جێگرێ پارێزگارێ نەینەوا:دڤێت پلانەكا باش بۆ ئاڤەدانكرنا شنگالێ بێتە دانان
تۆرا لالش:
جێگرێ پارێزگارێ نەینەوا بۆ كاروبارێن كارگێری ئاشكەراكر كو ئەو ئیدارا نۆكە خۆ سەپاندی ل شنگالێ نەیا شەرعی یە و ب هیچ شێوەیەكی حكومەتا خوەجهـ یا پارێزگەها مووسل كاری دگەل ناكت،دڤێت پلانەكا باش ژبۆ ئاڤەدانكرنا شنگالێ و ڤەگەریانا ژیانێ ل وێ دەڤەرێ بێتە دانان،داكو ئاوارە بزڤرنە سەر مال و حالێ خۆ و ژ ئاوارەبوونێ قورتال ببن.
رەفعەت سمو قائیدی،جێگرێ پارێزگارێ نەینەوا بۆ كاروبارێن كارگێری بۆ رۆژناما دەنگێ لالش گۆت:حكومەتا عێراقێ بەرپرسە ژ رەوشا نۆكە یا شنگالێ، رۆژ بۆ رۆژێ رەوشا ئەوێ دەڤەرێ ژ روویێ ئەمنی و كارگێری و خزمەتگۆزاری ڤە ئالۆز دبت،دڤێت حكومەتا عێراقێ ب ئەركێ خۆ یێ نشتیمانی رابت و رەوشا شنگالێ ب گشتی ئاسایی بكت و ئەو هێزێن نەشەرعی شنگالێ چۆل بكن و رادەستی شنگالیان بكن،بادەكا ئێمناهیێ ل شنگالێ بكەفتە د دەستێ پۆلیسێن ناڤخۆی دا و سوپایێ عێراقێ ژی سنووران كۆنترۆل بكت،ب جێبەجێبوونا ئەڤان خالان هیڤیێن ڤەگەریانێ دێ بۆ ئاواران پەیدا بت و ئەگەر ئەڤ چەندە نەئێتە جێبەجێكرن خەلك زوو ب زوو ڤەناگەرنە شنگالێ.
قائیدی ئاشكەراكر ژی ئەو ئیدارا نۆكە خۆ سەپاندی ل شنگالێ نەیا شەرعی یە و ب هیچ شێوەیەكی حكومەتا خوەجهـ یا پارێزگەها مووسل كاری دگەل ناكت،ژبەركو نەیا شەرعی یە،دڤێت كارگێریا شەرعی یا شنگالێ ڤەگەرتە شنگالێ داكو ئەو دەڤەر ژ پرۆژێن خزمەتگۆزاری بێ بەهر نەبت ژبەركو د نۆكەدا رێكخراوێن مافێن مرۆڤی و خێرخوازی نكارن پرۆژێن خزمەتگۆزاری ئەنجام بدەن،چنكو رێگری ل وان دئێتەكرن ژئالیێ هێزێن نەشەرعی ڤە،نەبوونا ئێمناهیێ ئەگەرێ سەرەكی یە كو پرۆژە نەئێنە ئەنجامدان.
جێگرێ پارێزگارێ نەینەوا دوپاتكر كو حكومەتا خوەجهـ یا نەینەوا بەردەوام هەول ددەت پرۆژان ل شنگالێ ئەنجام بدەت،لێ هەتا نۆكە وەكو پێتڤی نەبوویە ژبەر نەبوونا شەرعیەتێ ل دەڤەرێ،هندەك پرۆژە وەكو قیركرن و سەخبێركرنا جادان هاتینە جێبەجێكرن لێ د ئاستێ پێتڤی دا نینن و دڤێت پلانەكا باش ژبۆ ئاڤەدانكرنا شنگالێ و ڤەگەریانا ژیانێ ل وێ دەڤەرێ بێتە دانان،داكو ئاوارە بزڤرنە سەر مال و حالێ خۆ و ژ ژیانا ئاوارەبوونێ قورتال ببن،ئەڤ سەدەمە هەموو ژبۆ لاوازیا حكومەتا دزڤرن،چنكو ل سەر رەوشا وێرانكری یا شنگالێ دبێ دەنگن.
تُتاح هذه الصورة أيضا في: کوردی