جه‌هوه‌ر عه‌لى به‌گ: 84 هه‌زار دۆنه‌مێن عه‌ردێ ئێزدیان ل شنگالێ یێن هاتینه داگیركرن
باسنيوز:
میر جه‌هوه‌ر عه‌لى به‌گ، وه‌كیلێ میرێ ئێزدیان بۆ كارۆبارێن په‌یوه‌ندییان دچاڤپێكه‌ڤتنه‌كێ دا بۆ (باسنیوز) راگه‌هاند كو: ”400 ره‌ڤاندیێن ئێزدى ناڤ كه‌مپا هۆلێ دا هه‌نه، ژبه‌ر خێزانێن داعش نه‌وێرن بێژن ئه‌م ئێزدى نه، هه‌ر ده‌مێ رێكه‌فتنا ناڤبه‌را حكومه‌تا هه‌رێما كوردستانێ و عێراقێ بۆ شنگال بجه هات، دێ باوه‌رى بۆ خه‌لكێ شنگال دروست بیت دێ زڤرنه سه‌ر جهێن خۆ”.
(باسنیوز): ئه‌گه‌رێ روودانا كێشه‌یێن جڤاكێ دناڤ ئێزدیان چنه؟
میر جه‌هوه‌ر عه‌لى به‌گ: “رۆژانە ئه‌ز سه‌ره‌دانا وه‌لاتیان دكه‌م بۆ چاره‌سه‌ركرنا هه‌موو جۆرێن ئاریشه‌یان. رۆژانه ژى چه‌ند ئاریشه دهێنه به‌ر ده‌ستێ مه ئه‌م هه‌ولده‌ن چاره‌سه‌ر بكه‌ین. هه‌تا نوكه هژماره‌كا زۆر یا كێشه‌یێن هه‌مه جۆر ناڤ خه‌لكێ مه دا هاتینه چاره‌سه‌ركرن هه‌تا ملیۆن كه‌سێن ئێزدى ل عێراق و هه‌رێما كوردستانێ دژین هه‌روه‌سا ژى هژماره‌كا زۆر یا ئێزدیان ل وه‌لاتێ ئه‌رمه‌نیا وجورجیا وئه‌لمانیا وئه‌مریكا و روسیا و سوریا و توركیا هه‌نه. ئێزدى ملله‌تێ خۆدان به‌خت وباوه‌ره پتر كێشه‌یێن جڤاكێ ناڤ خه‌لكێ دا دروست بن خه‌لكێ مه گه‌له‌ك ناڤ خێڤه‌تاندا دژین. رۆژانه ئاریشه دروست بن، ئه‌م هه‌موو هه‌ولا ده‌ن بۆ نه‌هێلانا ئاریشه‌یان دناڤ ملله‌تێ مه یێ ئێزدى دا”.
(باسنیوز): گیرۆبونا بجه ئێنانا رێكه‌فتنا ناڤبه‌را حكومه‌تا هه‌رێما كوردستانێ و عێراقێ دا بۆ باشكرنا ره‌وشا شنگال چ كارتێكرن كریه؟
میر جه‌هوه‌ر عه‌لى به‌گ: “گه‌له‌ك كارتێكرن ل سه‌ر ره‌وشا خه‌لكێ شنگال بوویه چونكو خه‌لك دوو دل بووینه نه‌شێن زڤرینه شنگال. نوكه ژى خه‌لكێ شنگال چاڤه‌رێ بجه ئێنانا رێكه‌فتنێ دكه‌ن هه‌ر ده‌مێ رێكه‌فتن بجه هات دێ باوه‌رى بۆ خه‌لكێ شنگال دروست بیت دێ زڤرنه سه‌ر جهێن خۆ چونكو دێ ئاڤه‌دانى و ته‌ناهى ل شنگال په‌یدابیت له‌ورا ژى داخوازێ ژ حكومه‌تا هه‌رێما كوردستانێ و عێراقێ دكه‌ین ده‌مێ پێك ئێنانا حكومه‌تا نوو یا عێراقێ كار بهێته كرن بۆ زڤرینا ئاواران كو ئێزدى خه‌لكێ كوردستانێ نه، ل هه‌لبژارتنان خه‌لكێ شنگال سه‌لماند كو ناسنامه‌یا شنگال كوردستانی یه و چو جاران رێ ناده‌ن شنگال ژ كوردستانێ جۆدا بیت، چار كاندیدێن ئێزدى ژلیستا پارتى دیموكراتى كوردستانێ ده‌رچووینه دێ بنه په‌رله‌مانتار ئه‌ڤه رێ خۆش دكه‌ت پتر كار ل سه‌ر بابه‌تێ زڤرینا ئاواران و دابینكرنا ته‌ناهى ل شنگال بكه‌ن”.
