بنگەهێ لالش ل بیرەوەریا دامەزراندنا خوه:ب هیچ ئاوایەكی بەرهەنگاری نكارن كاروانێ مە ڕاوەستینن
-ئەرشیفێ بنگەهێ مە بوویە سەركانیەك ژبۆ ڤەكۆلەرێن لۆكال و بیانی
-ئەم روو برووی هەر ئالیەكی بوون یێن كو هەولداین بیروباوەرێن مە یێن ئایینی و ناسنامەیا مە یا نەتەوایەتیا كوردی یا رەسەن ب شێوێنن
-پشتەڤانیا سەركردایەتیا هەرێما كوردستانێ ژبۆ بنگەهێ مە پشتەڤانیە ژبۆ تایبەتمەندیا كوردێن ئێزدی.
بیست و هەشت سال لسەر دامەزراندنا بنگەهێ مە دەرباز دبن وەكو یەكەم بەرهەمێ ئێزدیان چنی پشتی رزگاركرنا هەرێما كوردستانێ ژبن دەستێ رژێما عێراقێ یا هەلوەشیایی ،كو وی دەمی دانوستاندن یان نڤیسین دەربارەی دیرۆكا ئێزدیا و ئۆلا وان یا هەرە كەڤنار تاوانكاری بوو و دەرفەت تەنێ یا بەردەست بوو ژبۆ وان پێنڤیسێن پەسنا رژێما وی دەمی و سیاسەتا وێ یا شۆڤێنی و دكتاتۆری دكرن.
ژ دەمێ دامەزراندنا بنگەهێ مە ل (12)ی گولانا سالا 1993ێ لژێر دروشمێ(لالش كانیەكا زەلالە دهورتە دروبارێ رەوشەنبیریا كوردی دا)بنگەهێ مە رابوو ب داوەشاندنا تۆزا گومانێن زالمانە و تۆمەتێن بێ بنەما دەرهەق بیروباوەرێن مە یێن ئاینی و ناسنامەیا مە یا نەتەوایەتی یا كوردیا رەسەن، نەراستیا وان هەموو تۆمەتا ب ڤەكۆلینێن تۆكمە و ریالستیانە هاتە دیاركرن كو ل گۆڤارا لالش ژ ئالیێ نڤیسەر و ڤەكۆلەرێن ئێزدی و نە ئێزدی دئێنە بەلاڤكرن ب درێژاهیا زێدەتر ژ بیست و پێنج سالێن بۆری،هەروەسا ئەرشیفێ بنگەهێ مە بوویە سەركانی ژبۆ بتریا ڤەكۆلەر و میدیاناس و خووندەڤانێن خووندنا بلند هەروەها ڤەكۆلەرێن لۆكال و بیانی،ژبۆ زانین دەرگەهێن بنگەهێ مە و ئەرشیفێ وی یێ دەولەمەند دڤەكرینە لبەر هەر ڤەكۆلەر و دیرۆكنڤیسەكی ل هەموو دەما.
سەرەرای بەرهەنگاری و بوویەرێن تووشی رۆژهەلاتا ناڤین هاتین ل ١٠ سالێن بۆری، كو بوویەرا هەرە خویایی هێرشا زالم و هۆڤانە یا تیرۆرستێن دئێنه بناڤكرن دەولەتا ئیسلامی(داعش)دەرهەق مللەتێ مە یێ ئێزدی ل وێ هێرشا بێ وژدانانەدە چەندین تاوانێن دژی مرۆڤایەتیێ دەرهەق ئێزدیێن شنگالێ هاتنە ئەنجام دان ل(3/8/2014)ێ، نەژبەر گونەهەكی كرین بەلكو ژبەر سووربوونا وان لسەر باوەرئانینێ ب ئۆلا باب و پاپیران،ئەو تاوانێن مەزن وێ بنە خالەكا رەش هەتا هەتایێ،ل ئەنیا ئەنجامدەرێن وان و هەردەم وێ وژدانێن وان یێن مری ئازاردن،و ئەم دبێژن، سەرەرای وێ هێرشا دژوار و شوونوارێن هناڤ هەژینێن ل شوون خۆڤە هێلاین ژ وێرانكرنێ و كەنیزەكرنێ و هەتك برنێ و ئاوارەبوونێ،بنگەهێ مە تنێ ئەو كر یا ل ئاستێ بەرپرسیارەتیا دیرۆكیا لسەر ملێ خوە،و خۆ دگەل پێشهاتێن پر ئازار گونجاند،ژبۆ خزمەتكرنا خەلكێ مە ل نەهامەتیا وان یا بر تال دە،و هەرچیا ژ دەستێ بنگه‌هی هاتی لگۆر شیانێن لبەر دەست هەتا ئیرۆ رۆژ پێشكێشی خەلكێ خۆ دكت ئەوێن كو هەتا نهۆ ژی رەتدكن ڤەگەرنە شنگال ژبەر تەم و مژاویا رەوشا دەڤەرێن وان و كێش و ڤەكێشێن ناڤخۆیی و هەرێمایەتی لسەر شنگال،گرۆپێن چەكدار دڤێن ڤیانا خۆ ب هێزا چەكان بسەپینن بێ هیچ پووتەپێدانەكێ ب رێككەفتنا ناڤبەرا هەولێر وبەغدایێ سەبارەت ئاساییكرنا رەوشا شنگال بێگۆمان وەكو بەرهەنگاریەكا زەق دژی شیانێن حكوومەتا فیدرال.
