونسلێ گشتى يێ ئه‌مريكا ل هه‌ولێرێ و نوونه‌رێ يوئێن و به‌رێز نێچيرڤان شێخ شامۆ و نوونه‌رێ بنگه‌هێ لالش ل دهۆكێ و رێڤه‌به‌رێن فه‌رمانگه‌هێن حكومى ل زاخۆ ورێڤه‌به‌رێن هه‌موو كه‌مپان ل زاخۆ و نونه‌رێن رێكخراوان ل كه‌مپێ و هه‌ژماره‌كا زۆر ژ رێهسپيێن زاخۆ و شنگالێ و خه‌لكێ ده‌ڤه‌رێ، ڤيسته‌ڤالا ئاواره‌يێن خه‌لكێ شنگالێ ل كه‌مپا چه‌م مشكۆ هاته گێران.
ل به‌راهيێ رێكخه‌رێن ڤيسته‌ڤالێ ب خێرهاتنا ته‌ڤايا ئاماده‌بوويان كر،ل دووڤدا په‌يڤا خه‌لكێ شنگالێ ژبال به‌رێز”مه‌حما خه‌ليل”ئه‌ندامێ جڤاتا نوونه‌رێن عێراقێ ڤه هاته خووندن.
لدووڤدا ڤيسته‌ڤالێ ده‌ستپێكر و چه‌ند پارچه هۆزان وستران هاتنه گۆتن كو ده‌ربرين ژ پێكڤه‌ژيان و برايه‌تيا دناڤبه‌را خه‌لكێ شنگالێ و زاخۆ دا دكر،زێده‌بارى نيشاندانا فلكلۆرێ شنگالێ.
ل داويا ڤيسته‌ڤالێ پارێزگارێ دهۆكێ و لقێ 8يێ پارتى و ئيدارا سه‌ربه‌خۆ يا زاخۆ و نوونه‌رێ هه‌موو ئاينان و رێڤه‌به‌رى و فه‌رمانگه‌هێن حكومى ل زاخۆ ژبال خه‌لكێ شنگالێ ڤه هاتنه خه‌لاتكرن.
تُتاح هذه الصورة أيضا في: کوردی