(باسنیوز): زانیاریا هه‌وه چنه ل سه‌ر مانا ره‌ڤاندیێن ئێزدى ناڤ كه‌مپا هۆلێ یا سوریا دا؟
میر جه‌هوه‌ر عه‌لى به‌گ: “دووڤ زانیاریان هه‌تا 400 ره‌ڤاندیێن ئێزدى دناڤ كه‌مپا هۆلۆ دا بن ناڤێ خێزانێن تیرۆرستێن داعش دا هه‌نه. مه هیڤى هه‌یه حكومه‌تا عێراقێ ل سه‌ر ڤێ بابه‌تێ بێده‌نگ نه‌بیت وهنده‌ك لیژنا دروست بكه‌ت بچنه ناڤ كه‌مپا هۆلێ دا بۆ رزگاركرنا ره‌ڤاندیێن ئێزدى. مه زانیارى هه‌نه ئێزدى ناڤ كه‌مپا هۆلۆ دا هه‌نه هاتینه ڤه‌شارتن ناڤ خێزانێن داعشێ دا هه‌تا ژى ئه‌و ره‌ڤاندیێن ناڤ كه‌مپێ دا نه‌وێرن بێژن ئه‌م ئێزدى نه چونكو گه‌له‌ك فشارا خێزانێن داعش ل سه‌ر ره‌ڤاندیان هه‌یه. هه‌تا نوكه ژى حوكمێ داعش ناڤ كه‌مپا هۆلێ دا هه‌یه”.
(باسنیوز): ئاریشا چاره‌سه‌ركرنا عه‌ردێ ئێزدى ل شنگال گه‌هشته كیڤه؟
میر جه‌هوه‌ر عه‌لى به‌گ: “84 هزار دونمێن عه‌ردی یێن چاندنێ یێن ئێزدى یێن هاتینه داگیركرن ل شنگال ژلایێ عه‌ره‌بێن ده‌ڤه‌رێ ڤه، ئه‌ڤه ڤه‌دگه‌ریت بۆ سالا 1974 ئه‌ڤ عه‌رد هه‌موو یێ خه‌لكێ مه هۆزا سمۆقیا،قه‌یرانیا یه هه‌تا ئه‌ڤرۆكه ژى هێشتا چاره‌سه‌رنه‌بوویه ئه‌م هیڤدارین ئه‌ڤ ئاریشه چاره‌سه‌رببیت”.
(باسنیوز): بۆچى ئێزدى نا ڤه‌گه‌رنه شنگال؟
میر جه‌هوه‌ر عه‌لى به‌گ: “هه‌ر كه‌سه‌كێ غه‌درێ بكه‌ت پێدڤیه بهێته سزادان ب تایبه‌تى ژى تیرۆرستێن داعش یێن تاوان دژى ئێزدیان ئه‌نجامداین پێدڤیه حكومه‌تا عێراقى هه‌موو كاران بكه‌ت هه‌موو تیرۆرست بهێنه سزادان داكو باوه‌رى بۆ خه‌لكێ شنگال دروست بیت چونكو خه‌لكێ مه باوه‌رى نینه هه‌روه‌سا ژى نابیت ب هیچ شێوه‌یه‌كێ تیرۆرستێن داعش بهێته ئازاد كرن”.