هەلبەت،ئەگەر نە ژبەر پشتەڤانیا بێ سنوورا سەركردایەتیا هەرێما كوردستانێ بایە و ب تایبەت جەنابێ سەرۆك مەسعود بارزانی و كاك نێچیرڤان بارزانی(یێ سەرۆكێ حكوومەتێ ل كابینێن پێشی)بنگەهێ مە نەدكاری بەردەوامیێ ب ئەرك و كارێن خۆ بدە یان تایا و نڤیسینگەها ل دەڤەرێن ئێزدینشین ل هەردوو پارێزگەهێن مووسل و دهۆك ڤەكت،هەروەسا پشتەڤانیا رێزدار مەسرور بارزانی سەرۆكێ حكوومەتا هەرێمێ جهێ رێز و سووپاسیا مەیە،سەرەرای قەیرانا دارایی یا پر زەحمەتا بەغدایێ بسەر هەرێمێ دە سەپاندی.
دڤێ ئەم بێژن كو پشتەڤانیا سەركردایەتیا هەرێمێ ب هیچ ئاوایەكی نەیا مەرجداربوو بەلكو سەركردایەتیا هەرێمێ پشتەڤانیا ئێزدیان وەكو ئەركەكی دزانی ل بیاڤێ پشتەڤانیا هەموو پێكهاتێن كوردستانێ یێن ئایینی و نەتەوەی و تەكەزیا وێ لسەر بەردەوامیا چالاكی و تایبەتمەندیێن وان یێن جڤاكی،ژبەر ئەڤ پشتەڤانی درێژەپێدانا رێبازا بارزانیێ نەمرە ل وەكهەڤیێ و دادپەروەریێ دناڤبەرا هەموو پێكهاتێن كوردستانێ دە و خورتكرنا بهایێن دلۆڤانیێ و برایەتیێ و پێكڤەژیانێ دناڤ هەموو رەنگێن مللەتێ كوردستانێ دا.
و ئەم دبینین كو پشتەڤانیا بنگەهێ مە پشتەڤانیە ژبۆ تایبەتمەندیا ئێزدیان یا ئایینی ل چارچۆڤێ نەتەوایەتی یێ كوردستانێ دا،ژبەر ئەم وەكو مەزنترین رێكخراوا جڤاكا سڤیل لسەر ئاستێ كوردستانێ و عێراقێ،بووینە ژمارەیەكا گرنگ و گران هەر ئالیەكی پووتە پێدەرێ كاروبارێن ئێزدیان نكارە پەراوێز بكە.
ل دەمێ ئەم پر ژ دل سووپاسی و پێزانینێن خۆ پێشكێشی سەركردایەتی و حكوومەتا كوردستانێ دكەین،ئەم تەكەزیێ ل پێگیریێ ب درووشمێ بوویە ناڤ و نیشان ژبۆ بنگەهێ مە دكەین و ئەمێ مینن ل وێ باوەرێ كو ئێزدیاتی و كوردایەتی دوو روویێن یەك دراڤی نە،و ئەم دێ دبەردەوام بن ژبۆ خزمەتكرنا خەلكێ خۆ زێدەباری دۆزێن چارەنڤیسێن گەلێ كوردستانێ.
و ئەم ئاماژە ب وێ یەكێ ژی ددەن كو بوویەرێن ڤان هەفت سالێن بۆری،ب غەزوكرنا شنگال، و برینا بەهرا هەرێمێ ژ بوودجەیا عێراقێ هەر ژ سالا 2014ێ و هەتا نهۆ بووینە ئەگەر ژبۆ پاشخستنا كۆنگرێ هەلبژاردنێ بنگەهێ مە،بۆ زانین ئەم دپێگیرن ژبۆ سازكرنا كۆنگرە ل نێزیكترین دەم،ب مەرەما خورتكرنا رێڤەبرنا بنگەه ب خووین و شیانێن نوو.
سلاڤەكا رێز و پێزانینێ ژبۆ هەر كەسەكی پشتەڤانیا بنگەهێ مە كری،و سلاڤ ژبۆ هەر كەسێ بەشداربوویی و كاركری ل بلندكرنا بنگەهێ لالش ژ رۆژا دامەزراندنێ هەتا رۆژا ئیرۆ.
دەستەیا بلندا بنگەهێ لالش یێ رەوشەنبیری و كۆمەلایەتی/دهۆك
11ی گولانا 2021
تُتاح هذه الصورة أيضا في: کوردی
