پارێزگارێ دهۆكێ:هه‌تا كارگێریا شه‌رعى یا شنگالێ نه زڤرت ره‌وشا شنگالێ ئارام نابت
وشه:
ئه‌ڤرۆ شه‌ش ساڵ ل سه‌ر كومكوژیا شنگالێ ده‌ربازبوون، هه‌تا نوكه پترى 90% ژ ئاواره‌یێن شنگالێ ل كه‌مپێن پارێزگهها دهوكێ دژین، پارێزگارێ دهۆكێ دیاركر كو هه‌تا كارگێریا شه‌رعى یا شنگالێ نه‌زڤریته شنگاڵێ، ره‌وشا ده‌ڤه‌رێ ئاسایى نابیت.
د نوكه دا گرنگه شنگال ژ روویێ ئه‌منى و سیاسى بهێته ئاسایكرن
عه‌لى ته‌ته‌ر، پارێزگارێ دهۆكێ د سه‌ره‌دانه‌كێ دا بۆ ئێك ژ خێزانێن ئێزدى ل كه‌مپا چه‌م مشكو ل ده‌ڤه‌ردارییا زاخۆ، نێزیكێ 30 كه‌سان ژ خێزانا وێ ژلایێ داعشێ هاتینه كوشتن و ره‌ڤاندن دیاركر كو ژ ئه‌گه‌رێ كۆرۆنایێ ب هه‌لكه‌فتا شه‌ش سالیا كومكوژیا شنگالێ چوو رێورسمێن فه‌رمى ل پارێزگهها دهۆكێ ناهێنه ئه‌نجامدان و گۆت “جهێ داخێ یه ئه‌ڤه شه‌ش سال بورین و هێشتا ئاواره نه‌شیانه بزڤرنه سه‌ر جهـ و وارێن خوه، به‌لێ دوپات دكه‌ین كو هه‌تا كارگێریا شه‌رعى یا شنگالێ كو خه‌لكى هه‌لبژارتیه نه زڤریت، ب چوو ئاوایى ره‌وشا شنگالێ ئارام نابیت و خه‌لك ژى نه‌شێن ڤه‌گه‌رن، له‌وا د نوكه دا گرنگه شنگال ژ روویێ ئه‌منى و سیاسى بهێته ئاسایكرن، ئه‌و خه‌لكێ كو ڤان چه‌ند رۆژێن بورى زڤرى یه شنگالێ هه‌موو ب حه‌زا خوه چوینه و ل سه‌ر ئاستێ تاكه كه‌سى بویه”
زێده‌تر گۆت “هه‌ر چه‌نده حوكمه‌تا هه‌رێما كوردستانێ هه‌موو خزمه‌تگۆزاریێن پێدڤى بۆ ئاواره‌یێن شنگالێ ل كه‌مپان دابین كرینه، به‌لێ هه‌تا شنگالى نه‌زڤرن، حوكمه‌تا هه‌رێمێ نه‌شێت هه‌موو جوره خزمه‌تگۆزاریان پێشكێش بكه‌ت، ژبه‌ركو نیه‌تا حوكمه‌تا هه‌رێمێ ئه‌وه خزمه‌تگۆزاریان ل شنگالێ دابین بكه‌ت نه‌ك دناڤا كه‌مپان دا، چونكى كه‌مپ ده‌مكى یه و ئه‌ڤرۆ یان سوبه‌هى دێ هێته هێلان و خه‌لك زڤریته جهـ و وارێن خوه، ل ڤێره داخوازێ ل جڤاكێ نیڤده‌وله‌تى و حوكمه‌تا عیراقێ و جهێن شوله‌ژێ دكه‌ین كو جدى كار ل سه‌ر ئاسایكرنا ره‌وشا شنگالێ و دانه‌نیاسینا كومكوژیا شنگالێ ب جینوساید بكه‌ن و قوربانیێن وێ ب ماددى و مه‌عنه‌وه‌ى بهێنه قه‌ره‌بووكرن”
ئه‌ڤرۆ ل كه‌مپێن ئاواره‌یێن شنگالێ ل پارێزگهها دهۆكێ خرڤه‌بوونێن جودا دێ هێنه ئه‌نجامدان و تێدا كومكوژیا شنگالێ هێته رسواكرن و داخوازێ كه‌ن كو ره‌وشا شنگالێ ئاساى بیت و داخوازیێن وان بهێنه بجهئینان.
تُتاح هذه الصورة أيضا في: کوردی
