بنگەهێ لالش:بەغدا ب تەمامی بەرپرسیارە ژ رەوشا ئالۆزا ل شنگال
ل شەشەمین بیرەوەریا جینۆسایدا ئێزدیان ل شنگالا بریندار،هێشتا نێزیكی(2800) ژن و زەلام و زارۆكێن ئێزدی بێ سەر و شوونن،و ب دەهان كەسێن دی ژبەر پێشەرۆژەكا وندا كۆچبەری ئەورۆپا و ئەمریكا و ئوسترالیا و وەلاتێن دیتر بووینە ژبەر زێدەبوونا هزرا توندرەویا ئایینی ل رۆژهەلاتا ناڤین ب گشتی و دناڤ دا عێراقا فیدرال،ئەم دوێ باوەریێ دانە دەمێ دەرگەهێ كۆچبەریێ بۆ ئێزدیان ڤە بتە ڤە دێ ب هەزاران ئێزدی كۆچبەر بن،و ئەڤە هەموو ژبەر نەبوونا باوەریا وان د پێشەرۆژا نێزیك و دوور دا،و مافێ وان هەیە كاربكەن داكو خێزانێن خۆ ژ هەر جۆرە مەترسیەكێ بپارێزن،لێ هۆكار ل پێش چاڤێ هەر كەسی نە ب رێیا گۆتارێن توندرەوێن ئایینی و مەزهەبی كو حكومەتێن دەوروبەر ژبەر بەرژەوەندیێن تەنگ و ناسكری ب چاڤەكێ كور بەرێ خۆ ددەنێ.
بیرەوەریا تراژیدیا شنگال دناڤ خوون و ئێش و برینێن ئێزدیان دا دێ هەر مینت و بەردەوام بت،وەكو هەر دێ بمینت د دیرۆكێ دا و روورەشی و سەرشۆری بۆ هەر كەسێ ئەنجام دای و پشتەڤان بووی ل پشت دیمەنێن تاری دا،ب تایبەت ژی یێن كو بەهایێ پێكڤەژیان و برایەتیێ ناس ناكەن و واتایا شارستانی و پێشكەفتنا مرۆڤان نزانن.
و گاڤا ئەڤ هەلكەفتا دلتەزین دەرباز دبە،خەلكێ مە ل شنگال و تەڤایا ئێزدیان ل نیڤا رێ سەكنینە،بەلێ رەوشا ئالۆز ل شنگال و كۆمەلگەه و چیایێ شنگال،و كێشەیا بەلاڤبوون و هەلگرتنا چەكێن بەرچاڤ و دیار،و هەبوونا چەندەها ئالیێن چەكدار هەموو ل بەرژەوەندیێن خۆ دگەرن و بازرگانیێ ب خەمێن ئێزدیان دكەن،بەلێ گرنگیدانا وان بۆ ئێزدیان تەنها دروشمەكێ دەرەوە بۆ بدەستڤەئینانا ئارمانجێن خۆ كو بۆ هەموویان رۆن و ئاشكەرایە.
ئەم ل دەستەیا بلندا بنگەهێ لالش یێ رەوشەنبیری و كۆمەلایەتی و وەك سازییەكا هەری مەزن یا جڤاكێ سڤیل یا ئێزدیان ل كوردستانێ و عێراقێ و جیهانێ،ئەم بەغدایێ ب تەمامی بەرپرسیار دبینن ژبەر رەوشا ئالۆزا ل شنگال،و ئەم دبینن بەغدا دڤێت هەموو تشت ب ئالۆزی بمینن،كو بگەهنە ئارمانجێن خۆ هەتا دەرڤەی سنوورێن عێراقێ ژی، و دهەمان دەم دا ئێش و ئازارێن خەلكێ مە كورتر دبن ل كەمپان یان ژی كەسێن دەمێ ڤەدگەرنە شنگال ب هیڤیا دەستپێكرنا ژیانەكا نوو.
لدۆر ڤێ چەندێ،داخازێ ژ بەغدا دكەین چارەیەكێ بۆ كێشەیێن چەك هەلگرتنێ ل سەرانسەری شنگال ببینت،و دوورخستنا تەڤایا گرۆپێن چەكدار یێن عێراقی و بیانی،و لێكتێگەهشتن دناڤبەرا وەزارەتا بەرەڤانیا عێراقێ و وەزارەتا پێشمەرگەی ل هەرێما كوردستانێ لدۆر چاوانیا ب رێڤەبرنا كاروباران ل شنگال،و ب هەماهەنگیەكا بلند لگەل خەلكێ شنگالێ،دگەل نەهێلانا شاشیا كەسێن ل پۆستێن ئیداری ژ قایممقام و رێڤەبەرێن ناحیان هاتینە دانان ژ دەرڤەی سنوورێ عێراقێ.
ئازادی بۆ گرتیێن ئێزدی
سلاڤ بۆ گیانێ جانگۆریێن شنگال
سلاڤ بۆ گیانێ پێشمەرگەهێن قارەمان یێن بخوونا خۆ یا پاقژ شنگال رزگاركری
روورەشی بۆ داعش و هەر ئێكی پشتەڤان بووی
دەستەیا بلندا بنگەهێ لالش یێ رەوشەنبیری و كۆمەلایەتی/دهۆك
2ی تەباخا 2020
تُتاح هذه الصورة أيضا في: کوردی
